بەپێی هەواڵی سایتی هێسپرێسی ئەمازیغی، هەفتەی رابردوو لەخۆپیشاندانی ئەمازیغەكانی مەغریبدا لەشاری ریبات ئاڵای كوردستان بەرزكرایەوە و هاوسۆزی بۆ كوردان دەربڕدرا.
سایتەكە دەڵێ ئەم كارەی ئەمازیغیەكان كاریگەرییەكی بەرچاوی لەسەر كوردان هەبوو، بەتایبەت ئەوانەی لەسوریا و توركیا و ئێران دەژین. ئەوەبوو لەخۆپیشاندانەكانی كوردەكانی سوریادا لەبەرامبەردا و دوای ئەوە، ئاڵای نەتەوەیی ئەمازیغەكان هاوشان لەگەڵ ئاڵای كوردستان بەرزكرایەوە و شەكێنرایەوە. سایتەكە وێنەی هەردوو خۆپیشاندانەكەی بڵاوكردۆتەوە.
دەبێ بڵێین ئەمازیغەكان گەلی ڕەسەنی وڵاتانی مەغریب و جەزائیر و تونس و لیبیا و ڕۆژاوای میسرن و بەهۆی شاڵاوی تەعریبەوە خاكەكەیان بووەتە موڵكی عەرەب و ئێستا ئەوان وەك كەمینەیەك دەژین كە لەسادەترین مافی مرۆڤ بێبەشن. لەمێژوو و ئێستاشدا گەلێ كەسایەتی ناسراویان تێدا هەڵكەوتوە، وەكو تاریقی كوڕی زیاد و عەباسی كوڕی فیرناسی خاوەن یەكەم بیرۆكەی فڕینی مرۆڤ و لەئێستاشدا یاریزانی بەناوبانگی فەرەنسایی زەینەدین زەیدان.