پەرلەمانتاری كورد لەیلا زانا لەكۆنفراسێكدا لەفرانكفۆرتی بەریتانیا دەڵێ (چەكی پەكەكە) گەرانتییە بۆ كورد و هەتا كێشەی كورد بەردەوام بێ، دەبێ ئەو چەكەش بەردەوام بێت. رۆژنامەی تودەیس زەمان كە ئەم هەواڵەی گواستۆتەوە پێیوایە ئەم لێدوانە مشتومڕێكی بەرچاو لەنێوەندە جیاوازەكانی توركیادا دروست دەكات و ئاماژەش بەتوڕەیی ئەردۆگان دەكات لەئاست ئەم وتەیەی زانادا.
لەو كۆنفرانسەدا كە لەئەڵمانیا بەناونیشانی مێژووی كۆچكردنی كۆچكردنی كوردەكان بۆ ئەڵمانیا سازكراوە، لەیلا زانا وتویەتی "ئێمە گەیشتوینەتە خاڵێك لەكۆششی سەربازیدا، قەت مشتومڕ لەبارەی دانانی چەكەوە ناكەم، هەتا كێشەی كورد بمێنێ ئەو چەكانە گەرانتین بۆ كورد". دەربارەی دەنگۆی ئەوەی پەكەكە ئاگربەستێكی یەكلایەنە ڕادەگەیەنێتەوە، زانا وتویەتی هەر شتێك یەكلایەنە بێت بێمانایە.
لەدرێژەی قسەكانیدا زانا وتویەتی "كورد قوربانیی دەستی ناعەدالەتی و ئەو دەوڵەتەشە كە ناعەدالەتی پەیڕەو دەكات. نابێ باسی دانانی چەك بكرێ، هەتا گەرانتییەكی یاسایی و دەوڵەتیی نەدرێتە كورد".
ئەم وتانەی لەیلا زانا ئەردۆگانی توشی حاڵەتێكی هیستریایی ئەوتۆ كرد كە بڵێت "بۆ ئەوە بوویتە پەرلەمانتار ئەم جۆرە قسانە بكەیت، وانییە؟ دەڵێیت چەك گەرانتیمانە. كەواتە بۆ هاتیتە پەرلەمان؟ خۆ ئەمە سیستمێكی دیموكراسیی پەرلەمانییە. شتێك بوونی نییە بەناوی سیستمی سەربازیی پەرلەمانی. بۆ هاتوی بۆ ئێرە (پەرلەمان)؟ دەبوو بچویتایەتە ئەو شاخ و كێوانە".