سڤیل: شوان سدیق

 "لەبەر ئەوەی پارتین بۆیە بێدەنگیمان هەڵبــــــــــژاردووە، ئەگەرنا هەموو عالەممان تێدەگەیاند"

چەند ساڵێكە لەكۆمەڵگای بەستۆرە 19 خێزان چاوەڕوانی قەرەبووكردنەوەن، ئەو خێزانانەش رەخنەی ئەوە لەلایەنە پەیوەندیدارەكان دەگرن، كە ئاوڕیان لێ نەدراوەتەوە، سەرۆكی شارەوانی ئەو كۆمەڵگایەش دەڵێ ئەو ماڵانە هەقی خۆیانە هەموو شتێكیان بۆ بكرێت.
لەگەڕەكی بەهاری كۆمەڵگای بەستۆرە، كاتێك دەچیتە ژوورەوە بینایەكت پێش چاو دەكەوێت، وا دەزانی ئەو بینایە یەك ماڵی تێدا نییە، یان باڵەخانەیەكی تێكدراوەو چاوەڕوان دەكرێت دووبارە نۆژەن بكرێتەوە، بەڵام هەموو ئەو پێشبینیانە بەپێچەوانەوەن، چونكە ئەو باڵەخانە یەك نهۆمییە پێشتر رەوزەی منداڵان بووە، ئێستاش چەند ساڵێكە یەك ژوور و دوو ژووری لێ دابەشكراوە، بەسەر 19 خێزاندا، دانیشتوانی ئەو رەوزە كۆنەش هەر خێزانێكیان بەجۆرێك پێناسەی ناڕەحەتییەكانی ژیانی رۆژانەیان دەكەن.
مەحمود محەمەد هاوڵاتیەكی دانیشتووی ئەو رەوزە كۆنەیە دەڵێت "ئێمە لەساڵی 1996 تا ئێستا لەناو ئەم بینایەین، بەڵام بەداخەوە ژیانمان، ژیانێكی تا بڵێی ناخۆش و پڕ لەكارەساتە، چونكە نە بەزستان و بەهاوین، ژیانمان نییە، ژن و ماڵ و منداڵمان تووشی دڵتەنگی بوونە لەدەست نەبوونی باخچە و شوێنی حەوانەوە".
مەحمود پێشتر دانیشتووی شارۆچكەی كەلار بووە، ئێستاش پلەی رائیدی هەیە لەسوپای چواری سەر بەفەرماندەی گشتی زێرەڤانی، وەك خۆی باسیكرد لەهەشتاكانەوە پێشمەرگەی پارتی دیموكراتی كوردستانە، ئەو چەند ساڵەش كە لەبەستۆرە نیشتەجێ بوون، بەهۆی شەڕی ناوخۆوە بووە، رائید مەحمود زیاتر لەدانیشتوانی ئەو رەوزە كۆنە قسەی كرد و گوتی "بەهۆی شەڕی پارتی و یەكێتی ئێمە هاتینە ئەم بینایە، پێشتریش جەمال مورتكە و كاكەمین كە ئەوكات بەرپرسی فەرماندەیی هەولێر بوو داوایانكرد بیناكەیان بۆ چۆڵ بكەین، بەڵام كاك فەرەیدون جوانڕۆیی بروسكەی كرد، گوتی ئەو بینایە پاسەوانی خۆمی تێدایەو هەموو خێزانەكانیش پێشمەرگەی پارتین، بۆیە نابێت چۆڵی بكەن"، رائید مەحمود كە بە مەحمود پارتیش ناسراوە، ئەوەشی گوت "لەبەر ئەوەی پارتین بۆیە بێدەنگیمان هەڵبژاردووە، ئەگەرنا هەموو عالەممان تێدەگەیاند، كە ئەوە وەزعەكەمانە، یان ئەگەر لەبەر ناسناوەكەیشم نەبوایە، بڕواتان هەبێ لەداخی ئەم وەزعە تەسلیمی یەكێتی دەبوومەوە، چونكە ئیسراحەتمان نییە".
سەبریە ئەحمەد، ئافرەتێكی دانیشتووی ئەو بینایەیە، بە پەنجە ئیشارەتی بۆ شوێنی دانیشتن و حەوانەوەی خۆیان دەكردو بە دەنگی بەرز دەیگوت "ئێمە لەساڵی 94 ئاوارەین، تا ئێستاش هەر ئاوارەم، بۆیە دەمانەوێت وەكو خەڵك ئیشێكمان بۆ بكرێت، چونكە لەپێناو پارتی هەموو شتێكمان كردووەو هەموو شتێكیشمان بەسەر هاتووە"، ئەو خاتوونە گوتیشی "شوێنی خەو و خواردن و حەوانەوەمان لێ تاڵ بووە، چونكە بەهاوین گەرمەو بە زستانیش تەڕەشوع و دڵۆپە دەكات، لەسەر ئەمەش تا ئێستا كەسێك نەبووە لێمان بپرسێتەوە، نازانین 20 ساڵە سەركردایەتی پارتی خەریكی چین، بۆ ئاوڕێكمان لێ نادەنەوە، رەفیقی ئێمە هەموو شتێكی بۆ كراوە".
ئەو بینایەی چەند ساڵێكە ئەو خێزانانەی تێدا نیشتەجێیە، پێشتر رەوزەی منداڵان بووە، بەڵام بەهۆی خراپی بیناكە رەوزەی تێدانەماوە، ئەو خێزانانەش بەهۆی نەبوونی شوێنی نیشتەجێبوون چوونەتە ناو ئەو بینایە، لە نێوان خۆیاندا ژوورەكانیان دابەشكردووە. لەئێستاشدا داواكاری ئەوان بۆ چۆڵكردنی شوێنەكەیان قەرەبووكردنەوەیانە، چونكە وەك خۆیان باسی دەكەن، هیچ شوێنێكی تریان نییە.
تەحسین مەجید هاوڵاتییەكی تری دانیشتووی ئەو رەوزە كۆنەیە، بەهەمان شێوەی خێزانەكانی تر لەسەر پارتی ئاوارە بووە و لە بەستۆرە نیشتەجێیە، تەحسین دەڵێت "دوای 16 ساڵ لەئاوارەیی و دەربەدەری لەسەر پارتی كەچی تا ئێستا هیچ ئاوڕێكمان لێ نەدراوەتەوە، چونكە خۆم و خێزانە 7 كەسییەكەم دوو ژووری بچووكمان هەیە، بە كولەمەرگی دەژین، لەبەر ئەوەی منداڵم وردە و قوتابیمان هەیە، شوێنی ئەوەمان نییە بتوانین شەو میوانێك بهێڵینەوە لای خۆمان، ئەگەر حكومەت و لایەنی پەیوەندیدار ئاوڕێكمان لێ بدەنەوە خۆ زەرەر ناكەن".
كۆمەڵگەی بەستۆرە چەند كیلۆمەترێك لەسەنتەری شاری هەولێرەوە دوورە، لەڕووی ئیدارییەوە سەر بەناحیەی سەلاحەدین- پیرمامە، دانیشتوانی ئەو كۆمەڵگەیە زیاتر ئەو هاوڵاتیانەی تێدا نیشتەجێن، كە پێشتر لەسەردەمی بەعس راگوێزرابوون و لەوێ نیشتەجێ كرابوون، لەشەڕی ناوخۆی نێوان پارتی دیموكراتی كوردستان و یەكێتی نیشتیمانی كوردستانیشدا، ژمارەیەكی زۆر لەئاوارەكانی پارتی هاوشێوەی ناوچەكانی تری هەولێر و دەوروبەری لە كۆمەڵگەی بەستۆرەش نیشتەجێ بوون.
بۆ بەدواداچوونی كێشەی ئەو 19 ماڵە سەرۆكی شارەوانی بەستۆرە (ساڵح یونس) بە "سڤیل"ی راگەیاند "ئێمە پێمانوایە ئەوان هەرچییان بۆ بكرێت، هەقی خۆیانە پێشتریش هەوڵی زۆریان داوە، هەقە قەرەبوو بكرێنەوە و دواتر لەو بینایە بگوازرێنەوە، چونكە ئەو بینایە پێشتر رەوزەی منداڵان بووە، بەڵام ئەوەی پەیوەندی بە ئێمەوە هەبووبێت بۆمان كردوون، وابزانم كتابەكانیان ئێستا لە شارەوانی هەولێرە، یان لەپارێزگایە".