سڤیل: هەولێر

ئێمە ویستمان بەجەماوەری خۆمان پشتێنەی ئەمنی بەدەوری لقی چوار دروست بكەین، بەڵام ئاسایشی سلێمانی پێی باش نەبوو

كاتێك هەزاران بەرد هاتنە ژوورەوە، هەموو دوعامان دەكرد هێزێك فریامان بكەوێ، بەردەوام تەلەفۆنم دەكرد بۆ هەموو لایەك لەسلێمانی، كەس فریامان نەكەوت

لەو كاتانەی هێرشمان لەسەر بوو، فەرمانكردن بەچۆڵكردنی بارەگا ئەگەر لەسەركردایەتی حیزبیشەوە پێم گوترابا، قبوڵم نەدەكرد

سڤیل: 10 مانگ بەسەر رووداوی 17ی شوباتدا تێپەڕیوە، ئەم رووداوە چۆن دروست بوو؟
هیوا ئەحمەد: شەوی 16- لەسەر 17ی شوبات، لەلایەن بەڕێز بەڕێوەبەری ئاسایشی سلێمانییەوە، ئاگاداری كاك وشیار سدیق ئەفەندی، بەرپرسی پەیوەندییەكانی لقی چوار، كە بەرپرسی كوتلەی پارتیشە لەئەنجومەنی پارێزگای سلێمانی كرابوو، ئەویش ئاگاداری منی كرد، گوتی مودیری ئاسایش تەلەفۆنی كردووە، بەپێی زانیاری بڕواپێكراو بەیانی خۆپێشاندان لەبەر دەركی سەرا دەستپێدەكات و هەموو ئاماژەكان وا پێشاندەدەن هێرش بكرێتە سەر لقی چوار، ئێوە وریای خۆتان بن، بەڵام خەمی هیچتان نەبێ، ئێمە پارێزگاریتان لێ دەكەین و ئیحتیاتی خۆشتان بكەن.. هەر ئەوشەوە، بروسكەم بۆ مەكتەبی سیاسی خۆمان كردو ئەوانیش هەمان مەعلوماتیان هەبوو، گوتیان ئێمەش بیستومانە، دەكرێ پشتێنەیەكی ئەمنی بەجەماوەری خۆتان ببەستن، بۆئەوەی كەس نەتوانێ هێرش بكاتە سەر جەماوەر و رێكخستنی بێچەك. ئێمەش هەر ئەو شەوەو بەیانییەكەی زووش، داوامان لەناوچەكان و مەكتەبەكانی سەر بەلقی چوار كرد، هەریەكەی ژمارەیەكی باشی رێكخستنەكانی خۆیانمان بۆبنێرن بۆ ناو بارەگای لق، بەتایبەتی ئەگەر سەعات 2ی دوای نیوەڕۆ بگەن باشترە.. ئیتر بڕوابكەن، لەسەعات 11ی بەیانیەوە، هەر خەڵك بوو هاتە ناو لق، ژن و پیاو، كوڕ و كچ، پیر و گەنج، دێتە بیرم بەس بۆ نانخواردنی نیوەڕۆی ئەو رۆژە، زیاتر لە(400) گەص و هەمبەرگرمان بۆ ئامادەبووان كڕی. دوای نیوەڕۆ خەڵكەكە هەر زیادی دەكرد، ئێمەش پەیتا پەیتا لەگەڵ دامودەزگاكانی ئاسایشی شاری سلێمانی لەپەیوەندی دابووین، كە دەڵێم دامودەزگای ئاسایش، مەبەستم پۆلیس و قایمقامیەت و پۆلیسی چالاكییەمەدەنییەكان و پارێزگاشە، داوامان لێكردن، كە بێن و هێزێك بهێنن و بارەگاكەمان لەهەر ئەگەرێكی خراپ كە وەك خۆیان باسیان كردبوو و ئێمەش ئەو رۆژە بۆمان روون بۆوە، كە ڕەوشەكە ئاڵۆز دەبێ، بمانپارێزن... خۆپیشاندان سەعات (2) لەبەر دەركی سەرا دەستیپێكرد، لەوێ وتاری توندوتیژ خوێنرانەوەو خەڵك هاندرا بۆ كاری توندوتیژی، ڤیدیۆكانمان لایە، لەبەر رەوشی سیاسی نامەوێ ناو بهێنم. لەناو خۆپیشاندەران (2-3) كەسمان دانا بەمۆبایل زوو زوو هەڵوێستمان بۆ بنێرن، بەتایبەتی ئەگەر زانیان باسی هێرش بۆ سەر لقی چوار كرا، ئێمەش لێرە ئیحتیاتی خۆمان وەربگرین و داوا بكەین پۆلیسی چالاكییە مەدەنییەكان بێن بەفریامان و ئەگەر نەهاتن جەماوەر و رێكخستنەكانی خۆمان ببەینە دەرەوەو پشتێنەی ئەمنی دروست بكەین.
دوای نوێژی عەسر خۆپیشاندەران بەرەو لقی چوار هاتن، یەكسەر كاك (وشیار سدیق ئەفەندی) بەرپرسی پەیوەندییەكانی پارتیمان و بەرپرسی كوتلەی پارتیمان لەئەنجومەنی پارێزگای سلێمانی، پەیوەندی بەهەموو دامودەزگاكانی ئاسایش و حزبیی شارەكەوە كرد، بۆئەوەی فریامان بكەون. یان ئێمە ئامادەین ئەو هەموو جەماوەرەی لەناو لقی چوار ئامادەمان كردووە، بیانهێنینە دەرەوەو پشتێنەی ئەمنی بەجەماوەری خۆمان ببەستین، برایانمان لەهێزەكانی ئاسایشی شارەكە ئەوەیان پێ باش نەبوو، گوتیان رەنگە جەماوەری هەردوو لا لەبەردەم لقی 4 لێك بدەن، بەڵام ئەگەر كەس دیار نەبێ، ئیحتیمال هەیە راست بڕۆن و كەس پەلامارتان نەدات، ئێمەش رەئیەكەی ئەوانمان پەسەند كرد، ئەو هەموو خەڵكەی لەژورەوەبوون، نەمانهێشت بێنە دەرەوە.
كاتێك خۆپێشاندەران گەیشتنە نزیك لقی چوار، ئەرز لەژێر پێیان دەلەرزی، هات و هاوارێكی زۆریان هەبوو، سەرەتا 700 (حەوسەد) كەس دەبوون، دواتر بەتێكڕایی نزیكەی 2000 كەسێك لەبەردەم لقی چوار كۆبوونەوە، هەندێكیان ویستیان بڕۆن، بەڵام هەندێ كەسی تر بەزۆر پێشیان پێیان گرت و گوتیان: ئەمە لقی چوارە بۆ كوێ دەڕۆن؟ یاڵڵا بیسوتێنن. بەچاوی خۆم بینیم هەندی خۆپیشاندەر رێگایان لەهەندێكی تری شەڕانگێز گرتبوو، دەیانوت وازیان لێبینن، ئەوانەش كەسوكار و برای خۆمانن...
بۆ ئەوەی كێشە دروست نەبێ، وەڵاممان نارد، تكایە هیچ كەس لەجەماوەری پارتیمان لەژوورەكانی لق و لەقاعە گەورەكەی لق، كە جێگەی زیاتر لە 500 كەس دەبوو، كەس نەچێتە دەرەوە بۆ ئەوەی لەگەلأ خۆپیشاندەران نەبێتە شەڕ.
لەڕاستیدا ئێمە یەك دەقیقەش تەلەفۆنمان نەكوژاندەوەو دانەخست و ڕانەگرت، بەردەوام لەپەیوەندی دابووین، تاكو ئەوە خوایە هێزێك فریامان بكەوێ، بەداخەوە تادەهات خەڵك زیاتر كۆدەبۆوە، سەرەتا جنێودان و دروشمی بڕوخێ بڕوخێ و هەندێ شتی تر، دوایی بەردباران دەستیپێكرد، ئێمە هەر چاوەڕوان بووین هێزێك فریامان بكەوێ. كاك وشیار گوتی 15 كەس لەجەماعەتی چالاكییە مەدەنیەكان لەرێگان، راستی كرد، ئەوان هاتن، بەڵام چوونە پشت خۆپێشاندەرانەوەو هەتا تەقە دەستی پێنەكرد، نەهاتنە پێش خەڵكەكە، دوای تەقە و بڵاوكردن ئینجا هاتن! كە هیچ موهیمەیەكیان نەمابوو ئەنجامی بدەن.
بەهەر حال جەماوەرەكە هەر زیاد دەبوو و لەژوورەوە ژن و پیاوی تێدابوو، بەشێك لەحەرەسەكان لەخوارەوە بوون و بەشێك لەسەرێ بوون، ئێمە لەقاتی ناوەڕاست بووین، لەگەڵ هەیئەتی لق و ناوچەكان. زۆر زەختمان لەسەر بوو، كە مەجال بدەین ئەوانەی ژوورەوە بچنە دەرەوەو پێشیان پێبگرن، نەمانهێشت، دەترساین خەڵك بكوژرێ لەنێوان هەردوولا. ئێمە هەرگیزاو هەرگیز، بەهیچ شێوەیەك فكری تەقەكردنمان نەكردبوو، بەهیچ شێوەیەك.
كاتێك هەزاران بەرد هاتنە ژوورەوە، هەموو دوعامان دەكرد هێزێك فریامان بكەوێ، بەردەوام تەلەفۆنم دەكرد بۆ هەموو لایەك لەسلێمانی، تەلەفۆنم بۆ مەكتەب سیاسی خۆمان كردووە، ئەوان پاڵەپەستۆ بخەنە سەر حزب و حكومەت لەسلێمانی، تا كار لەكار نەترازاوە فریامان بكەون. بەڵام هیچ ئیستفادەی نەبوو، كەس فریامان نەكەوت... لەژوورەوە حاڵەتی نەفسی ئامادەبووان زۆر ناڕەحەت و ناجێگیر بوو. هەندێ لەئافرەتان و خەڵكی تریش خۆیان خستبووە ژێر مێز و كورسییەكان لەترسی بەردباران و لەترسی ئەوەی رەنگە لەپڕ بۆمان بێنە ژوورەوە. بابەتی ترسیش وەك فرۆید دەڵێ شتێكی بەدەر لەویستی مرۆڤەكانەو خۆرسكە، حاڵەتێكی زۆر ترسناك بوو. بەیەك جار سەدان كەس دەیان گوت "بیانكوژن، سەریان ببڕن، لاشەكانیان بسوتێنن، نەهێڵن دەربازیان بێ، بارەگاكە بسوتێنن". ئەوانەی ناو لقی چوار خەڵكی فەقیر و هەژاری شارەكەو دەوروبەری بوون، خزمەتگوزار و فەڕاشی تێدابوو، هونەرمەند و دكتۆر و مافپەروەری تێدابوو، پیاوی بەساڵاچووی تێدابوو، كە هەموو تەمەنی بۆ خزمەتی وڵاتی خۆی تەرخانكردبوو، مامۆستای ئایینیمان لابوو، میوانمان بوون و كە زانیان رەوشەكە ئاڵۆزە وتیان لێرەدەبین، بۆئەوەی ریزی ئاینداران بگیرێت و كەس نەیەتە سەرتان، ئاخر خۆ ئەوانیش مرۆڤ بوون و مافی ژیانیان هەبوو، بۆ پێیان بوترێ بیانكوژن و سەریان ببڕن و ئەوانە كافرن و بەعسین؟ هەموو ژوورێكی لقی 4، بەرمالێك و قورئانێكی لێبوو!!
ئەو هەموو حەماسەتەی خەڵك بەو هەموو ترسەوە، 26 دەقیقە هیچ كەس وەڵامی یەك وشە و یەك بەردیشی نەدانەوە. بەڵام كاتێك خۆپیشاندەران زانیان كەس وەڵامیان ناداتەوە، وتیان هێرش بكەن، بەسەر دیوارەكان كەوتن، لەو كاتەدا تەقە دەستیپێكرد... كاتێك تەقە دەستیپێكرد، وتیان لێیان داین، راستیان دەكرد، لەیەكەم دەستڕێژی گوللە، پاسەوانێكی لقی چوار بەفیشەك برینداربوو، بەناوی (خەسرۆ حمەرەشید)، ئیتر لەم كاتانەدا كۆنترۆڵكردن لەدەست دەرچوو. هەرچی هێز و توانامان هەبوو بەكارمان هێنا، بۆ ئەوەی لانیكەم كەمترین زیان هەبێت. زۆر ویستمان تەقە رابگرین، بەڵام ئیستفادەی نەبوو. لەو كوردەواریەی خۆمان جاری واهەبووە تەقەی خۆشی و شایی كۆنترۆڵ نەكراوە، جا تەقەی ئاژاوەیەكی ئاوا گەورە كۆنترۆڵكردنی ئەوەندە ئاسان نەبوو، وەك ئەوەی خەڵك لەئیسراحەت قسە دەكات.. دوایی دەركەوت یەكێك لەناو خۆپیشاندەران بە دەموچاو بەستراوی چەكی جۆری (یوزی) پێبووە، هاتۆتە سەر دیواری حەوشەو تەقەی لەژووری حەوشە كردبوو، ئەو پاسەوانەی ناوم برد، لەوێ بریندارببوو.... دوایی پاسەوانەكانی تر بۆ پاراستنی گیانی خۆیان و ئامادەبووانی ناو بارەگاو بارەگاكە، تەقەی پێچەوانەیان كردبۆوەو پێویستیشی بەوە نەبووە فەرمان لەكەس وەربگرن.
سڤیل: نەدەكرا قوربانیتان بەبارەگاكەتان دابا؟
هیوا ئەحمەد: وەك باسم كرد، ئێمە بەچركە چاوەڕوان بووین، هێزێك فریامان بكەوێت و لەبەردباران و هێرشەكە رزگارمان بكات، چونكە بڕیارمان دابوو (هەموو بەردێك لەدەرەوە بۆ ژوورەوە مێشكی كادیرێكمان بپڕژێنێ وەڵام نەدەینەوە، بەڵام مەترسی ئێمە لەوەدابوو، بێنە ژوورەوە ئەوكاتە ناچارین دەبێ دیفاع لەخۆمان بكەین). بەڵام كەس فریامان نەكەوت! هێرشەكان بۆ سەرمان چڕتر دەبۆوەو تا دەهات خەڵكەكە زۆرتر دەبوو. ئەوان نەهاتن دروشمێكیان هەبێت، لافیتەیەكیان پێنەبوو داخوازی شتێك بكەن. ئەگەر وابوایە بابەتەكە بەشێوازێكی تر دەبوو، مەوزوعەكە زۆر لەوە گەورەترە، كە هەندێ كەس بەعاتفی باسی دەكات، لەیەكەم چركەساتەوە تاكو تەقە دەستی پێكردووە، (27) دەقیقە بەردباران و جنێوباران كراین، تەنانەت یەك كەسیشمان لەگرتە ڤیدیۆییەكاندا دیارنیە، بەس بۆ ئەوەی خۆپیشاندەران ئستفزاز نەبن، كەچی بەداخەوە بەوشێوە نەخوازراوەش بەسەرماندا شكایەوە..... پرسیارت كرد دەڵێی نەدەكرا بارەگاكەتان چۆڵبكەن؟
لەوەڵامدا دەڵێم نەخێر. چونكە:
1. پارتی حیزبێكی سیاسیەو دەیان ساڵە خەبات دەكات، خاوەنی گەورەترین شۆڕشە لەڕۆژهەڵاتی ناوەڕاست بەسەركردایەتی مستەفا بارزانی نەمر، لەپێناوی ئازادی بۆ میللەتەكەی هەزاران شەهیدی داوە، سەدان و هەزاران شەهیدی تەنها لەپارێزگای سلێمانیدا هەیە، خاوەنی رێكەوتننامەی مێژوویی 11ی ئازاری 1970یە، كە دیكۆمێنتێكی زۆر مێژوویی و دەستوریە لەسەر بوونی كورد وەك نەتەوەیەك لەعێراقدا، كاراكتەرێكی سەرەكی راپەڕینە مەزنەكەی 1991 بووە، بناغەدانەر و دامەزرێنەر و بەشداربوویەكی گرنگی پەرلەمان و حكومەتی هەرێمی كوردستانە، بەشداربوویەكی گرنگی نوسینەوەو چەسپاندنی دەستووری ئێستای عێراقە، خاوەنی هەزاران هێزی لەڕادەبەدەری مرۆییە لەهەڵگرتنی بڕوانامەی جۆراوجۆر و بەرز بەرز، خاوەنی سەرۆكێكە لەسەدا حەفتای دەنگی خەڵكی كوردستانی بەدەستهێناوە، ئەگەر مێژووی كورد بنوسرێتەوە، مەحاڵە بێ مێژووی پارتی وەك مەلێكی یەك باڵی لێنەیەت، كە هەرگیز فڕین بەخۆیەوە نابینێت. سەرەڕای هەموو ئەوانەش، حیزبێكە مۆڵەتی یاسایی هەیە، بۆ ئەوەی بارەگای خۆی هەبێت و كار و چالاكی سیاسی خۆی بكات، ئیتر بۆچی خەڵكێك بێت و بەشەڕ و بێ دایەلۆگ و بێ گفتوگۆ، بێ هیچ پاساوێك هێرشی بۆ بكات و ئێمەش لەبەرامبەریدا چۆڵیبكەین، بەمەرجێك ئەو خەڵكەی ئەو ڕۆژە پەلاماری لقی چواریدا، هەموو لایەك بەئۆپۆزسیۆنیشەوە حاشایان لێیان كردو گوتیان لەئێمە نین. ئیتر بۆچی چۆلی بكەین؟ بەپێچەوانەوە ئەو گەلەكۆمەكیەی لەسەر پارتی كرا، ناهەقی بوو، پارتی دوای شەڕی ناوخۆ لەمێژنەبوو هاتبۆوە پارێزگای سلێمانی و پێشینەیەكی ناخۆشی هەبوو لەشەڕی ناوخۆ، دەبوایە بەهیچ شێوەیەك ئەو تەعەدایەی لێ نەكرابوایە..
2. لەو كاتانەی هێرشمان لەسەر بوو، فەرمانكردن بەچۆڵكردنی بارەگا ئەگەر لەسەركردایەتی حیزبیشەوە پێم گوترابا، قبوڵم نەدەكرد، چونكە دەرچونی ئەو سەدان كەسەی ناو لقی 4 بۆ دەرەوەی بارەگا، وەك ئەوە وابوو فەرمان بە قەتڵوعامكردنی سەدان كەس بدرێ، چونكە لەدەرەوە لەگەڵ خۆپێشاندەران تێكەڵاو دەبوون و كارەساتی زۆر گەورەی لێدەكەوتەوە.

سڤیل: باشە نەدەكرا چەك بەكارنەهێنن؟
هیوا ئەحمەد: پێش ئەوەی وەڵامی ئەو پرسیارەت بدەمەوە، دەمەوێت شتێك بۆ مێژوو بڵێم. من 8 مانگ و17 رۆژ بوو بەرپرسی لقی چوار بووم، سەیركە لەوماوە كەمەدا ئەدای من و ستافەكەم چۆنبووە..
1. لەیەم رۆژی دەستپێكردنی خوێندنی ساڵی 2010-2011 چووین 100 بتڵ خوێنمان بەخشی بۆ ئەو قوتابیە هەژارانەی نەخۆشی تالاسیمایان هەبوو.
2. لەمانگی رەمەزانی 2010 بەو گەرمای هاوینە توانیمان رۆژانەی 300 كرێكار دابین بكەین، بۆ ئەوەی ئەوان بچن پشوو بدەن و رۆژی لەدایكبوونی جەنابی سەرۆك بارزانی بوو، ئەو ئەركەمان بەبێ جیاوازی بیروڕای سیاسی جێبەجێ كرد.
3. هەر لەگەڵ دەسپێكی خوێندن 750 جلوبەرگی زەیموەحەدی قوتابیانی سەرەتایی گەڕەكە هەژارنشینەكانمان بەئامادەبوونی نوێنەری پەروەردە بەسەریاندا دابەشكرد، (هەرچەند حەزم نەدەكرد بیڵێم بەڵام قوتابخانەكە دوایی سروودی خۆشەویستیان بە كۆرس بۆ من گوتووە).
4. رێزلێنانی جیا جیاو شایستەمان بۆ (نووسەران، مافپەروەران، پزیشكان، قوتابیان، مامۆستایانی ئاینی، مامۆستایانی شۆڕشی ئەیلول و مامۆستایانی خۆبەخش و هەندێ لەكەسایەتییەكانی شار رێكخستبوو).
5. 64 وەرزشوانی دێرینی شاری سلێمانیمان خەڵاتكرد بەئامادەبوونی برای گەورەم كاك ملازم عومەر و مامۆستا جەمال عەبدول و زۆر لەدامودەزگاكانی شارەكە.
6. دروستكردنی عیادەیەكی پزیشكی شەو و ڕۆژانە بەناوی كلینیكی شەو و ڕۆژانەی (گوڵان) كە ئەركیان ئەوەیە بەخۆڕایی چارەسەری نەخۆشە كەمدەرامەتەكان بكەن، كە تائێستاش بەردەوامە.
7. رێزلێنانی شایستەمان بۆ هونەرمەندانی گەورە (عەدنان كەریم، مامۆستا عومەر دڵپاك) لەدوو بۆنەی جیاواز و گەورەدا رێكخست، بەهاوكاری هەردوو سەنتەری رۆشنبیری (هەناسە، ئەكادیمۆس).
8. بەهاوكاری بزاڤی رۆشنبیری نوێخواز بەیەكەوە رێزلێنانی شایستەمان بۆ مامۆستای گەڕیدە و مێژوونوس (كەریم زەند) رێكخست.
9. رێزلێنانی میوانداریمان بۆ 21 هونەرمەندی بەشداربووی (نامەكانی ئەشرەف) رێكخست.
10. دروستكردنی پەیكەری هونەرمەندی گەورە (تەها خەلیل) لەپاركی ئازادی.
11. سەرخستنی زنجیرە درامای (رەیحانە) كە لەكەناڵی كوردستان تیڤی ئازیز پەخشكرا، بەشاهێدی دەرهێنەرەكەی كاكە (لوقمان غەریب) بەهەوڵ و هیمەتی ئێمە بوو لەڕێگەی مەكتەبی كاك نێچیرڤان بارزانیەوە، برایان كاك عەباس غەزالی و كاك كاروان ئاكرەیی هاوكارمان بوون.
12. لە 226 ساڵەی شاری سلێمانی من و هەڤاڵەكانم بووین، (300) ئاڵای كوردستانمان لەسەر (300) قوتابخانەی شاری سلێمانی و دەوروبەری شەكاندەوە، بەئامادەبوونی یەكێتی مامۆستایان و پەروەردەی سلێمانی.
13. ئەوە ئێمە بووین هەموو یەكەمەكانی پۆلی شەشەمی ئامادەیی زانستی و وێژەییمان لەسەر ئاستی پارێزگای سلێمانی خەڵاتكرد، بەئامادەبوونی نوێنەری پەروەردە و مامۆستایان و قوتابیان.
14. جارێكی تر بەهاوكاری رێكخراوی شار خەڵاتی شایستەمان بۆ 412 قوتابی دەرچوی خولە جیاجیاكانی فێربوون كرد.
15. بۆ جاری دووەم 100 بتڵ خوێنی ترمان بەناوی لقی چوار و ناوچەكانەوە بەخشی، بەڵام خۆیان تەنها 50 بتڵیان پێویست بوو.
16. لەو ماوەكەمەدا توانیمان موچەی كەمئەندامی بۆ (هەزاران) هاوڵاتی دەستكورت دابین بكەین.
17. چەندین كەسمان لەنەخۆشە مەترسیدارەكان ڕەوانەی دەرەوەی وڵات كرد بۆ چارەسەركردن، لەڕێگەی مەكتەبی جەنابی سەرۆك بارزانی و كاك نێچیرڤان بارزانی.
18. دروستكردنی دەیان تیپی وەرزشی (تایكواندۆ، كاراتی، تۆپی پێ).
19. دروستكردنی چەند تیپێكی مۆسیقا و شانۆیی بەبێ جیاوازی بیروڕای سیاسی.
20. تەنها لەماوەی پێنج مانگدا 7000 ئەندامانی حزب لەناو بارەگای لقی چوار پێشوازیان لێكراوەو بیروڕامان ئاڵوگۆر كردوون.
من لێرەدا لەئێوەی بەڕێز و خوێنەرانی ئازیز و باوكی جوانەمەرگ رێژوانیش دەپرسم، حیزبێك و لقێك و بەرپرسی لقێك ئەوە بەرنامەی كاری ڕۆژانەی بێت، حەزی لەكوشتنی رۆڵەی وڵاتەكەی خۆیەتی؟ ئێمە بەنیازی بەكارهێنانی چەك نەبووین. من پرسیارێك لەهەموو خەڵكی كوردستان دەكەم، ئایا تائێستاش هیچ بڕیاڕێك لەئەنجومەنی وەزیران و وەزارەتی ناوخۆ و سەرۆكایەتی هەرێم و وەزارەتی پێشمەرگەو ئاسایشی گشتی هەردوولا دەرچووە بڵێ (پاسەوانی بارەگاكان نابێ چەكیان پێ بێت؟ یان فەرمان دەرچوبێت كاتێك خەڵكێك هێرش بكاتە سەر بارەگاكان هیچ پاسەوانێك بۆی نییە دیفاع لەخۆی و لەبارەگاكەی بكات؟ ئەگەر ئەو فەرمانە دەرچووە ئەی پاسەوان بۆچی بۆ بارەگا حزبی و حكومیەكان دابنرێت و ئەو هەموو مەساریفە بۆچی بكرێت؟ ئایا فەرمان دەرچووە نابێ پاسەوانی بارەگاكان و بانقەكان و دادگاكان و هتد. نابێت لەكاتی پەلاماردان داكۆكی لەشوێنەكانیان و لەخۆشیان بكەن؟ بۆ زانیاریتان تا ئێستاش هیچ پاسەوانێك فەرمانی دیفاعنەكردنی پێنەدراوە لەهەموو كوردستان. ئەگەر وایە بۆچی بڕیارێك دەرناچێ لەپەڕلەمانی كوردستان و بەیاسا ڕێك ناخرێت؟ تائێستاش بڕیارێك دەرنەچووە پاسەوانی بارەگاكان و كەسەكان فیشەكی وەهمیان پێبێت، یان داریان پێبێت. بەپێچەوانەوە تا ئێستاش ئەگەر پاسەوانێك یەك فیشەكی كەم بێ لەناو مەخزەنەكەی، یان سەعاتێك لە حەرەسیات دوابكەوێت سزا دەدرێت و نانبڕاو دەكرێت...
ئێمە دژی بەكارهێنانی چەكین بەهەموو شێوەیەك، بەڵام ئەگەر ئەو دوو هەزار كەسەی پەلاماری لقی 4یان دا، بەو هەموو حەماسەتە زۆرەوەی هەیانبوو، بەو هەموو دروشمە توندانەی دەیانگوتەوە، لەسەر دیوارەوە بگەیشتبانە ژوورەوە لەگەلأ ئەو هەموو جەماوەر و كادیرەی پارتی لەناو لق تێكەڵاوی یەكتر بوونایە چی رووی دەدا؟! من لەخەڵكی كوردستان دەپرسم، خوانەخواستە ئەگەر مەبەستی پاسەوانەكانی لقی 4 كوشتنی خەڵك بوایە، تەنها یەك 1 كەس لەوێ دەكوژرا؟ بەمەرجێك ئەو یەك كەسە بۆ ئێمە زۆر گەورەیە، هەرچەندە كەسیش نازانێ بەگوللەی كێ و كوێ پێكراوە..
سڤیل: كێ بڕیاریدا تەقە بكرێ؟
هیوا ئەحمەد: پێویست بەوە نەبووە كەس فەرمانی تەقەكردن دەربكات، حاڵەتەكە خۆی وابووە، پاسەوانەكان و ئەو جەماوەرەی ناو لق كۆبووبوونەوە، كاتێك مەترسی ژیان و سوتان و گرتنی بارەگاكەیان بۆ پەیدا بووە ناچاربوون تەقە بكەن. ئەگەرنا پێگەی لق پێگەیەكی مەدەنیە، كاروباری سیاسی و جەماوەری خۆی دەكات، پاسەوانەكانیش بەرپرسی تایبەت بەخۆیان هەبووە، ئەو بەرپرسەش لەبەردەم ئەو لیژنە یاساییەی بەناوی (گەڕان بەدوای راستییەكان بۆ ڕووداوەكانی 17ی شوبات) سوێندی یاسایی خواردبوو، كە هیچ كەسێك فەرمانی بەتەقەكردن نەداوە... بەپێچەوانەوە ئێمە هەر دەستەو دوعا بووین كەسێك فریامان بكەوێت، پێش ئەوەی كار لەكار بترازێ. بەڵام رەهەندەكانی ئەم رووداوە لەوە گەورەتر بوو بەئێمە كۆنترۆلأ بكرێت، ئێمە وەكو لقی 4 چیمان بەدەست بوو؟ بۆچی هاتنە سەرمان؟ كێ بوون ئەوانەی هاتنە سەرمان؟ بەفەرمانی كێ هاتنە سەرمان؟ ئەوەی یەكەم كەس بە(یوزی) بەدەم و چاو بەستراوی هاتە سەر دیواری لق و تەقەی لەپاسەوانەكان كرد كێ بوو؟ لەگەڵ ئەویش دەیان كەسی تر بەبەرد و چەقۆ و تەورداس بەسەر دیوار كەوتن، بۆ ئەوەی بێنە ژوورەوە كێبوون؟ گرتەیەكی ڤیدیۆیی هەیە، كەسێك لەناو خۆپیشاندەران تەقە لەخۆپیشاندەرانیش و لەلقی 4یش دەكات؟ دیسان دووبارەی دەكەمەوە، كە ناحەزانمان چاویان بەو وەزعەی ئێمە هەڵنایە، حەزیان لێیە یەكتر ببڕینەوە، پێویستە خۆمان وشیار بین، پێش بەكارەساتی دڵتەزێنتر بگرین، ئایە دەزانن كاتێك یەكێك لەخۆپیشاندەران بە(داس) هاتۆتە سەر دیوار ویستویەتی سەری پاسەوانێك بپەڕێنێت، تا ئێستاش پاسەوانەكە لەحاڵەتێكی دەروونی زۆر خراپدایەو تائێستا چەندین پزیشكی پێكراوەو بێ چارەسەر ماوەتەوە، ئێمە تا ئێستا ئەوەمان هەر باس نەكردووە لەبەر ئەوەی خێزانەكەی گوتیان با كەس نەزانێ كوڕەكەمان توشی ئەو ترسە سامناكە بووە، ئایە ئەوە كێ لێی بەرپرسیارە؟ لقی چوار یان ئەوانەی پەلاماریان داین؟! ئەوە كەی خۆپیشاندانی مەدەنیانەیە؟ خۆ ئەویش گەنجێكی تەمەن 18 ساڵانەو كوڕی پیاوێكی هەژاری ئەو كوردستانەیە.
سڤیل: یەك بریندارتان هەبووە لەلقی چوار بەگوللە بریندار بووبێت؟
هیوا ئەحمەد: دوو بریندارمان هەبووە، یەكێكیان یەكەم دەستڕێژ بەركەوتووە، ئەوەی تریان بۆ شەوەكەی برینداربووەو 64 گوللە لەسەر لقی چوار تۆماركراوەو 9 كەسمان بەبەرد سەری شكاوەو حەوت سەیارەی كادیرانی لقیش تێكشكاوە، بارەگاكەش خۆتان بینیتان چۆن بوو..
سڤیل: پێتوایە بۆچی دەزگا ئەمنییەكانی سلێمانی بەفریاتان نەهاتن؟
هیوا ئەحمەد: ئەو پرسیارەمان لەبرایانی ئاسایش و ئیدارەی سلێمانیش كرد، گوتیان راستە زانیاریمان هەبووە، بەڵام بڕوامان وانەبووە، كە بەم شێوەیەی لێ دێ و ئاوا ئەو هەموو خەڵكە پەلامارتان دەدات.
سڤیل: ئەوكات گوترا كە یەكێتی وەك ئیدارە و ئاسایش كەمتەرخەم بوو لەپاراستنی بارەگاكانی پارتی، بەڵام بۆچی كە زێرەڤانی چووە سلێمانی، یەكێتی نیگەران بوو دژی وەستایەوە؟
هیوا ئەحمەد: نازانم، ئەوەیان ئەو كاتە زۆر مشتومڕی لەسەركرا. زێرەڤانیش وەك هێزێكی حكومەت هاتبوو بۆ سلێمانی.
سڤیل: كاتی خۆی سەرۆكی حكومەت سەردانی كردن، چی گوت؟
هیوا ئەحمەد: سەرۆكی حكومەت پێیوابوو ئەوەی روویدا زۆر ناخۆش بوو، زۆریش بە پەرۆش بوو بۆ وەزعەكە، بۆ پەلاماردانی لقی چوار، زۆر بەپەرۆش بوو، هەر ئەو شەوەی سەردانی كردین، بەیەكەوە لێدوانی هاوبەشماندا بۆ ڕاگەیاندنەكان، بیرتان نەچێ بەیاننامەی هەر سێ دەزگای گەورە و گران و شەرعی كوردستان بەفەرمی ئیدانەی پەلاماردانی لقی چواریان كردووە، كە ئەوانیش سەرۆكایەتی هەرێم و سەرۆكایەتی پەرلەمان و سەرۆكایەتی ئەنجومەنی وەزیرانن.
سڤیل: هەوڵت نەداوە لەگەڵ باوكی رێژوان قسە بكەی؟ یان سەردانی ماڵی زمناكۆت نەكردووە؟
هیوا ئەحمەد: بڕواناكەم هیچ شتێك بەقەدەر ئەو رووداوەی 17ی شوبات كاریگەری خراپی لەسەر من هەبووبێت، بەتایبەتی كوژرانی گەنجێكی وەكو (رێژوان) من جەرگم بۆی هێشاوە، لەڕاستیدا من و رێژوان هەردووكمان قوربانی ئەو رۆژەین. ئەو بە جەستەو منیش لەڕووی مەعنەوی و كەسایەتیمەوە، راگەیاندنەكانی ئۆپۆزسیۆنیش زۆر بەبێویژدانی منیان بریندار كردووە، كەسایەتی منیان لەبەر چاوی خەڵك شێواندووە، من لەمنداڵیمەوە رقم لەشەڕ و ئاژاوەیە، تاكە گوناهێك كە هەمبووبێت لەو ڕۆژەدا ئەوەبووە، كە من بەرپرسی لق بووم، خۆ ئەگەر منیش نەبام كەسێكی تر هەر بەرپرسی لق دەبوو، نەخێر تا ئێستا قسەم لەگەلأ باوكی رێژوان نەكردووە، من ئەم پیاوە بەڕێزەم لەتەلەفزیۆن بینی، خاوەنی بیروباوەڕ و رەئی و قەناعەتێكی زۆر جوان و مرۆڤدۆستانە بوو، گوتم سوپاس بۆ خوا كە لەگەلأ كەسێكی مەرد تێكەوتوین، ئێستاش هەر وادەڵێم، دڵنیام لەوەی كە بەڕێزیان باش دەزانێ كەس كێشەی شەخسی لەگەلأ كوڕی ئەودا نەبووە، كەسیش نەیگوتوە ئەمە رێژوانە تەقەی لێبكەن، ئاژاوەیەك روویداو قەزاو قەدەری خوا، بەڕێكەوت ئەو لەوێوە تێپەڕیوەو بەركەوتووە، دڵنیای دەكەم ئەویش هەر بەقەد ئێمە بۆی نیگەرانە، بۆیە بابەتەكە شەخسی نییە، ئەگەر شەخسی بێت، من دەتوانم بچمە ماڵی، چی بڕیارێك بدات حازر دەبم. بەڵام ئەمە شتێكی سیاسیەو روویداوە، ئێستا بەرەو یاسایی و قەزایی سوڕاندوویانە، با چاوەڕێ بكەین، بزانین بابەتە سیاسی و یاساییەكان لەكوێ یەكتری دەگرنەوەو لەكوێش هەر یەكەیان رەوتی خۆی وەردەگرێ، ئێمە بۆ هەموو بوارەكان ئامادەین.
سەبارەت بە كاكە زمناكۆش ئەو كاتەی برینداربوو، زانیمان كە تەنها ئەو مەترسی لەسەرە، كارگێڕێكی لقی 4 بەناوی كاك محەمەد گرێزەییم راسپارد بچێت بۆ نەخۆشخانەو ئامادەیی ئێمە دەرببڕێت بۆ بەڕێكردنی بۆ هەر وڵاتێك كە پێویست بێت، چەندیش مەسرەفی بوێت حازرین، ئەو قسەیەشم لەخۆمەوە نەكردبوو و موافەقەم وەرگرتبوو، بەڵام بەسەردا نەقڵ بووم و ئاگام لێی نەما. سوپاس بۆ خوا كە ئێستا وەزعی باشە.
سڤیل: ئایا ئامار و ناوی بریندارەكانی 17ی شوباتتان لایە؟
هیوا ئەحمەد: ئەو ئێوارەی روویدا بۆ شەوەكەی سەعات 11، لەتەلەڤزیۆنی (نالیا) بەڕێوەبەری نەخۆشخانەی فریاكەوتنی سلێمانی گوتی: تا ئێستا 14 بریندار هاتۆتە لامان، تەنها یەكێكیان برینەكەی سەختە، ئەویش زمناكۆیە. (ئەو لێدوانەم بەدەنگ و رەنگ لای خۆم پارستووە)، بەڵام بەداخەوە دوایی راگەیاندنەكان بابەتەكەیان گەورەتر لەقەوارەی خۆی نیشاندا.
سڤیل: گۆڕینی تۆ لەبەرپرسیارێتی لقی چوار پەیوەندی بەڕووداوەكەی 17ی شوبات هەبوو؟
هیوا ئەحمەد: تا ئێستاش نازانم بۆچی لەبەرپرسیارێتی لقی 4 لادرام، بەڕەئی من پارتی كارێكی باشی نەكرد لەو گۆڕانكاریە، نەك لەبەر ئەوەی برایەكی تر هاتۆتە شوێنی من، بەڵكو لەكاتی خۆیدا نەبوو.
سڤیل: راتان چی بوو دەربارەی ئەو راپۆرتەی كە كاتی خۆی لیژنەی بەدواداچوونی راستییەكان بڵاوی كردەوە؟
هیوا ئەحمەد: بڕوامان بە لیژنەكە و ئەنجامەكە هەبوو.
سڤیل: چوویتە بەردەم لیژنەكە؟
هیوا ئەحمەد: نەخێر من نەچوومە بەردەم لیژنەكە، چونكە لەدادگا بە ناو ناوی من نەهاتبوو، تەنها داوای بەرپرسی لقی چوار و پاسەوانەكان كرابوو، بەڵام دوایی بڕیارەكە چۆن گۆڕاوە نازانم؟.
سڤیل: تۆ سكاڵات لەسەرەو بۆچی ناچیت بۆ دادگا؟
هیوا ئەحمەد: ئەو بابەتە سیاسیە، خەڵك هێرشی نەكردۆتە سەر ماڵی من، هێرش كراوەتە سەر بارەگای حزبێك، دروشمەكان نەیان گوتووە بڕوخێ (هیوا)، ئامانجەكان سڕینەوەی پارتی بووە، یەكەم رووداوی ناخۆشیش نییە كە لەكوردستاندا لەدوای ڕاپەڕینەوە رووی دابێ، هەر لەو شاری سلێمانییەو لەپارێزگاكەش بەشێوەیەكی گشتی چەندین حاڵەتی لەوە ناخۆشتر و گەورەتر روویانداوە، كە نامەوێ باسیان بكەم. ئێمە پارێزەرمان هەیەو ئەویش داوای كردبوو، ئەو كەیسەی ئێمە بگواسترێتەوە بۆ هەولێر، بەڵام لەدادگا پەسەند نەكرابوو، ئێستاش هەر لەهەوڵی ئەوە داین، ئەگەر بۆمان بكرێت زۆر باشە، بەڵام لام سەیرە سەرۆكی فەرمانگەی داواكاری گشتی سلێمانی لێدوانی داو گوتی: ئاساییە دۆسیەی تارق هاشمی بگواسترێتەوە بۆ كوردستان، من پرسیار دەكەم بۆ ئەوەی من ئاسایی نەبێ بچێتە هەولێر، ئەگەر بابەتەكە بەسیاسی نەكرێت، بۆ ئەوەی هاشمی ئاسایی بێت؟ گومان لەبێلایەنییەكان لێرەدا دروست دەبن. بۆیە منیش وەك هاوڵاتیەك و مافی مرۆڤبوونی خۆم پێ لەسەر ئەو داواكاریەم دادەگرم، بەڵام ئەگەر نەكرا بڕوام بەعەدالەتی دادگاكانی خۆمان هەیە لەهەر شوێنێك بێت.
سڤیل: دەگوترێ جەنابت بەپێی مادەی 406 تۆمەتباری، بەپێی ئەو مادەیەش سەرەتا دەبێ دەسگیر بكرێی تا دادگایی دەكرێی، بۆ ئەمە چی دەكەن؟
هیوا ئەحمەد: تا ئێستاش هیچ فەرمانێك و تەبلیغێكی فەرمی دادگام بە دەست نەگەیشتووە، تەنها لەڕاگەیاندنەكان شت دەبیستم.
سڤیل: رای سەركردایەتی پارتی چیە لەسەر ئەوەی تۆ بچیت بۆ دادگا؟
هیوا ئەحمەد: ئەوان بەتێكڕایی پێیانوایە ئەو بابەتە شتێكی سیاسیەو حزبیش پارێزەری گرتووە، بەڵام لەهەموو حاڵەتەكاندا ئەو چوار بڕیارەی جەنابی سەرۆكی هەرێم دەخەینە سەر سەرمان، بەڵام ئاشكرایە دادگاییكردنەكە هاندەران و هێرشكەران و كەمتەرخەمانیش دەگرێتەوە، بەتایبەتی هاندەر بەپێی مادەكانی یاسای سزادانی عیراقی ژمارە 47 و 48 و 49 بەشدارە لەتاوان!!.
سڤیل: بڕوات بەخۆت هەیە لەدادگا بێتاوان دەربچی؟
هیوا ئەحمەد: بەڵێ زۆریش بڕوام بەخۆم و راستی رووداوەكان هەیە. دڵنیام هەر مرۆڤێكی بەویژدان و مرۆڤدۆست راستی ڕووداوەكانی بۆ روون بێتەوە، دەزانێ پارتی لەسلێمانی زوڵمی لێكرا. جگە لەوەش بڕوام زۆر بەدادوەری و عەدالەتی دادگاكانی خۆمان هەیەو ئەوان نمونەی مرۆڤدۆستی و راستی دۆستین، وەك ئێمە مرۆڤن و بەكوردی قسە دەكەن و لەو كۆمەڵگایەشدا دەژین.