سڤیل:

سوتاندن و هێرشكردنە سەر مەساجەكان لەكوردستان، دەرەنجامی هاندانی چەند مەلایەك بوو، كە كاری مەساجكردن بە حەرام و فاحشە دەزانن، بەبۆچوونی چاودێرانی سیاسیش لەوەتەی رووداوەكانی بەهاری عەرەبی دەستی پێكردووە، چەند دیاردەیەك لەكوردستانەوە كۆپی دیاردەكانی بەهاری عەرەبین، سوتاندنی مەساجەكانیش هەر ئەو دیاردەیە وەك لاسایی تونسیەكانیان ئەنجام دراوە.
رۆژی هەینی 2/12/ 2011 لەشارۆچكەی زاخۆ ژمارەیەك گەنج پەلاماری سەنتەرێكی مەساج و چەند شوێنێكی مەیفرۆشتن و هۆتێلی گەشتیاریاندا و دواتر هەریەك لەشارەكانی دهۆك و قەزای سمێل و زاویتە و دێرەلوك و شاری سلێمانیشی گرتەوە. ئەو هێرشەی شارۆچكەی زاخۆ و شار و شارۆچكەكانی دیكەی كوردستان، جگە لەوەی بۆوە هۆی نانەوەی دووبەرەكی سیاسی و ئاڵۆزبوونی رەوشی هەرێمی كوردستان، هاوكات ترس و دڵەراوكێشی خستە نێودڵی هاوڵاتیانی هەرێمی كوردستان و لەزۆر شوێنی دیكە هەڕەشە لەشوێنەكانی مەیفرۆشتن و یانەی شەوانە و سەنتەری مەساج كرا.
بەو هۆیەوە لەهەفتەی رابردوو لەشاری هەولێر چەندین یانەی شەوان و دوكانی مەیفرۆشتن و سەنتەری مەساج داخرن، هێزە ئەمنیەكانی هەرێمی كوردستان بۆ پاراستنی ئەو شوێنانە و تەشەنە نەكردنی بابەتەكە رێوشوێنی توندی ئەمنیان گرتەبەر. لەبارەی زیانەكانی ئەو رووداوانە، هێرش ئەحمەد سەرۆكی كۆمەڵەی میوانخانە و جێشتخانەكانی كوردستان لە لێدوانێكی بۆ سڤیل وتی "بەهۆی پشێوییەكانی دەڤەری بادینان 25 شوێن زیانیان بەركەوتووە، كە هەندێكیان سوتێندراون و هەندێكیشیان تێكدراون و بریتین لە 20 شوێنی مەیفرۆشتن و هۆتێلی گەشتیاری و كۆشكێكی گەشتیاری و یانەی رۆشنبیری (نوهەدرا) لەشاری دهۆك، كە شوێنێكی مێژوویی بووە و لەسەردەمی مەلەكیەوە دروستكراوە، هەروەها سەنتەرێكی مەساج لەزاخۆ و سەنتەرێك لەسلێمانی سووتێنراون". هەر لەلێدوانەكەیدا هێرش ئاماژەی بەوە كرد، بەهۆی ترسی هێرشكردنە سەریان ئێستا زۆرەبەی سەنتەرەكانی مەساج لەشارەكانی كوردستان داخراون، ئافرەتە بیانیەكانیش لەشوێنی ئارام دانراون، بۆ ئەوەی خەڵك پەلاماریان نەدات.
یەكێك لەو ئافرەتە عەرەبانەی لەیەكێك لەسەنتەرەكانی مەساج كاری دەكرد، باسی لەنهێنی كارەكەی دەكات و دەڵێ "ئێمە لەسەرەتا كارەكانمان تەنها بۆ بیانییەكان بوو، چونكە ئەوان لەمەساجكردن راهاتوون و لەو كەلتوورە تێدەگەن، دواتر خەڵكی كوردستان روویان لەسەنتەرەكانی مەساج كرد، بۆیە ژمارەی سەنتەرەكان زیادی كرد و هەر خەڵكی كوردستانیش ناو و ناتۆریان لەپیشەكە نا". ئەو ژنە باس لەپیشەكەی دەكات و دەڵێ "من لە بەیروت راهێنانم لەسەر مەساجكردن كردووە، فێری ئەخلاقیاتی ئەو پیشەیە بووم، لەزۆر وڵاتیش كارم كردووە، بەڵام لەكوردستان شتێكی سەیرم بینی، لەهیچ شوێنێك بەقەد كوردستان ئێمەیان بە لەشفرۆش نەزانیوە".
ئەو ئافرەتە رەتیدەكاتەوە كاری لەشفرۆشی كردبێت دەڵێ "باس لە نهێنییەكانی كارەكەم دەكەم" ئەو لەسەر قسەكانی بەردەوام دەبێ و دەڵێ "ئێمە لەهۆڵێكدا كاردەكەین، چەندین ئافرەتین، لەو هۆڵەدا پێنج تەخت هەیە، كە موشتەریەكان لەسەر مەساج دەكەین، نێوانی ئەو تەختانە بەپەردەیەكی قوماش جیاكراوەتەوە، واتە هەر جوڵەیەك و هەر دەنگێك ئەوەی تەنیشتت هەستی پێدەكات، من دەپرسم ئایا دەكرێت لەشوێنێكی ئەوها كاری لەشفرۆشی بكرێت؟ یان هەندێك خاوەن مەساج هەن، كە موسڵمانن و دابونەریت رێگەیان پێنادات خاوەنی شوێنێك بن كاری لەشفرشی تێدا بكرێت، بۆیە ئەو خاوەن سەنتەرانەی مەساج كامێرای چاودێریان بەسەر ئافرەتەكانەوە داناوە، جا لەو كاتە موشتەرییەكانیش قبوڵ ناكەن رابوێرن". ئەو ئافرەتە نكۆڵی لەوە ناكات، كە خەڵكانێك هەبن بۆ سێكس سەردانی ئەو مەساجانە بكەن، ئەو وتی"خەڵك هەیە نەخۆشە دێت مەساج دەكات، هەندێكیش گەنجن بۆ سێكس دێن، كە دەزانن نییە دەگەڕێنەوە، یان هەوڵی تەحروش دەدەن، بەڵام ئەوكات لەلایەن ئیدارەی مەساجەكەوە دەردەكرێنە دەرەوە، خۆشتان دەزانن تەحەروش تەنها لە مەساج نییە، لەشوێنی تریش ئەنجام دەدرێت".
جەمیلە مەهدی بەرپرسی پەیوەندیەكانی (ڤان رۆیال هۆتێل) كە یەكێكە لە هۆتێلە بەناوبانگەكانی شاری هەولێر، رەتیكردەوە لەناو هۆتێلەكەیان لەپەنای مەساج كاری لەشفرۆشی بكرێت و دڵنیایی خۆشی دەربڕی لەرەوشی ئەمنی شاری هەولێر، بەڵام نەیشاردەوە، كە دوای رووداوەكانی بادینان چاودێری خراوەتە سەر هۆتێلەكەی خۆیان، ئەویش بۆ پاراستنی میوانانی ناو هۆتێل و هەبوونی حاڵەتی نەخوازراو. ئەو خانمە گوتیشی "لەناو هۆتێلەكەی ئێمەدا دوو یانەی خواردنەوە و مەساجیشی تێدایە، بەڵام تائێستا حاڵەتێكی خراپ رووینەداوە، راستە ئەو كەسەی كاری مەساج لای ئێمە دەكات ئافرەتێكی بیانیە، بەڵام كاری مەساج پیشەیە و هەر میوانێك بیەوێ مەساج بكات ئافرەتەكە لەشوێنی خۆی نایەتە دەرەوە، باوەڕناكەم ئەوەی لەشارەكانی دیكەی هەرێمی كوردستان روویدا، لەهەولێر رووبدات، ئێمەش باوەڕمان بەهێزەكانی ئەمنی هەولێر هەیە كە هیچ لەو بارەیەوە روونادات، لەگەڵ ئەوەشدا لای خۆمان چاودێری هۆتێل دەكەین، چونكە زۆرینەی میوانانی ئێمە لەكۆمپانیاكانی نەوت و شاندی بیانین، لەگەڵ ئەو هەموو میوانە بیانەی رۆژانە و شەوانە لەناو هۆتێل دەمێننەوە، جار هەیە باڵیۆز و بەرپرسی زۆر گەورەش دێنە لامان، بەڵام هیچ لەخۆمان ناترسین".
لەبارەی چاودێریكردنی ژووری مەساج بۆ ئەوەی بۆ كاری خراپ بەكار نەهێندرێت، جەمیلە مەهدی گوتی " ئەو شوێنەی مەساجی تێدا دەكرێت دەكەوێتە بەرامبەر مەلەوانگەی هۆتێل، نە شوێنێكی داخراوە و نە كراوەیە، كارمەندێك لە مەلەوانگە دانراوە، ئافرەتی مەساجكردنەكە تا رادەیەك لێی دیارە، راستە زۆر بەروونی نایبینێت، بەڵام بایی ئەوەندە هەیە بزانێت ئافرەتەكە چی دەكات".
چاودێرێكی سیاسی كە نەیویست ناوی بێت لەبارەی مەساجەوە وتی "ئەوە پیشەیەكی كۆنە، تەنانەت لەسەردەمی عوسمانیەكانیش لەلایەن حەمامچیە توركەكان ئەنجام دەدرا". ئەو چاودێرە لەبارەی سوتاندنی مەساجەوە دەڵێ "ئەو دیاردەیە لەچەند وڵاتێكی عەرەبی روویدا، لەوانە تونس كە بەهاری عەرەبی لەوێ دەستی پێكرد، بۆیە ئێستا كەسانێك هەن بیركردنەوەی سیاسی ئیسلامییان هەیە و لاسایی ئەوان دەكەنەوە و مەساجەكان دەسوتێنن".