سڤیل:
گۆرانیبێژی عێراقی محەمەد سالم ساڵی 1987 لەبەغدا لەدایكبووە، بەگۆرانی "گەلب گەلب" و "بەل بەلا" ناوبانگێكی زۆری لەعێراق و دەرەوەی عێراق دەركرد، بۆ یەكەمجار گۆرانییە نوێیەكەی لەرەواندوز كلیپ كردو لەوكاتەدا (سڤیل) چوار پرسیاری ئاراستە كرد.
سڤیل: چەندجارێك هاتووی بۆ كوردستان، بیرت لەوە نەكردۆتەوە لەگەڵ گۆرانیبێژێكی كورد گۆرانییەكی دوێت بكەن؟
محەمەد سالم: نەخێر، چونكە جگە لە(زەكەریا عەبدوڵڵا) و (لوی نانە) كەسی تر ناناسم، بەڵام گۆرانی دوێتم لەگەڵ مامۆستام (نەسرەت بەدر) هەیە، پاشان من زمانی كوردی نازانم، تەنیا چۆنی و سوپاس دەزانم.
سڤیل: چۆن بوو بڕیارتدا لەكوردستان "رەواندوز" كلیپە نوێیەكەت بكەی؟
محەمەد سالم: دڵم بەكوردستان دەكرێتەوە بەتایبەت هەولێر، زۆربەی ئاهەنگەكانم لەهەولێر بووە، بۆیە ویستم لەدیمەنە جوانەكەی رەواندوز كلیپەكەم بكەم، ئێستاش كلیپە نوێیەكەم یان لەبەیروت یاخود لەهەولێر دەكەم.
سڤیل: بەگۆرانی "گەلب گەلب" ناوبانگت دەركرد، كامە گۆرانی خۆت زیاتر خۆشدەوێت؟
محەمەد سالم: هەموو گۆرانییەكانم خۆشدەوێت، دەزانم جەماوەرەكەشم هەموو گۆرانییەكانی منیان بەدڵە، من گۆرانییەك ناكەم خەڵك گوێی لێ نەگرێ، لەگەڵ مامۆستای خۆشەویستم (نەسرەت بەدر) و (زیا میالی) دەزانم چی دەكەم.
سڤیل: بۆچی هەموو گۆرانییەكان لەسەر ستایلی عێراقییە، بۆچی هەوڵتنەداوە لەم ستایلە دەربچی؟
محەمەد سالم: راستە گۆرانییەكانم عێراقین، چونكە من عێراقیم، بەس پێم سەیرە بۆ یەكەمجارە ئەم پرسیارەم لێ دەكرێ، بەڵام لەگۆرانییە نوێیەكەم هەوڵدەدەم ستایلەكەی بگۆڕم.