سڤیل: ئافەند

هیوادارم كاك مەسعود و كاك نێچیرڤان زیاتر ئاوڕ لە باكوور بدەنەوە

"بكوژانی ئاپێ موسا دیارن، حكومەتی ئەو سەردەمە بەسەرۆكایەتی سولەیمان دەمیرێل و تانسۆ چیللەر و محەمەد ئاغار، بڕیاری كوشتنی باوكمیان دەركردووە، بۆیە ئەوانە بەبەرپرسیار دەزانم و دوای چەند رۆژی تر راپێچی دادگایان دەكەم، هەرچەندە ئەو بەكرێگیراو و جاش و خۆفرۆشەی موسا عەنتەری تیرۆركرد، كوردە، بەڵام ئەو لەخەیاڵی من دانیە، ژمارەیەك نیە حیسابی بۆ بكەم".
ئەمە قسەی (عەنتەر موسا عەنتەر)ە كە لە 22ی مانگی رابردوو دوای 43 ساڵ ژیان بەسەربردن لەتاراوگە گەڕایەوە توركیا و دوای تێپەڕبوونی 20 ساڵ بەسەر شەهیدكردنی نووسەر و سیاسەتمەدارموسا عەنتەری باوكی لە 20ی ئەیلولی ساڵی 1992 بۆ یەكەمین جار لەشارۆچكەی نوسەیبین چووە سەر گۆڕەكەی و نزای بۆ كرد.
عەنتەر موسا عەنتەر، كوڕی گەورەی موسا عەنتەر، لەساڵی 1941 لەئەستەنبۆڵ لەدایكبووە. لە 11ی نیسانی 1969 لەسەر راسپاردەی باوكی دەچێتە وڵاتی سوێد. بەڵام لەو بەروارە بەدواوە ناتوانێ بگەڕێتەوە توركیا، چونكە دەسەڵاتی ئەم وڵاتە لەساڵی 1972 ناسنامەی توركی لێدەسێنێتەوە. عەنتەر عەنتەر هێشتا بەتەواوەتی نازانێ بۆچی بڕیاری لێسەندنەوەی رەگەزنامەی لەبارەیەوە دراوە، دەڵێ "لەرۆژنامەیەك خوێندمەوە، كە هێرشم كردۆتە سەر باڵیۆزی توركیا و خزمەتی سەربازیم بەجێنەگەیاندووە، مافی هاوڵاتیبوونم لێسەندراوەتەوە؟ ئایا بەم بیانووە رەگەزنامە لەكەس سەندراوەتەوە؟ هیچ كاتێك لەكوردایەتی خۆم پاشگەز نەبوومەتەوە، بەكوردی لەدایكبووم، بەكوردی دەژیم، بۆ ئەمە رەگەزنامەیان لێ وەرگرتمەوە و رێگایان نەدا 43 ساڵ لەخۆشی و ناخۆشی كەسوكارم بەشداری بكەم".
وەكو خۆی دەڵێت خەیاڵی چیرۆكی گەڕانەوەی بۆ توركیا لەناكاو چەكەرەی كردووە، چونكە عەنتەر عەنتەر لەساڵی 1992 كاتێك باوكی تیرۆر دەكرێت، نامەیەك بۆ مەسعود یەڵماز سەرۆك وەزیری ئەو كاتەو هاوڕێی سەردەمی منداڵی و قوتابخانە دەنووسێ "دوای ئەم رووداوە بەمەبەستی بەشداریكردن لەپرسەی ئاپێ موسا نامەیەكم بۆ مەسعود یڵماز سەرۆك وەزیر و هاوڕێی سەردەمی منداڵیم نووسی، بەڵام وەڵامی نەدامەوە". دوای ئەم رووداوە هەرچەندە عەنتەر لەناخی خۆی پەرۆشی گەڕانەوەی وڵاتی دایكی بووە، بەڵام هەوڵی بۆنەداوە، چونكە پێیوابووە بەدیهێنانی ئەو ئاواتەی زەحمەتە.
عەنتەر عەنتەر، لەگیرسانەوەی لەسوێد، حازم كوردە رواندوزی خاوەنی هەوارگەی شنگلبانە دەناسێت و هاوڕێیەتی لەنێوانیاندا دروست دەبێت، تا دەگاتە ئەوەی عەنتەر لەبەهاری 2009 بێتە كوردستان و ببێتە بەڕێوەبەری ئەو پاركە، دیسان بەڕێككەوت لەهاوینی ساڵی رابردوو لەپێشانگای نێودەوڵەتی هەولێر چەند كوردێكی باكووری دەناسێت و داوایان لێدەكات لەشەنگلبانە ببنە میوانی. ئەوانیش داواكەی قبوڵ دەكەن، لەوبارەیەوە دەڵێت "كاتێك سەربردەی خۆم بۆ میوانەكانم گێڕایەوە، گوتیان بۆ نامەیەك بۆ سەرۆك وەزیری توركیا نانووسی، زۆر پێداگرییان كرد، منیش لەسەر داوای ئەوان نامەكەم نووسی". دەربارەی ناوەڕۆكی نامەكەشی عەنتەر دەڵێت "ئەی سەرۆك وەزیر ئەردۆغان، ئەگەر تۆ لایەنگری مەزڵوم و بێكەسانی، منیش یەكێكم لەوانەی 43 ساڵە رەگەزنامەی هاوڵاتیبوونی توركیم لێ سەندراوەتەوە، تەنیا داواكارم بچمە سەر گۆڕی باوكم و نزای بۆ بكەم، هەروەها گوتم جەنابی سەرۆك وەزیر، تۆ لەدیاربەكر گوتووتە (لەناخی خۆم زۆر باش هەست بە مەینەتی ئاپێ موسا دەكەم)، منیش هەست بەو كەموكوڕیە دەكەم. نامەكەم رادەستی میوانەكانم كرد".
لەو كاتەی عەنتەر عەنتەر وەڵامی پرسیارەكانی (سڤیل)ی دەدایەوە، حوسێن چەلیك جێگری سەرۆك وەزیرانی توركیا رایگەیاند، كە ئەوان بڕیاریان داوە رەگەزنامەی ئەم وڵاتە بدەنەوە عەنتەر عەنتەر، لەمبارەیەوە عەنتەر عەنتەر خۆشحاڵی خۆی دەردەبڕێت و دەڵێت "حوسێن چەلیك پێیوایە ئەمە پەڵەیەكی رەشە بەنێوچەوانی ئەوان، بۆیە هەوڵ دەدەن بە پێدانەوەی رەگەزنامە ئەو پەلەیە سپی بكەنەوە". لەبارەی دوای گەڕانەوەی بۆ باكوور و توركیا چی دەكات و ئایا سیاسەت دەكات یان تەنیا چاودێری رووداوەكان دەكات؟ عەنتەر جەخت لەوە دەكاتەوە، كە دوای گەڕانەوەی بەهۆی ئەو پێشوازیە گەرمە سەرسامبووە "شۆك بوومە هەموو رۆژێك تەلەفزیۆنەكانی توركیا بانگم دەكەن، لەگەڵ عوسمان بایدەمیر و سەڵاحەدین دەمیرتاش دادەنیشم، هەردووكیان برای منن، دەربارەی كێشەی كورد گفتوگۆیان لەگەڵ دەكەم، هەروەها دوای چەند رۆژێكی تر لەگەڵ چەند بەرپرسێكی پارتی دەسەڵات یەكتر دەبینین و خوێندنەوەی خۆمیان بۆ چارەسەری كێشەی كورد پێ دەڵێم".
لەبارەی چۆنیەتی چارەسەری كێشەی كوردیش عەنتەر پێیوایە كورد و تورك ئەگەر هەزار ساڵی تریش یەكتر بكوژن، ناتوانن ئەو كێشەیە چارەسەر بكەن "تاكە رێگا گەڕانەوەیە بۆ سەر مێزی گفتوگۆ، كورد كەللەڕەقە، هەرچەندە كەللەڕەقی كورد رەوایە، چونكە زوڵمی لێكراوە، بەڵام پێویستیشە هاوكاری حكومەت بكات لەمەڕ مەسەلەی كرانەوە، چەند رۆژێكە لە ماردین و باتمان دەگەڕێم، توشی یەك سەرباز نەهاتووم، ئەمە مایەی سەرسامیە!". عەنتەر لەدرێژەی قسەكانیدا دەڵێت "ناتوانم تا سەر لەسیاسەت دووربم، هەر دەگەڕێمەوە ناو سیاسەت، بەڵام پەلە ناكەم، زۆر بە وردی چاودێری دەكەم و حیسابی دەكەم، دواتر بڕیاری خۆم دەدەم، بەڵام كوڕی موسا عەنتەرم و درێژە بەكاروانی ئەو دەدەم".
لەبارەی رۆڵی سەركردایەتی كورد و حكومەتی هەرێمی كوردستان لەمەڕ پرسی كورد لە توركیا؟ عەنتەر ستایشی رۆڵی حكومەتی هەرێم دەكات "كاك مەسعود و كاك نێچیرڤان بۆ هەرێمی كوردستان زۆر باش كاردەكەن و كەموكوڕی نابینم، بەڵام هیوادارم زیاتر ئاوڕ لە باكوور بدەنەوە، بۆیە خوازیارم ئەو دەرفەتەم بۆ بڕەخسێ تاوەكو بیانبینم و خوێندنەوەی خۆمیان بۆ چارەسەری كێشەی كورد لەتوركیا بۆ باس بكەم".
ماوەی چەند ساڵێكە عەنتەر موسا عەنتەر لەهەرێمی كوردستان بەتایبەتی لەشارۆچكەی رواندوز نیشتەجێیە، ئەو زۆر سەرسامە بە خەڵكی ناوچەكە "رواندوز زۆر قسە لەسیاسەت ناكات، لەرواندوز پێم دەڵێن عەنتەری رواندوزی، منیش زۆر خۆشحاڵ دەبم. بۆیە سڵاو لەرواندوزیان دەكەم". لەبارەی شوێنی گیرسانەوەی لەدواڕۆژ؟ كوڕی گەورەی موسا عەنتەر دەڵێت "هاوڵاتی سوێدیمە، بەڵام لەسوێد ناگیرسێمەوە، كوردستان وڵاتی منە، زۆرم پێخۆشە لەرواندوز بمێنمەوە، بەڵام نوسەیبینش زێدی باب و باپیرانمە، بۆیە لەنێوان رواندوز و نوسەیبین دێم و دەچم، بەڵام نامەوێ بەتەنیا عەنتەری رواندوز و نوسەیبین بم، هەوڵ دەدەم ببمە عەنتەری سلێمانی و ئاگری و دێرسیم".