سڤیل: زانا دڵشاد دزەیی

حیزبێك سەیارەیەكی پێدام بۆئەوەی ریكلامی بۆ بكەم رەتم كردەوە

لە 10 هەزار دۆلار كەمتر ریكلامم نەكردووە

ئەو هونەرمەندانەی لە ئێمە جیابوونەوە لەبەر مادی بوو نەك حیزبی

ئەگەر وەزارەتی رۆشنبیری تۆزێك هاوكاریمان بكات دێینە هەولێر 10 نمایش دەكەین

ئەكتەری كۆمیدی ماهیر حەسەن، دوای بەشداریكردنی لەچەند شانۆگەری و زنجیرە درامایەك كە لەچەند ساڵەی رابردوودا بەرهەمهاتوون ناوبانگ و جەماوەرێكی زۆریاتری بۆ دروست بوو، ئێستا سەرۆكی "تیپی رەنگاڵە بۆ شانۆیە" ئەندامەكانی لە 10 شانۆكاری سلێمانی پێكهاتووە، ئەوان شانۆكانیان بەشێوەی كۆمیدی نمایش دەكەن و هەر شانۆگەرییەك هەشتا بۆ سەد جار نمایشی دەكەن، ماهیر حەسەن دەڵێت "لە شانۆگەری ئێستامان (سەردان) لە 82 نمایشدا 26 هەزار پلیتمان فرۆشتووە".

سڤیل: سەرەتا لەشانۆگەری (سەردان)ـەوە دەست پێدەكەین، تائێستا چەند بینەری هەبووەو كەی كۆتایی بە نمایشەكە دێت؟
ماهیر حەسەن: تائێستا 26 هەزار بینەر بە بلیت بینیوویەتی، ئەوە جگە لەمیوان كە نزیكەی 3600 میوان بینیوویەتی، واتا نزیكەی 30 هەزار بینەری هەبووە، لەماوەی 78 رۆژ بۆ 82 نمایش، رۆژی 17/12 دوا نمایشی شانۆگەرییەكەمانە، وابزانم هیچ شانۆگەرییەك ئەوەندە بینەری نەبووە، لەساڵی داهاتوو پلان بۆ ئامادەكردنی شانۆگەرییەكی تر دادەنێین.
سڤیل: زۆرجار باستكردووە بەنیازن بێنە شاری هەولێر لەوێش نمایشی شانۆگەرییەكانتان بكەن، كەچی تائێستا نەهاتوونە، ئەوە مانای چییە دێن یاخود نا؟
ماهیر حەسەن: ئێمە دەمانەوێ و هەوڵی زۆریشماندا بێین بۆ هەولێر، بەڵام وەزارەتی رۆشنبیری ئامادە نییە هیچ هاوكارییەكمان بكات، ئێمە وەك تیپی رەنگاڵە ناتوانین بێینە هەولێر 10 رۆژ شانۆگەری نمایش بكەین و هەموو مەسروفاتەكانیش لەسەر خۆمان بێت، چونكە ئەگەر هەموو شتێك خۆمان تەرخانی بكەین پرۆژەكانی دیكەمان فەشەل دێنی، چونكە سیفاتێك لەتیپەكەی ئێمەدا دروست بووە، داهاتی نمایشەكان هەڵدەگرین پرۆژەی دیكەی پێ ئەنجام دەدەین، بۆ نموونە سەفەری پێشوومان كە چووین بۆ دەرەوەی وڵات بەپارەی سندوقی تیپەكە بوو، بۆیە بەبێ هاوكاری وەزارەتی رۆشبیری ناتوانین بێینە هەولێر.
سڤیل: ئاخر ئێوە بلیت دەفرۆشن، كەواتە بۆچی حكومەت هاوكاریتان بكات، ئێوە دەتوانن لەهەولێریش بلیت بفرۆشن و كارەكانی خۆتان پێ ئەنجانم بدەن، بۆچی چاوەڕێی حكومەت دەكەن؟
ماهیر حەسەن: راستە بلیت دەفرۆشین، بەڵام لەوانەیە لەهەولێر نمایشی شانۆگەرییەكانمان وەك سلێمانی بینەرمان نەبێت و ئەوەندەی سلێمانیش بلیت نافرۆشێت، بۆیە ئەگەر وەزارەتی رۆشنبیری نیوەی مەسروفاتەكانمان بداتەوە، ئامادەین بێینە هەولێر 10 رۆژ نمایشی شانۆگەری بكەین.
سڤیل: هەندێ شانۆكار لەبارەی شانۆگەرییە كۆمیدییەكانی ئێوە پێیان وایە ئەوەی ئێوە دەیكەن لەئاستێكی زۆر نزم دایە و شانۆگەری گاڵتەجاریە نەك كۆمیدی، لەسەر ئەو بۆچوونە قسەت هەیە؟
ماهیر حەسەن: ئەو هونەرمەندانەی ئەو قسانە دەكەن بابێن شانۆگەرییەك لەمن باشتر بكەن، بابتوانن 10 رۆژ نمایش بكەن، ئەو خەڵكانەی دێن بۆ بینینی شانۆگەریەكانمان خەڵكی نەفام و ئاست بێئەقل نییە، ئەو بینەری دێتە شانۆگەرییەكانی ئێمە باوەڕناكەم لەهیچ شانۆگەرییەكی دیكە هەبێت، لەدكتۆر و ئەندازیار، لەپارێزەر و هونەرمەندان، لەكەسی باڵای حیزبی و حكومی، لەقوتابیانی زانكۆ دێن بۆ بینینی شانۆگەرییەكانمان، مامۆستا ئەحمەد سالار كە رائیدی شانۆی كوردییە هاتە سەر شانۆ سەری بۆمان دانواند و گوتی ئەم كارانەی ئێوە دەكەین، ئەمڕۆ پێویستە بەحسی لەسەر بكرێت، چونكە لەرووی فكر و نواندن و دەرهێنانەوە ئاستێكی بەرزی هەیە. هەروەها ئەو بابەتانەی ئێمە لەشانۆگەریەكانمان باسی دەكەین و دەیوروژێنین باوەڕناكەم تائێستا ئۆپۆزسیۆن باسی كردبێت، باسی گەندەڵی حكومەت و خەڵكیش كردووە، چونكە كۆمەڵگاش بەشێكە دروستبوونی ئەو گەندەڵیە، لەبەرئەوە پێموایە ئەو هونەرمەندانەی قسەمان پێدەڵێت ناتوانن شانۆگەریەك بكەن 10 رۆژ بینەر كۆبكەنەوە.
سڤیل: ئەی بۆچی كێشە لەناو تیپەكەت روویدا كە لەئەنجامدا كۆمەڵێك هونەرمەندی ئەندام لەتیپەكە جیابوونەوە، دەگوترێ لەبەر حیزبایەتی بوو، ئەوانەی جیابوونەوە گۆڕان بوون و ئێوەش یەكێتی، وەك چۆن لەبەرنامەی بەرنامە روویدا، ئەوە تاچەند راستە؟
ماهیر حەسەن: نەخێر ئەوە هیچ پەیوەندییەكی بەمەسەلەی سیاسی نەبوو، بەڵكو ئەوەی كێشە لەنێوان هونەرمەندان دروست دەكات مادییە، هەرچەندە هەموو ئەو ئەندامانەی لەئێمە جیابوونەوە گرێبەستیان لەگەڵ تیپ هەبووەو حەقی خۆیان پێدراوە، بەڵام لەوانەیە ئەو برادەرانە بیانەوێ خۆیان گروپێك دروست بكەن قازانجی مادی بكەن و واهەست دەكەن ئەگەر وابكەن دەستكەوتی مادیان زیاتر دەبێت، هەروەها غیرە كێشەیەكی گەورەیە لەناو هونەرمەندەكان.
سڤیل: زۆرجار هونەرمەندە برادەرەكانت دەڵێن "ماهیر حەسەن لەئیشی هونەریدا دیكتاتۆر و تاكڕەوە". بۆچی وات پێدەڵێن؟
ماهیر حەسەن: حەسوودیم پێدەبەن بۆیە وادەڵێن، لەهونەرمەندەكان بپرسە بزانە تەعامولكردنی من لەگەڵ هونەرمەندەكان چۆنە، بەپێچەوانەوە ئەگەر لەگەڵ ئەو تیپە نەبوایە، ئەگەر لەبەر خاتری ئەو برادەرانە نەبێت كە لەگەڵم دان، بەشێوەیەكی تر گرێبەستم دەكرد، بەڵام ئەوانە هەمووی هاوڕێمن لەپەیمانگا خاتری زۆرم گرتوون لەهەموو روویەكەوە، لەبەرئەوەی ئەو قسانەی لەسەر من دەكرێ هەمووی غیرەیە، هەموو ئەندامەكانی تیپی رەنگاڵە كاتێك خۆم ئەوانم هێناوە بۆ تیپەكە و خۆم دەستم گرتوون و خۆشم پێم گوتوون فەرموو ئەوە دەق، كێ حەزدەكات دەرهێنانی بۆ بكات بابیكات، بەس بۆئەوەی نەڵێن ماهیر تاكڕەوە، پێم باشە هەر من نەبم لەناو تیپەكە كاری دەرهێنان بكەم، چونكە هەندێ تیپ هەبووە كاتێك دەرهێنەرەكەی رۆیشتووە یاخود كۆچی دوایی كردووە ئەو تیپە كوژاوەتەوە، من نەمویستووە لەداهاتوودا تیپی رەنگاڵە وای لێبێت، خۆم هانی ئەندامەكانم داوە كاری دەرهێنان بكەن، ئیتر تاكڕەوی و دیكتاتۆری من لەچیدایە؟ لەبەرئەوە ئەو قسانە تەنیا لە غیرە سەرچاوەی گرتووە.
سڤیل: زۆرجار لەچاوپێكەوتنە رۆژنامەوانییەكانت باست لەوەكردووە لە لوتكە دای، هەست ناكەی لەخۆباییبوونێك لەتۆدا هەیە؟
ماهیر حەسەن: نەخێر من لەخۆبایی نەبوومەو هیچكات بەدەمی خۆم نەمگوتووە لەلوتكە دام، بەڵام گوتوومە دەتوانم لەتراژیدیا و كۆمیدیا حەقی خۆی بدەم و لەهەردووكیان سەركەوتووانە نواندن دەكەم، هەروەها پێشم خۆشە كێ دێت بەرامبەر من نواندن بكات چ لەكۆمیدیا بێت یاخود تراژیدیا، بەڵام لیژنەیەكی دادپەروەر هەڵسەنگاندن بكات بزانە كێ سەركەوتووترە، لەوانەیە خەڵكێك هەبێ بڵێت ماهیر حەسەن لەلوتكە دایە، بەڵام بەدەمی خۆم وام نەگوتووە.
سڤیل: لەبەرئەوەی خاوەن جەماوەرێكی زۆری، حیزبەكان هەوڵیان نەداوە بۆ خۆیان راتكێشن؟
ماهیر حەسەن: بێگومان زۆرجار شتی وا روویداوە و زۆرجاریش لەبانگەشەی هەڵبژاردن داوام لێكرا ریكلام بۆ حیزبێك بكەم و لەبەرامبەردا پارەیەكی زۆر و سەیارەیەكیان وەك خەڵات بۆ دانام، بەڵام گوتم ئەوە ئیشی من نییە ریكلام بۆ حیزب بكەم، جگە لەمەسەلەی نەتەوەیی نەبێت ریكلام بۆ هیچ حیزبێك ناكەم، چونكە هونەرمەند چەند لەحیزب دوور بێت ئەوەندە لای خەڵك خۆشەویستتر دەبێت، ئەگەر هونەرمەند حیزبایەتی بكات كۆمەڵێك خەڵكی خۆشەویست و جەماوەرێكی زۆر لەدەست دەدات.
سڤیل: ئەی نرخی ریكلامكردنت بۆ كۆمپانیاكان چۆنە؟
ماهیر حەسەن: من حەزدەكەم نەك ماهیر حەسەن هەر هونەرمەندێك كە دەركەوتووەو ناوبانگیان هەیە ریكلام بكەن لەئاستێكی زۆر بەرز و داوای پارەیەك بكەن، كە حەقی خۆی وەرگرێت، نەك بەپارەیەكی كەم لەوانەیە بۆ كەسایەتی هونەرمەندەكە خراپ بێت، من تائێستا لەدەفتەرێك دۆلار كەمتر ریكلامم نەكردووە، هونەرمەندیش هەیە بە پێنج وەرەقە ریكلامی كردووە، ئێستا هاوڕێیەكی خۆم هەیە بەناوی كاك هەڵگورد لەكوردستان تیڤی بەرنامەی هەیە، ریكلامێكی بۆم دۆزیەوە و پێم گوت لە 10 هەزار دۆلار كەمتر نایكەم، ئیتر تاوەكو ماوەیەك خاوەن ریكلامەكە هەوڵیدا بە 8 هەزار دۆلار رازیم بكات، بەڵام بەو نرخە نەمكرد.