سڤیل: هەولێر

خاوەنی كێلگەی پەلەوەری (راكۆ)، دوای هێنانی ژمارەیەكی زۆری كەو و فرۆشتنی لەماوەیەكی یەكجار كەمدا، ئەجارە بزنی قەتەری و مالیزی، لەگەڵ قازی ئەفریقی و مامزی ئێرانی و نەعامەی توركی هێناوە و دەشڵێ، ئەگەر حكومەتی هەرێم ئاستەنگم بۆ دروستنەكات، 20 ئەسپی قەزەمم لەئەلمانیا كڕیوە، لەگەڵ فیل و شێر و مەیمون، ئەوانەش هەمووی دەهێنم.
بەهجەت ئەحمەد، كە پێشتر ئەفسەری پۆلیس بووە بەپلەی موقەدەم، ئێستا خاوەنی كێلگەی پەلەوەری (راكۆ)یە لەنزیك گوندی (گردەڕەشە)ی سەر بەشاری هەولێر. ئەو پیاوە دوای ئەوەی لەمانگی 3ی ئەمساڵەدا 4000 كەوی لەڕێگای ئێرانەوە هێنایە كوردستان و "قازانجێكی باشی هەبوو"، لەئێستادا قازی ئەفریقی و بزنی بیانی و مامزی ئێرانی و نەعامەی توركیشی هێناوە، دەڵێت "پاش كەوەكان، بزنی قەتەری و مالیزی بەمەنەفێستی ئێرانەوە لەبۆمان دەهات، ژمارەیان 100 بزن بوو، كە ئێستا نیوەی ماوە. هەروەها نەعامەمان هێنا لەتوركیا، كە بەبچووكی دەمانهێنا و لەتەمەنی 3 مانگی دابوون، دیاربوو خەڵكێكی زۆر ئارەزووی كڕینی هەیە، ئەویش ئێستا ژمارەیەكی كەمی لێ ماوە، لەگەڵ قازی ئەفریقی، ئەوەشمان هێناوە".
وەكو خاوەنی ئەو كێلگەیەش ئاماژەی پێدەكات، بزنەكانیش كە لەوڵاتی قەتەر و مالیزیاوە هێنراون، بەلای خەڵكەوە سەرنجڕاكێش بوونە، ئەو دەڵێت "بزنەكان توانایەكی بەرگری زۆریان هەیە و ساڵانەش دووجار زاوزێ دەكەن، هەموو بزنەكانیش ئاوسن و بەدەستەواژە كوردییەكەی خۆمان، تەگەی لەنێری كێوی ئەسڵی خواردووە. واتا كارێكی جوانی لێ دەردەچێت".
لەبارەی هێنانی مامزەكان و دوورخستنەوەشیان بۆ شوێنێكی دوور لەكێلگەكە، كە ئەو هۆكارێكی بۆ بەرزی پلەی گەرما دەگەڕێنێتەوە، بەڵام نەیشاردەوە كە بەپلەی سەرەكی بەهۆكاری "چاو و زار" لەو شوێنەی لابردوون، دەڵێت "مامزەكان لەوڵاتی ئێران دەهێنین، كاریلە و داكانەن، بەڵام لەبەر ئەو گەرمایە زۆرەی، زیاتر شوێنەكەشم گونجاو نەبوو كە ئەو هەموو ئاژەڵە بەیەكەوە دابنێم، بۆیە لەناوچەیەكی دیكەم داناوە و هەركەسێك داوابكات بۆی دەگەیێنینە ئێرە و مۆڵەتە فەرمییەكەشی پێدەدەین كە بۆخۆی بتوانێت پێی بگوازێتەوە بۆ ناوشار"، لەبارەی ئەوەش كە وەك خۆی ئاماژەی بۆكرد، 8 مامز بەر لەگواستنەوەیان بۆ ئەو شوێنەی دوور لەكێلگەكە، بەهۆی چاو و زارەوە مردوون، بەهجەت ئەحمەد دەڵێت "من بڕوام بەچاووزار هەیە و واشگومان دەبەم كە ئەوان بەهۆی چاووزارەوە مردبن".
جگە لەمامزی ئێرانی، خاوەنی كێلگەی راكۆ، بەنیازە لەوڵاتی ئوردن (مامزی ریم)یش، بەڕێگای سوریاوە بهێنێتە كوردستان، بەڵام ئەو دەڵێت "ئەگەر لەسنورەكانی خۆمان كۆسپمان بۆ دروستنەكەن، چونكە ئێستا لەوڵاتی ئەلمانیا 20 ئەسپی قەزەمیشم كڕیوە، بۆیە ئەگەر ئەوان رێگام بدەن، من شێر و فیل و مەیمونیش دەهێنم".
لەبارەی قازانج و زەرەریش لەو ئاژەڵ و پەلەوەرانەی كە تائێستا هێناویەتی، ئەو سەرباری ئەوەی كە مەسروفێكی زۆری لەو مریشكە كوردیانە كردووە كە بۆ فرۆشتن رایگرتوون، دەڵێت "لەمریشكی كوردەواری زۆرم زەرەركرد، بەڵام من بەزەرەری نازانم، چونكە ئەوە ئارەزووی خۆمە و بۆ خۆشییە"، ئەوەشی گوت كە "مریشكەكان بەشێوەی سروشتی خۆیان بەخێو دەكرێن و هەندێكیان هەر لەناو كێلگەكە بەڕەلا كراون، نرخیشیان زۆر هەرزانە، جووتی مریشكی بە 25 هەزار دەفرۆشین. لەوانەیە خاوەنی كێلگەكانی مریشك فرۆشتن لێشم توڕەبن، بەڵام ئەوان مریشك بەڕۆنی بایەعی گەورە دەكەن، بەڵام ئەوانەی ئێمە ئاوی جۆگە و دانەوێڵە دەخۆن".
لەبەرامبەر ئەو زەرەرە زۆری كە لەمریشكی كوردەواری كردوویەتی، بەڵام (بەهجەت ئەحمەد) نایشارێتەوە كە لەفرۆشتنی كەوەكان قازانجێكی زۆری كردووە و دەڵێت "قازانجی كەوەكان لەهەمووی باشتربوو، چونكە یەكەم ئەزموون بوو لەهەموو عێراق، بۆیە خەڵكەكە پێشوازێكی زۆریان لەوەكردوو داواكاریەكی زۆری هەبوو، جگە لەوە نرخەكەشی مامناوەندی بوو، كوردی خۆشمان بەردەوام حەزی لەشتی شازە و ئەلحەمدولیلا لەكوردستان فەقیریش نەمایە، بۆیە دەیخوا".
نەعامەكانیش، بەوتەی خاوەنی ئەو كێلگەیە، بەخێوكردنیان زۆر ئاسانە و تەنها پێویستی بەچاودێرییەكی كەم هەیە كە بەرد نەخوات، چونكە وەك ئەو گوتی "نەعامە هەتا تەمەنی دەگاتە 7 مانگ، دەبێت لێنەگەڕێیت بەرد بخوات، لەبەر ئەوەی شپرزەی دەكات"، نرخەكەشی وەك هێمای بۆ دەكات، زۆر هەرزانە و جووتی بە 12 وەرەقەیە.
بەهجەت ئەحمەد، ئامادەیی خۆی نیشانداوە كە هەموو جۆرە ئاژەڵێك بهێنێتە كوردستان، بەڵام ئەو دڵگرانە لەئاستەنگەكانی حكومەتی هەرێم، بەتایبەتی وەزارەتی كشتوكاڵ، دەڵێت "من حەزدەكەم هەموو جۆرە ئاژەڵێك بهێنم، بەڵام بۆ ئاستەنگم بۆ دروست دەكەن؟ ئەوە دەتوانی لەوەزارەتی كشوكاڵ پرسیار بكەیت. من بەخوم چەندینجار هانم داون و گوتوومە، وەرن سەردانم بكەن و رێنماییەكانی خۆتانم پێبڵێن، بەڵام نایێن".