سڤیل: رێبوار رەزاچوچانی

سەعدی ئەحمەد پیرە، ئەندامی یەدەگی مەكتەبی سیاسی یەكێتی و بەرپرسی مەڵبەندی بادینانی ئەو حیزبە، لەو دیمانەیەدا لەگەڵ (سڤیل) باس لە پەیوەندییەكانی یەكێتی و پارتی و چەند پرسێكی تری تایبەت بە هەرێمی كوردستان باس دەكات.

سڤیل: ئەو رووداوانەی لەناوچەكەدا روو دەدەن، چ كاریگەرییەكیان دەبێت، بەسەر بارودۆخی سیاسی هەرێمی كوردستانەوە؟
سەعدی پیرە: دەبێت بڕوامان بەوە هەبێت، كە ئەگەر بایەكی كەمیش بێت چ سارد یان گەرم، كاریگەری دەبێت بەسەر هەرێمی كوردستانەوە، بە دڵنیاییەوە بارودۆخەكانی ئێستای ناوچەكە و وڵاتانی عەرەبی، كاریگەری دەبێت بەسەر هەرێمی كوردستانەوە، لەمەودوا نابێت كەس لافی ئەوە لێبدات كە چەند هێزی هەیە و چەند بەهێزە و چەند دەوڵەمەندە و چەندی ئیمكانییات هەیە، چونكە ئەو گۆڕانكارییانەی لە باكوری ئەفریقا روویاندا، لە بێهێزیدا نەبوو، بۆیە ئەمە سەلماندی كە هەموو شت لەباریكیدا دەپچڕێت، بەڵام دەسەڵات لەئەستووری دەقرتێت.
سڤیل: بەڵام بەرپرسانی پارتی و یەكێتی، وا هەست ناكەن كە كاریگەری بەهاری عەرەبی لەسەر هەرێمی دەسەڵاتی ئەوانیش دەگرێتەوە، چونكە ئەمە بڕوای ئۆپۆزسیۆنیشە، من زیاتر مەبستم ئەمەیە، ئایا پێتانوایە كاریگەری هەیە؟
سەعدی پیرە: دەبێت هەڵسەنگاندنت بۆ بەرانبەرەكەت هەبێت، هەرێمی كوردستان ئەمەی لەسەر تەتبیق نابێت، چونكە لەهەرێمی كوردستان لایەنێك نەهاتووە بەهێز خۆی بسەپێنێت، تەنانەت ئەوانەی كە لەیەكتر جیا دەبنەوە مافی ئەوەیان هەیە حیزب دروست بكەن و بێن داخیلی پەرلەمان ببن، بۆ نمونە بزووتنەوەی گۆڕان لەیەكێتی جیابووەوەو بەشداری هەڵبژاردنیش بوو، 25 كورسیشی هێنا، ئیتر چ پێویستی بەكودەتا و بەكارهێنانی هێز هەیە؟ یەكگرتووی ئیسلامی لەسەرەتای نەوەتەكانەوە بەناوی جیاجیا كاری كردو پاشان چالاك بوو، زەمینەیەك هەیە بۆ ئەو بۆچوونە، ئەگەرچی گروپی جیاجیاشن، داخڵی هەڵبژاردنەكان دەبێت و دەنگیش دێنێت و لەپەرلەمانی عێراق و كوردستانیش كورسی هەیە. هەروەها كۆمەڵ، بۆیە پێموایە ئەم بارودۆخەی ئەمڕۆ لەهەرێمی كوردستان هەیە، لەگەڵ هەموو ئەو ناكۆكی و ناتەباییەی هەیە، ناكرێ بەراورد بكرێت بەوەی لەمیسردا روودەدات، یەكەم: چونكە لەوێ تەنانەت ئیخوان موسلمینەكان و ئیسلامیەكانی تر كە 60%ی دەنگەكانیان هێنا لەهەڵبژاردنێكی ئازاددا، سەردەمی حوسنی موبارەك تەنانەت یەك كورسیشیان پێ رەوا نەدەدیتن. ئاخر ئەمە فەرقێكی زۆر گەورەیە گەر بتەوێ ئەوە بگوازیتەوە بۆ هەرێمی كوردستان. دووەم: ئەوەی لەهەرێمی كوردستاندا هەیە مەسەلەكە ئەوە نیە ئۆپۆزسیۆن ئازادیەكانی زەوت كرابێت، كێ لەئۆپۆزسیۆن گیراوە لەسەر ئەوەی ئۆپۆزسیۆنە؟
سڤیل: بەڵام ئەوان باس دەكەن كە خەڵكی نانبڕاویان هەیە؟
سەعدی پیرە: نانبڕاو نیە، كاكە تۆ دەبێ خوردی بكەیەوە، كێ لەئۆپۆزسیۆن گیراوە لێرە لەسەر ئەوەی ئۆپۆزسیۆن بووبێت؟ بەڵام كەلتووری ئۆپۆزسیۆن جیاوازە. ئێمە لەكوردستان دوو حزبمان هەیە، كە بەئیستحقاقی هەڵبژاردن دەسەڵاتدارن، چەند حزبێكی تریشمان هەیە دیسان بەئیستحقاقی ئینتیخابی و بەئیرادەی ئازادی خۆیان ئۆپۆزسیۆنبوونیان هەڵبژاردووە، ئەگینا دەعوەت كرابوون بێن بەشداری حكومەت بكەن. ئۆپۆزسیۆن ئیشی ئەوە نیە دوژمنایەتی بكات، ئیشی ئەوەیە مونافەسە بكات.
سڤیل: بەڵام ئەمەی كوردستان كامیانە؟
سەعدی پیرە: ئەوەی كوردستان جاری وا هەیە قاڵبی توندوتیژ بەخۆیەوە دەبینێت، تۆ بتەوێت لەرێگای چالاكیە مەدەنیەكان خەڵك وشیار بكەیەوەو بیهێنیە سەر جادە و كەموكوڕیەكانی دەسەڵات دەربخەی، دەست بۆ شەڕەبەرد نابەی، ئەوە كەلتوورێكە چەند ساڵێك لەمەوپێش لەنێوان ئیسرائیلی و فەڵەستینیەكاندا هەبوو، خۆ ئەم وڵاتە هی یەكگرتووی ئیسلامی و هی گۆڕان و هی كۆمەڵ نیە، پارتی و یەكێتی خەڵكی داخڵ كردبێت، ئێمە هەموومان حزبین و كوردین و یەك میللەتین، بۆیە ئەم شەڕەبەردە لێرە جێگای نیە، چونكە ئەمە لەچالاكی مەدەنی دەردەچێت.
سڤیل: بەڵام ئێوە وەك یەكێتی كە پێكهاتەیەكی سەرەكی دەسەڵاتن لەكوردستان، تا چەند خۆتان ئامادە كردوە بۆ مامەڵەكردن لەگەڵ ئەم گۆڕانكاریانە، بەجۆرێك كە زیاتر گرژی بەخۆیەوە نەبینێت؟
سەعدی پیرە: ئێمە پێمانوایە مەسەلەی ئازادیە دیموكراتیەكان و مافی خۆپێشاندان و مافی رەخنەگرتن و قەڵەم و رۆژنامەی ئازاد بەڵا نین، بەڵكو دەسكەوتی گرنگن و خەباتیان لەپێناو كراوە، بزووتنەوەی دیموكراسیخوازی گەلی كوردستان جا هەر لایەنێك بووبێت دەیان ساڵ خەباتی بۆ ئەوە كردووەو لەگەڵ رژێمەكانی عێراقیشدا گفتوگۆی هەر لەسەر ئەم بابەتانە بووە، بەردانی هەموو زیندانیە سیاسیەكان و ئازادی بیروڕا دەربڕین و ژیانی پەرلەمانی و حوكمڕانی دیموكراتیانە، بۆیە ئەمانە دەسكەوتن، ئەوەی پێیوابێت ئەمانە بەڵان، ئەوا لەسەردەمێكی تر و لەكەوكەبێكی تر دەژی. یەك شت دەمێنێتەوە، ئێمە بە قۆناغی جیاجیادا تێپەڕیوین لەخەباتی چەكداری و سەرەتای راپەڕین و بڕیاری یەكەم هەڵبژاردن، كە دەبێ ئەم فەزڵە بۆ بەرەی كوردستانی تۆمار بكرێت بۆ ئەو بڕیارەی دای، چونكە ئەوكات كەس باوەڕی نەبوو، كۆمەڵگای نێودەوڵەتی بەتایبەتی وڵاتە گەورە هەرێمایەتیەكان رێگا دەدەن لەهەرێمی كوردستان دامەزراوەی پەرلەمان هەڵبژێردرێت و حكومەت دروست بكات، ئەمانە بڕیاری بوێرانە بوون، ناڵێم تەنها بۆ یەكێتی و پارتی بەڵكو بۆ هەموو لایەنەكانی تر، هەركەسە و بە حەجمی خۆی بەشێكی ئەو بەرپرسیاریەتەی خستە سەرشانی خۆی. پاشان قۆناغی شەڕی ناوخۆ دەستیپێكرد، كە بەداخەوە تا ئەو جێگایە هات ئیدارە بكاتە دووبەش.
بۆ بنبڕكردنی ئەم شەڕی ناوخۆیە، تا جارێكی تر هەموو رەنجی كورد بەهەدەر نەدات، یەكێتی و پارتی داخڵی رێكەوتنامەی ستراتیجی بوون، كە رێكەوتنامەیەكە نە پارتی لەبەرخاتری یەكێتی و نە یەكێتی لەبەرخاتری پارتی ئیمزای نەكردووە، هەردوولا پێویستیان بەم رێكەوتنامەیە هەبووە، چونكە لەقازانجی میللەتی ئێمەیە شەڕ و ئاژاوە لەنێوان پارتی و یەكێتی نەبێت، ئەمەش صەممامی ئەمانە بۆ جارێكی روونەدانەوەی شەڕی ناوخۆ. رەنگە لێرەو لەوێ كادیرێكی پارتی و یەكێتی بێ ئەوەی زۆر دوور بیربكاتەوە، ئەم رێكەوتنە بخاتە ژێر نیشانەی پرسیارەوە. بۆ نمونە كادیرێكی پارتی لەگەرمیان دەمێكە چاوەڕێیە عەرزەیەك وەرگرێ، نایدەنێ، دەڵێ ئەم رێكەوتنە ستراتیجیە وایكردووە. كادیرێكی یەكێتی لەهەولێر یا دهۆك چاوەڕێیە عەرزەیەك وەرگرێ، جیرانەكەی سێ چوارێكی وەرگرتووە، یا مامۆستایەكە و لەهەموویان زیرەكترەو خزمەتی زیاترە، كەچی ئەو ناكەنە بەڕێوەبەر و جێگری بەڕێوەبەر، بەڵكو یەكێكی زۆر لەو خوارتر دەكەن، ئەمانە هەمووی كاریگەری هەبووەو پێویستە ئەم دیاردانە نەمێنن، ئێمە لەدواین كۆبوونەوەی هەردوو مەكتەبی سیاسی بە ئامادەبوونی هەردوو سەرۆك مام جەلال و سەرۆك بارزانی، بڕیاری ئەوەماندا كە ئەو كێشانە چارەسەر بكرێت و شوێنەواری دوو ئیدارەیی نەمێنێت، هەروەها دەبێ چارەسەری كێشەی گەنجانی كچ و كوڕ بكەین و كاریان بۆ بدۆزینەوە، ناكرێ لەپڕۆژەی عیملاق پارەی زۆر سەرف بكەین، لەكاتێكدا گەنجەكانمان بێكارن، چونكە ئەمە خۆی لەخۆیدا دەبێتە ئامانجێك بۆ نەیارەكانمان كە سوودی لێ وەربگرن.
سڤیل: زۆر جار بەرپرسانی پارتی باس لەوە دەكەن، كە ئەم رێكەوتنە ستراتیجیەی نێوان پارتی و یەكێتی پەیوەستە بەجەنابی مام جەلالەوە، پرسیار ئەوەیە بۆچی رێكەوتنی نێوان دوو حزب پەیوەست بێت بە دوو سەركردەوە؟
سەعدی پیرە: ئەمە بۆچوونێكی هەڵەیە، ئێمە كە باس لەیەكێتی دەكەین، واتە مام جەلال و هەموو مەكتەبی سیاسی و سەركردایەتی و مەڵبەندەكان و كادیرەكانیش. بۆ ئێمەش كە دەڵێین پارتی، واتە جەنابی كاك مەسعود و مەكتەبی سیاسی پارتی و سەركردایەتی و تادوایی، ئێمە قەت هێندە بێ زەوق نابین بڵێین لەبەر خاتری كاك مەسعود، نەخێر ئێمە دوو حزبین، كاك مەسعود حورمەتی هەیە، سوپاسی پارتیش دەكەم كە رێز لەمام جەلال دەگرێت، بەڵام دەبێ رێز لەمام جەلال بگرێت وەك سكرتێری گشتی یەكێتی نیشتیمانی كوردستان، تەبیعی خۆی وەك كەسایەتی مام جەلال حورمەتی خۆی هەیە، بەڵام مام جەلال خۆی هەموو جار دەڵێت گەر من سكرتێری یەكێتی نەبم، دەبمە محامی جەلال حیسامەدین تاڵەبانی و رەنگە دوو پۆلیس بێن بمگرن، بەڵام من بۆیە ئەم جەلال تاڵەبانیەم چونكە سكرتێری حزبێكی عیملاقی وەك یەكێتیم كە خاوەنی هەزاران شەهیدە. من پێموانیە نە پارتی و نە یەكێتی بۆ تاكەكەس هێندە سەخی تەبیعەت و دەستكراوە بن، گەر مەوزوع بەرژەوەندی هاوبەش نەبێت، نەخێر ئێمە رێكەوتنەكەمان لەسەر بنەمای بەرژەوەندی هاوبەشە.
سڤیل: ئێستا لەلێدوانی بەرپرسانی یەكێتی و پارتی هەست بەوە دەكەی ساردییەك لەنێوان پارتی و یەكێتیدا هەیە، هۆكاری ئەم ساردییە چیە؟
سەعدی پیرە: لەچیدا بەدی دەكرێت ئەم ساردیانە؟
سڤیل: بۆ نمونە پارتیەكان باس لەوە دەكەن، كە یەكێتی لەهەندێك هەڵوێستیدا پشتیان تێدەكات، یەكێتیەكان باس لەوە دەكەن، كە پارتی پشتی كابینەكەی دكتۆر بەرهەمی نەگرتووە؟
سەعدی پیرە: ئێمە دوو حزبی جیاوازین، كەسیشمان كلكی ئەوی ترمان نین، دوو حزبین لەسەر بنەمای رێكەوتنێكی شەفاف پێكەوە كار دەكەین، رێز لەیەكتر دەگرین، قۆناغێكی دوورودرێژی خەباتی هاوبەشمان هەیە، لەدوو سەنگەری جیاوازیش بووبین، بەڵام ئاڕاستەی خەباتمان بەرەو یەك ئامانج بووە، كە گەیشتن بووە بە رۆژێكی وەك ئەمڕۆ. نە یەكێتی و نە پارتی نابێ وەك ئەو حزبە كارتۆنیانەی دروستی دەكەن مامەڵە لەگەڵ یەكتر بكەن.
سڤیل: بۆ پێت وایە حزبی كارتۆنیان دروست كردبێت؟
سەعدی پیرە: ئەیچۆن. من ناو ناهێنم، ئەو حزبانەی پارتی و یەكێتی دروستیان دەكەن و كارتۆنین، نابێ مامەڵەیان لەگەڵ یەكتر وەك مامەڵە لەگەڵ ئەم حزبانە وابێت. ئێمە دوو حزبین لێرە و لەوێ رای جیاوازمان دەبێت، بەڵام لەچوارچێوەیەك یەكترمان گرتۆتەوە، كە بەرژەوەندی باڵای خەڵكی كوردستانە. ساردی لەوێدا نایەت، لەناو بازاڕی یەكێتی ئەزمەی حزبێكی تر بازاڕی نیە تەسدیر بكرێت، هەروەك لەناو بازاڕی پارتیش ئەزمەی حزبێكی تر بازاڕی نیە تا تەسدیر بكرێت. بۆیە باشترە بگەڕێینەوە سەر عەردی ساغ و تەعامولمان لەگەڵ یەكتر بەرێزگرتنی بەرامبەر بێت. ئەوانەی ئەم جۆرە قسانە دەكەن، باوەڕ ناكەم لەیەكێتی و پارتی بەرپرسیاریەتی سەرەكیان هەبێت و وا بیر بكەنەوە، بەڵام پێتوایە دەبێ كوردستانی نوێ و خەبات و ئەلئیتیحاد وەك یەك بنوسن؟! جگە لەوە پێویستە ئێمە لەئەنساتەكانیش وریا بین، ئێمە لەناوخۆماندا ئەنساتمان هەیە جۆرێكە لەتەداولی مەحدود و تەنیا بۆ چەند كادیر و بەرپرسێك دەچێت لەسكرتێری گشتی و مەكتەبی سیاسی و سەركردایەتی، برایانی پارتیش ئەوەیان هەیە، پێویستە لەناوەڕۆكی ئەمانەش وریا بین. ئەو بابەتانەی لێرە و لەوێ لەسەر پارتی دەنوسرێت، لەئەنساتی یەكێتی قەت جێگای نابێتەوە بینوسین و بڵاوی بكەینەوە، تەسەور دەكەم لەناو ئەنساتی پارتیش ئەم شتانە هەبن، ئەو شتانەی دژ بە یەكێتی لەهەر شوێنێك بڵاو بكرێتەوە لەنێو ئەنساتی ئەواندا جێگای نەبێتەوە، لەشوێنێك بڵاوكراوەتەوە ئەوا ئازادە چی دەنوسێت، بەڵام من نابێ پەرەی پێبدەم وەك دەسكەوتێكی گەورە، وەك ئەوەی هەنگم لەدارا دۆزیبێتەوە و بڵاوی بكەمەوە.
سڤیل: ئێوە وەك یەكێتی هەست بەوە دەكەن، كە پارتی وەك پێویست مامەڵەی لەگەڵ كابینەی شەشەمی حكومەتدا نەكردبێت، كە دكتۆر بەرهەم سەرۆكایەتی دەكات؟
سەعدی پیرە: كابینەی پێنج كابینەی یەكگرتنەوەی هەردوو ئیدارە بووە، راستە ئیرادەی هەردوو حزب لەگەڵی بووە، بەڵام حیكمەت و پشووفراوانی كاك نێچیرڤان نەبایە، رەنگ بوو ئەنواعی كێشە و تەنگەژەی توش دەبوو، بەسەرخستنی ئەم كابینە و یەكگرتنەوەی ئەم دوو ئیدارەیە و هێنانی تا كۆتایی دەورەی كابینەی پێنجەم فەزڵێكی گەورەی تۆماركرد، چونكە كارێكی زەحمەت بوو پاش ناكۆكی و شەڕێكی خوێناوی لەنێوان هەردوولا، كابینە لەپڕۆسەیەكی دوورودرێژدا یەك بگرێتەوە، كە چەند ساڵ دەخایەنێت و ئێستاش بەردەوامە، بێ تەگەرە ئەمە ببەیە پێش، ئەوا كارێكی گرنگ بوو ئەنجامی دا. كابینەی شەشەم تەكمیلەی كابینەی پێنجەمە، كابینەی حەوتەم كە دێت، تەكمیلەی كابینەی شەشەم دەبێت، ئەوانەی دەبنە سەرۆكی حكومەت لەچوارچێوەی رێكەوتننامەی ستراتیجی بەپێی ئیستحقاقاتی ئینتیخابی خۆ بەكودەتا نایەن، لەبەر ئەوەی كابینەی پێشوو خراپ بووبێت ئەمە هاتبێت، نەخێر ئەمە رێكەوتننامەیەكە پڕۆسەی حوكمڕانی بەم شێوەیە دەستنیشان كردووە. من كارم بەوە نیە كادیرێك لێرە و لەوێ قسەیەك بكات، بەوەی پێیوایە كارێكی باش دەكات گەر ستایشی كابینەی پێنجەم یا شەشەم بكات، من پێموایە ئەمە ئیشتیباهێكی گەورەیە. كابینەی پێنجەم دەبێ لەبارودۆخی مێژوویی خۆی هەڵبسەنگێندرێت، وەك یەكەم كابینەی دوای یەكگرتنەوەی هەردوو ئیدارە، ئیدارەیەكی زۆر باشی كردو سەركەوتوو بوو، كابینەی شەشەم كابینەیەكە وەك ئیعلانی كردبوو كابینەی خزمەتگوزاری دەبێت، دونیایەك شاكاری ئەنجام داوە، تواناسازی و بیمەی بێكاری و سلفەی زەواج و سلفەی عەقار و تادوایی، هەموو پڕۆژەكانی كابینەی شەشەم خۆ لەزەمانی ئەو كابینەیە تەواو نابێت، هەندێك پڕۆژە هەیە رەنگە بكەوێتە كابینەی حەوتەم، مانای وانیە ئەو كارە كابینەی شەشەم نەیكردووە، رەنگە بەشێك لەكارەكانی كابینەی حەوتەمیش بڕوات بۆ هەشتەم، وەك چۆن بەشێكی كابینەی پێنجەم هاتووە بۆ شەشەم و ئێستا تەواو دەبێت، بۆیە ئەم جۆرە پێكەوە كاركردنە، تەكمیلكردنی یەكترە، نەوەك تەفنیدی یەكتر بكەن.
سڤیل: لەگۆڕانكارییەكانی حكومەت باس لەوە دەكرێت، كە یەكێتی چوار لەوەزیرەكانی خۆی دەگۆڕێت، باس لەوەش دەكرێت كە دەرباز كۆسرەت دەكرێت بەوەزیری ئاوەدانكردنەوە، ئەم گۆڕانكاریانە لەسەر چ بنەمایەك دەكرێت؟
سەعدی پیرە: ئێمە هیچ قسەیەكمان نەكردووە، نە لەسەر جێگری سەرۆك وەزیران و نە لەسەر گۆڕینی وەزیرەكان، لەكوێ ئەم هەواڵە بڵاوبۆتەوە؟ كەسێك بۆ خۆی ئەم قسەیەی كردووە، ناكرێت بكرێت بە رای رەسمی یەكێتی، تا ئێستا باسی ئەو شتانەمان نەكردووە، ئێمە لەوەزیرەكانی خۆمان رازین، كەسایەتی لێوەشاوە و شایستەن، پاشان كە ئەو خەڵكە دەگۆڕدرێت لەبەر ناشایستەیی ناگۆڕدرێن، بەڵام كێ دەڵێ لەدابەشكردنەوەی وەزارەتەكان ئەم وەزارەتانە دەبن، كێ دەڵێ وەزارەتەكان ناگۆڕدرێن، زۆرجار وابووە، پێشتر وەزارەتی پێشمەرگە هی پارتی بوو و ناوخۆ هی ئێمەبوو، پاشان ناوخۆ بوو بە هی پارتی و پێشمەرگە بوو بە هی یەكێتی.
سڤیل: مەلا بەختیار لەچاوپێكەوتنەكەی لەگەڵ كەناڵی گەلی كوردستان باسی لەوە كرد، كە جۆرێك لەنزیكبوونەوە لەنێوان گۆڕان و یەكێتی هەیە، ئەم نزیكبوونەوانە بە چ ئاستێك گەیشتوون؟
سەعدی پیرە: بزووتنەوەی گۆڕان فەرقی هەیە لەگەڵ یەكگرتوو و كۆمەڵ، گۆڕان بەشێكی زۆری كادیرەكانی لەنێو هەناوی یەكێتیەوە دەرچوونە، ژمارەیەكی زۆر لەقاعیدەی گۆڕان كادیر و چالاكوانی یەكێتی بوونە، تەنانەت دۆستایەتی و رەفاقەتیشان هەیەو ئێستاش دۆستی یەكین و مەرحەبای یەكتر دەكەین و هاموشۆی یەكتر دەكەین و یەكتر دەبینین، جگە لەكەناڵی فەرمی، ئەمانە پەیوەندین لەدەرەوەی كەناڵی فەرمی، بۆ نمونە من لەگەڵ ژمارەكی زۆر لەئەندامەكانی سەركردایەتی ئەوان رەفیقی شەخسیم، رەفیقی 20-25 ساڵ، جا لەبەر ئەوەی ئەوان لەیەكێتی دەرچوون و رێكخراوێكیان دروست كردووە قیامەت هەڵستاوە؟ ئەوە تەبیعیە و ئەو پەیوەندیانەشمان هەر ماوە. لەلایەكی تریشەوە گۆڕان وەك بزووتنەوەیەك كە لەیەكێتی جیابوونەتەوە، لانیكەم بەشێكی زۆر لەبەرپرسەكانی لەژێر فشاری ئەوەدا بوونە، لەساڵی یەكەم و چەند مانگی یەكەم هەمیشە هەوڵ بدات پاساو بۆ ئەوە بهێنێتەوە، كە بۆ جیابۆتەوە، ئەی نابێ شەرعیەت بەجیابوونەوەكەی خۆی بدات؟ ئێمە هەموو بچووك و گەورەیەك بەداوەوە ناكەین، رەنگە زۆر شت هەبێت راست بێت و هەشبێت راست نەبێت، هەموو ئەو شتانە ناكەین بەئەساس بۆ پەیوەندی، چونكە ئەوان لەپەرلەمانی كوردستان و عێراقیشدا هەن، ئەگەر مەرحەبای یەكتریش نەكەین، خۆ هەڤاڵەكانی ئێمە و گۆڕان لەنێو پەرلەمان بەیەكەوە دادەنیشن، ئێمە لەسەر بنەمای لێدوانی تاكەكەسێك كە كەمێك بەرز دەفڕێ یان نزم دەفڕێ، پەیوەندیەكانمان دیاری ناكەین، ئێمە خیلافاتی عەشایەریشمان نیە لەگەڵ گۆڕان، خیلافاتی سیاسیمان هەیە.
سڤیل: بۆچی تا ئێستا لەدوای دامەزراندنی بزووتنەوەی گۆڕانەوە دیداری نێوان مام جەلال و نەوشیروان مستەفا رووی نەداوە؟
سەعدی پیرە: رەنگە پێویست نەبووبێت، هەردەمێك پێویست بێت خۆ كارێكی هێندە زەحمەت نییە.
سڤیل: كەواتە ئەوان نێوانیان هەیە؟
سەعدی پیرە: نێوان چیە، كاك نەوشیروان تەڵەبەی مام جەلالە، یەكێك لەدۆستەكانی مام جەلال بووە بە درێژایی 35-40 ساڵ، پێموایە لەسیاسەت (هەرگیز نابێ) نیە.
سڤیل: یانی ئەم جۆرە جیابوونەوەیە كاریگەری لەسەر پەیوەندی شەخسی نێوان ئەم دوو كەسە دانەناوە؟
سەعدی پیرە: بەدڵنیاییەوە كاریگەری هەیە، چۆن نیەتی، هەر كەس توشی جۆرێك لەسەدمە دەبێت، بۆ وایكرد و بۆ واینەكرد، بەتایبەت لەنێوان ئەم دوو كەسایەتیە، بەڵام ئەمە مانای وانیە كۆتایی دونیایەو ئیتر هەرگیز یەكتر نابیننەوە.