سڤیل: هەژار مەموزینی

زوبێر ساڵح یەكێكە لەگۆرانیبێژەكانی كوردستانی رۆژئاوا كە لەگوندی دەلكێك لەنزیك شاری دەربازیێ لەرۆژئاوای كوردستان لەدایكبووە، ئێستاش دانیشتووی وڵاتی ئەڵمانیایە، 25 ساڵە كاری هونەری دەكات و لەو چاوپێكەوتنەی لەگەڵ (سڤیل)دا رەخنە لەدەزگا هونەرییەكان دەگرێت و دەڵێ "خۆیان بەخاوەنی هونەرمەندان نازانن" و پێشی وایە ئەوەش وایكردووە هونەری گۆرانی كوردی رۆژ دوای رۆژ لەكزبوون دابێت.
هونەرمەند زوبێر ساڵح دەڵێت "پێویستە دەزگاكانمان لەكوردستان خاوەندارێتی هونەرمەندان بكەن و بەشداری بكەن لەبەرهەمهێنانی كاری هونەری هونەرمەندەكان، بۆ ئەوەی هونەرمەندیش بتوانێ بەشێوەیەكی پڕۆفیشیناڵ و رەسەن كار بكات. ئەگەر هونەرمەند لایەنی ئابووری لاواز بوو، زۆر زەحمەتە بتوانێ ئەوەی دەیەوێت پێشكەشی بكات". زوبێر نموونەی قسەكەی بەوە دێنێتەوە و دەڵێت "چەندین ساڵە لەناو هونەردا دەسوتێم و بەرهەمی رەسەنم پێشكەش كردووە، ئێستا دەمەوێت بەرهەمێك لەسەر هۆنراوەكانی جەزیری بكەم، بەڵام لەبەر نەبوونی هاوكاری ناتوانم ئەوە بكەم، بۆیە ترسم لەوەدایە ئومێدم لەوكارە ببڕێت".
ناوبراو رەخنە لەدەزگا و كەناڵەكانی راگەیاندنیش دەگرێت، كە هەر كەناڵێك خزمەت بەهونەرمەندانی ناوچەیەك دەكات، زوبێر ساڵح وەك خۆی دەڵێت "بەداخەوە راستیەك هەیە ئەوەیش هەر كەناڵێك لەپارچەیەكی كوردستان هونەرمەندانی خۆیان پیشان دەدەن و جیاكاری لەنێوان هونەرمەندانی ناوچەكانی كوردستاندا دەكەن، ئەم جۆرە شتانە زۆر پێی عاجز دەبم". زوبێر باس لەبارودۆخی ئێستای سوریا دەكات و داوا لەحیزبە كوردییەكان دەكات ئەو دەرفەتە بقۆزنەوە و لەو وەختەدا دەست لەناكۆكی خۆبەخۆیی هەڵگرن و تەنیا بیر لە بەدەستهێنانی ماف و ئازادی كورد بكەنەوە، چونكە ئەو دەڵێت "ئەو دەرفەتەی ئێستا لەسوریا بۆ كورد رەخساوە، هیچ كاتێكی دیكە نارەخسێتەوە". ئاماژەی بەوەشدا سەرەڕای ئەوەی گەلی كورد لەسوریا ژێردەستە "بەڵام هونەرێكی باش لەئارادایە و لەمێژوودا هونەرێكی رەسەن و باش بووە".