|
 سڤیل:
كاتێ ویلایەتە یەكگرتوەكان لەساڵی 2003
پەلاماری عێراقی دا، چەندین پەنابەری كورد
لەشاری مۆرهێدی ویلایەتی مینۆسۆتاوە وەكو
وەرگێڕ و ڕێبەر هاریكاری ئەمریكییەكانیان كرد.
ئێستا و دوای كشانەوەی ئەمریكا لەعێراق، ئەو
كوردانە لەبارەی بارودۆخی هاوڕێ و خزمانیانەوە
كە لەعێراق بەجێماون نیگەرانن.
(ن.ب) كە ژنبراكەی بەهۆی هاریكاریی
ئەمریكاییەكانەوە هەڕەشەی كوشتنی لێكراوە،
دۆخەكە بە ترسناك وەسف دەكات.
سەدان كورد لەدوای ئەوەی لە 1980كاندا لەلایەن
ڕژێمی سەدامەوە وەدەرنران، لەویلایەتی
مینۆسۆتای ئەمریكا نیشتەجێ بوون. بەشێك لەوانە
لەدوای 2003 لەگەڵ ئەمریكییەكان چونەوە بۆ
عێراق تا وەكو وەرگێڕ و ڕێبەر كاریان لەگەڵ
بكەن، لەگەڵ گەڕانەوەشیاندا كاریان بۆ ئەوە
كرد، خزمان و هاوڕێیانیشیان لەكوردستان لەگەڵ
ئەمریكییەكاندا كار بكەن. ئەمە حاڵی (م.س)ە كە
وەكو پاسەوانێكی ئەمنی بۆ تیمێكی بچوكی مەدەنی
ئەمریكایی لەكوردستانی عێراق كاری كردووە.
(م.س) گوتی هاریكاری ئەو لەگەڵ ئەمریكاییەكان
وایكردووە، ببێتە ئامانجی ئەو گروپانەی
بەرهەڵستیی دەستێوەردانی ئەمریكا دەكەن
لەكاروباری عێراقدا. ئەو دەڵێ چەندین جار
هەڕەشەی مەرگی پێگەیشتوە.
ئەو لەڕێگای وەرگێڕێكەوە گوتی "وێنەی خەڵكی
كوژراو فڕێ دەدەنە حەوشەكەت، یان ژمارەكەت
پەیدا دەكەن و كورتەنامەی هەڕەشە ئامێزت بۆ
دەنێرن، یان لە شوێنی نەزانراوەوە تەلەفۆنت بۆ
دەكەن و هەڕەشەی كوشتنت لێدەكەن".
(م.س) جموجوڵ بەخێزانەكەی دەكات و لەشوێنێكی
دیاریكراو نایانهێڵێتەوە. كرێكاری دەكات و هەر
رۆژە روو لەشوێنێكی جیاواز دەكات بۆ كرێكاری.
ئامۆژگاری منداڵەكانیشی دەكات لەناو ماڵ
بمێننەوە و نەچنە دەرەوە.
"دەتوانن بڕۆن بۆ قوتابخانە. بەڵام دەترسم
لەوەی بیاننێرم. دەترسم بیاننێرم و
تیرۆریستەكان دەستگیریان بكەن و تەلەفۆنم بۆ
بكەن و بڵێن یان پارەمان بدەرێ یان زیانیان پێ
دەگەیەنین". ئەمە قسەی (م.س) بوو.
(م.س) دەڵێ كە ئەو هەرگیز بیری لەوە
نەكردبوەوە عێراق بەجێ بهێڵێ، چونكە پێیوابوو
ئەمریكاییەكان بۆ هەمیشە لەعێراق دەمێننەوە.
بەڵام كە زانی سەرجەم هێزەكانی ئەمریكا عێراق
بەجێدەهێڵن، دەركی بەوە كرد كە زۆر مەترسیدارە
لەعێراقدا بمێنێتەوە.
(ن.ب) كە ڕێكخراوێكی كوردی بەڕێوە دەبات، گوتی
گەلی كورد سۆزێكی بەهێزیان بۆ سوپای ئەمریكا
هەیە، چونكە لە 20 ساڵی رابردودا ئەو هێزانە
كوردیان پاراستوە.
"ئەم وڵاتەم خۆشدەوێ. دەتوانم پێت بڵێم
ڕەوەندەكەشم (رەوەندی كوردی) ئەم وڵاتەیان
خۆشدەوێ. چونكە قەت لەبیری ناكەین ئەمەریكا چی
بۆ كردوین. لانەیەكی ئارامیان بۆ فەراهەم
كردوین. پێتوایە هەرگیزا و هەرگیز بەڕووی
ئەمریكادا بوەستینەوە؟ هەرگیز ئەوە روونادات".
ئەمە قسەی (ن.ب) یە.
بەهۆی ئەو مەترسییەی رووبەڕووی دەبنەوە، زۆر
لەو عێراقییانەی هاریكاری ئەمریكاییەكانیان
كردوە دەیانەوێ روو بكەنە ویلایەتە
یەكگرتوەكانی ئەمریكا. ئەوەبوو (م.س) داواكاری
پێشكەش كرد بۆ ڤیزای كۆچبەریی تایبەت كە
لەساڵی 2008ەوە بۆ ئەو كەسانە دروست دەكرێت،
كە بەهۆی كاركردن لەگەڵ ئەمریكاییەكان
رووبەڕووی تۆڵە دەبنەوە.
(م.س) گوتی كە ئەو هەزاران دۆلاری خەرج
كردووە، لەڕێگای گەیاندنی خۆی و خێزانەكەی بۆ
باڵیۆزخانەی ئەمریكا لەئەنقەرە. (ن.ب)
لەمۆرهێدەوە بەرەو ئەنقەرە بەڕێ كەوت، تا
پشتیوانیی (م.س) بكات، بەڵام ڕێگەی پێنەدرا
لەڕۆژی موقابەلەكە لەباڵیۆزخانەی ویلایەتە
یەكگرتوەكان لەئەنقەرەی توركیا ئامادە بێت.
(م.س) گوتی كە فەرمانبەرێكی باڵیۆزخانە
لەماوەی گفتوگۆیەكی كورتدا پێی گوتوە كە ئەو
مەرجی وەرگرتنی ڤیزای تێدا نییە.
بەڵام وا دیارە (م.س) دەتوانێ ئەو مەرجانە
لەژێر سایەی بارێكی تایبەتدا بسەلمێنێ، بەوەی
بەلایەنی كەمەوە ساڵێك كاری بۆ سوپای ئەمریكا
كردووە. سەرپەرشتیارە ئەمریكاییەكەشی
لەپەیامێكدا ستایشی كارەكانی دەكات.
رائیدی سەربازی ئەمریكی پیتەر كۆڵت دەڵێ
"گومانم لەوە نییە من و پیاوەكانم بەهۆی كاری
ئازایانە و لێزانانەی (م.س)ەوە توانیمان
ئەركەكانمان بەسەركەوتویی راپەڕێنین. ئەوەش
دەزانم ئەو كەسانە بەهۆی ئەوەی كاریان بۆ ئێمە
كردووە، دوای گەڕانەوەی ئێمە بۆ وڵاتی خۆمان
ئەوان لەعێراق توشی مەترسی دەبنەوە".
كۆڵت جەختی لەسەر ئەوە كردۆتەوە كە ئەو ستایشی
كارەكانی (م.س)ی كردووە، بەڵام بەرپرسانی
سەربازی ڕێگەیان پێنەداوە لێدوان بدات.
مەترسیی فەرمانبەرانی سەربازیی ئەمریكایی
لەدوای كشانەوەی هێزی سەربازیی ویلایەتە
یەكگرتوەكان زۆر زیادی كردووە.
(ن.ب) گوتی مەترسییەكە لەسەر كورد زیاترە،
چونكە ئەوان وەك هاوپەیمانی ئەمریكا ناسراون.
بۆ یەكەمین جار لەدوای 20 ساڵ كورد بێ
پارێزگاری سەربازی ئەمریكا ماونەتەوە.
(ن.ب) دەپرسێ "ئەی ئێمە چی بكەین؟ پشت بە
رژێمی عێراق ببەستین، كە لەسایەی حزبی
بەعسەكەیدا توشی جۆرەها تۆقاندن بووین؟".
(ن.ب) مەترسی هەیە لەوەی عێراق نوقمی شەڕی
ناوخۆیی ببێت، ئەوەش بەهۆی سەرهەڵدانەوەی ئەو
هێزانەی دژایەتی هاتنە ناوەوەی ئەمریكایان
دەكرد بۆ عێراق.
ئەو دەڵێ "ئەو گروپ و تیرۆرست و پیاوخراپانە
نەڕۆشتون. لەپشت پەردەوە خۆیان حەشارداوەو
چاوەڕێی ڕۆژی خۆیان دەكەن. ئێستاش كە
ئەمریكاییەكان كشاونەتەوە، پەردەكانیان
لادەدەن و دێنەوە و دەست دەدەنە بڵاوكردنەوەی
بێسەروبەری".
لەوانەیە ئەو بێسەروبەرییە بریتی بێت لەسزای
مردن بۆ ئەو كەسانەی لەگەڵ ئەمریكاییەكان
كاریان كردووە.
كۆنگرێس لەساڵی 2008دا بەرنامەیەكی تایبەتی
پێدانی ڤیزای كۆچبەریی پەسەندكرد بۆ ئەو
كەسانەی رووبەرووی مەترسی دەبنەوە. لەو
چوارچێوەیەدا بڕیاردرا لەماوەی 5 ساڵدا 25000
ڤیزا بدرێت. ئیریك شوارتز بەرپرسی پێشو
لەوەزارەتی دەرەوەی ئەمریكادا وتی تا ئێستا
تەنها لەكۆی ئەو بڕە تەنها 7000 ڤیزا دراون.
شوارتز كە پێشتر ڕاوێژكاری وەزیری دەرەوەی
ئەمریكا بووە بۆ كاروباری دانیشتوان و
كۆچبەران و پەنابەران، دەڵێ بەرپرسانی فیدراڵ
دەترسن تیرۆریستان خۆیان بخزێننە ناو ئەو
كەسانەوەو وەك پەنابەر بگەنە ئەمریكا.
شوارتز كە ئێستا راگری كۆلێجی كاروباری
جەماوەرییە لەزانكۆی مینۆسۆتا دەڵێ لەساڵی
2010دا لەعێراقەوە 18000 كەس ڕویان لەئەمریكا
كردووە، بەڵام تەنیا 9000 یان لەساڵی 2011دا
ڤیزایان پێدراوە.
شوارتز دەڵێ ڤیزای پەنابەری بەجۆرێك ناخرێتە
بەرنامەوە بەخێرایی خەڵك بهێنێتە ئەمریكا،
ئەمەش كێشە بۆ كەسانی وەكو (م.س) دروست دەكات.
ئەو گوتیشی "تەحەددی بەردەممان ئەوەیە، ئێمە
لەم مەسەلەیەدا لەبەردەم دۆخێكی نائاساییداین،
ئەویش چونكە ئەو عێراقییانە دەیانەوێت بێنە
ئەمریكا و ئەگەر لەعێراقدا بمێننەوە رووبەڕووی
مەترسی دەبنەوە. كەواتە ئێمە دەبێ چەندە
كاریان بۆ بكەین؟ من پێموایە دەبێ كاری زۆر
بكەین، زۆر لەوە زیاتر كە ئێستا دەیكەین،
بەڵام دەبێ ئەو تێگەیشتنەش هەبێت كە ئێمە
ناتوانین هەموو شتێك بكەین".
كەواتە (م.س) لەعێراق خۆی شاردۆتەوەو
خزمەكانیشی لەویلایەتی مینۆسۆتا نیگەرانن بۆی.
بەڵام رەتیشی دەكەنەوە ئەمریكا و سوپاكەی لەم
بارەیەوە رووبەڕووی رەخنە بكرێنەوە.
ئایا (م.س) بەداخە لەوەی كاری لەگەڵ
ئەمریكاییەكان كرد؟ (م.س) لەوەڵامدا دەڵێ
"نەخێر، من هەرگیز پەشیمان نابم لەوەی كارم بۆ
سوپای ویلایەتە یەكگرتوەكان كردووەو ئەگەر
دووبارەش بگەڕێنەوە دیسان كاریان لەگەڵ
دەكەمەوە و ئامادەم گیان بەخت بكەم لەپێناو
ویلایەتە یەكگرتوەكانی ئەمریكادا."
(م.س) گوتی كە ئەو نازانێ چۆن تێهەڵچونەوە
بكاتەوە لەبڕیاری ڕەتكردنەوەی پێدانی
ڤیزاكەیدا. ئەو دەترسێ لەوەی بچێت بۆ
باڵیۆزخانەی ئەمریكا لەبەغدا.
ئەو داوای ڤیزای پەنابەرێتیشی پێشكەش كردووە،
بەڵام جارێ هیچ وەڵامێك نییە. داواكاریی
پەنابەرێتی لەوانەیە چەندین مانگی بوێ تا
دەگەنە ئەنجام.
ئەو گوتی كاری بنچینەیی ئەو بریتیی دەبێ
لەپاراستنی خانەوادەكەی.
سەرچاوە: سایتی مینۆسۆتــــــــا پەبڵیك
ڕادیۆی ئەمریكایی، لە ئامادەكردنی دان گندەرسن
|
