سڤیل: سەنگەر عەبدولڕەحمان

بەیانیەكی زوو كە كزەی بایەكی سارد، گەڵای درەختەكانی ئەو دەوروبەرەیان دەهێناو دەبرد، بەدەموچاوی پێچراوەوە لەدوورەوە دەركەوت، هەمیشە بە تاسەوە دێتە سەركارەكەی، لەگەڵ گەیشتنی بەو كۆشكەی چەندین ساڵە كاری تێدا دەكات، دەستیكرد بە دەرهێنان و بڵاوكردنەوەی ئەو كتێب و رۆژنامەو گۆڤارانەی كە رۆژانە بە عیشقەوە دەیانفرۆشێت.
ئەنوەر برزو ئێستا لەحەفتاكانی تەمەنیدایە، رەنگبێت بەتەمەنترین و كۆنترین كتێب و رۆژنامەفرۆش بێت لەكوردستان، یان بە لایەنی كەمەوە لەسلێمانی، چونكە وەك خۆی دەڵێت كەس شك نابات لەتەمەنی ئەودا بێت و كاری رۆژنامەفرۆشی بكات.
ئەو كە بە سیما و سەر و ڕیشە سپیەكەی دەناسرێتەوە، گوتی "ساڵی 1976 لەكتێبخانەی راستی لەشەقامی سابونكەران دەستم بە فرۆشتنی كتێب كرد". سابونكەران شەقامێكی كۆنی سلێمانیەو دەكەوێتە ناوجەرگەی شارەوە.
دوای دوو ساڵ ئەنوەر برزو لەسابونكەرانەوە دەگوازێتەوە بۆ شەقامی مەولەوی، كە ئەمیشیان شەقامێكی تری ئەو شارەیەو زۆر دوور نییە لەوەی یەكەم.
"ساڵی 1980 دەستگیركرام، دوو ساڵ پاشتر بە لێبوردنی گشتی ئازاد كرام، پاش ئازادكردنم چوومە بەردەكی سەرا و دواتریش شەقامی پیرەمێرد و پاش هەمووشیان شەقامی سالم". ئەو كتێب فرۆشە كە لەناو هەزاران كتێب و رۆژنامەو گۆڤاردا ون ببوو وای گوت.
ئەو كە مامۆستای سەرەتایی بووەو ئێستا خانەنشین كراوە، هەرگیز رۆژێك لەڕۆژان هەستی بەماندووبوون لەفرۆشتنی كتێب و رۆژنامە نەكردووە، چونكە دەڵێت "كارەكەمم خۆش دەوێت، حەزدەكەم بخوێنمەوە، ئەگەر لێرە نەبم دەبێت بچم لەكتێبخانەیەك بخوێنمەوە، پێمخۆشە خەڵك بخوێنێتەوە".
برزۆ بۆچونی وایە پیشەكەی ئەو جیاوازە لەو پیشانەی كە زۆر لەخەڵكی وڵاتەكەی ژیانی پێدەگوزەرێنن، چونكە "مامەڵە لەگەڵ عەقڵی مرۆڤدا دەكەم، مامەڵە لەگەڵ مەعریفەو رۆشنبیری زانستدا دەكەم، لەگەڵ نوسەران و چینێكی دەستەبژێری كۆمەڵگا مامەڵە دەكەم كە خوێنەر یان نوسەرە". هەر ئەو جیاوازی و خۆشویستنەیشە كە وای كردووە بۆ ماوەی 36 ساڵ، لەكارەكەی بەردەوام بێت.
رەنگە برزو لەهەموومان زیاتر هەست بەو جیاوازیە بكات، كە لەفرۆشتنی رۆژنامە و گۆڤار و كتێبدا هەیە، لەنێوان سەردەمی پێشتر و ئێستادا، ئەو نمونەیەك دەكاتە پاڵپشت بۆ قسەكانی و دەڵێت "لەكۆتایی هەفتاكان كە ناڵەی جودایی مامۆستا هێمن دەرچوو، 1000 دانەم تەنها لەسەر دەفتەری وەسڵ فرۆشت، یان بیرەوەرییەكانی عەزیز نەسین تازە دەرچوو بوو، 1000 دانەم لێهێنا بە دوو ڕۆژ نەما"
بۆ سەردەمی ئێستاش گوتی" ئێستا بەهۆی ئینتەرنێت و تەلەفزیۆن و تەكنەلۆژیا و كەناڵی زۆری پەیوەندیەوە، خەڵك كەمتر گوێ بەخوێندنەوە دەدات، جگە لەوەش خەڵك ئێستا لەجاران سەرقاڵتر و جەنجاڵترە".
كتێبفرۆشە پیرەكە كە جار جارە بەهۆی بەڕێكردنی كڕیارەكانیەوە قسەكردنی لەگەڵ ئێمە دەپچڕاند، گوتی "خوێنەری ئێستا شەوق و زەوقی جارانی بۆ خوێندنەوە نەماوە، من نمونەیەك لەسەر خۆم دێنمەوە، بڕوا بكە ئەو رۆژەی بۆ یەكەمجار كتێبی گێلەپیاوی عەزیز نەسین دەرچوو، ئێوارە بوو گەڕامەوە ماڵەوە، نانم نەخوارد هەتا هەموو كتێبەكەم تەواو كرد، بەڵام كوا ئێستا وایە".
برزو لەبارەی گرنگی خوێندنەوە قسە دەكات "رۆژێك پیاوێكی نەخوێندەوار هات، گوتی مامۆستا تۆ دنیایەك كتێبت خوێندۆتەوەو من هیچم نەخوێندۆتەوە، جیاوازی من و تۆ چیە؟، گوتم جیاوازیەكەمان زۆر ئاسانە، گوتی چیە؟ گوتم ئەوەندە هەیە من هەستم كردووە بە نەزانینی خۆم، ئەزانم كە نازانم، بەڵام تۆ نازانی كە نازانی". ئەو بەردەوام بوو لەباسكردنی ئەو گرنگیەو گوتی "بە كابرای نەخوێندەوارم گوت، كتێب ناهێڵێت من بێ ویژدانی بكەم، كتێب رێگام پێنادات پیاو بكوژم، دزی بكەم، خیانەت و ناپاكی بكەم". زیاتر گوتی "كتێب خوێندنەوە مرۆڤ دادەبڕێت لەخراپەكردن، مرۆڤ پاك دەكاتەوە لەگوناه، مێشكی مرۆڤ بەخوێندنەوە زاخاو دەدرێتەوە".
ئەوەی هەمیشە ئەو كتێبفرۆشە شانازی پێوە دەكات، ئەوەیە كە زۆركەس بەهۆی ئەو و كتێبخانەكەیەوە فێری خوێندنەوە بوون، وەك خۆی دەڵێت چەندین هاوڕێی هەیە كە پێی دەڵێن "مامۆستا ئێمە لەكتێخانەكەی تۆوە فێری خوێندنەوە بووین، ئەوە شانازیە بۆ من".
ئێستاش بەو تەمەنە زۆرەوە، لەكاتژمێر هەشتی بەیانیەوە دێتە كۆشكەكەیی و تا درەنگانێكی شەو لەوێ دەمێنێتەوە، ئەو هەست بە ماندووبوون ناكات، جەختیش دەكاتەوە كە مەگەر مەرگ لەكارەكەی ڕایوەستێنێت.
"هەتا ئەو رۆژەی رۆحم تیا بێت، دەست لەفرۆشتنی كتێب و رۆژنامەو گۆڤار هەڵناگرم"، ئەنوەر برزو ئاوا كۆتایی بە قسەكانی هێنا.