پێم خۆشە وەبیر خامنەیی بێنمەوە كە لەزیندان پێیگوتم لەژێر سێبەری حكومەتی ئیسلامی تاقە فرمێسكێك لەچاوی هیچ بێگوناحێك نایەتە خوار!!

سڤیل: ئەحمەد سەفا

هۆشەنگی ئەسەدی كە لەزیندانی ئێرانی سەردەمی شادا، لەگەل عەلی خامنەیی رێبەری ئێستای كۆماری ئیسلامی لەژوری تاكەكەسی هاوبەند بووە، پێیوایە كە دەسەڵات دەوری سەرەكی بینیوە لەگۆڕانی خامنەیی دا، بەپێی بۆچوونی ئەسەدی خامنەیی كاتی خۆی مەلایێكی لەسەرەخۆ و بەویقار بوو، كەچی ئێستا "سەركردەیەكی سوپایی تووڕەیە، كە جگە لەزمانی هەڕەشە، توندوتیژی و كوشتوبڕ چیتر نازانێت".
هۆشەنگی ئەسەدی كە بیست و پێنج ساڵ بەسەر ئەزمونەكانی لەزیندانی كۆماری ئیسلامیدا تێدەپەڕێ، دوای دە ساڵ دەرچونی لەئێران، ئێستا لەپاریس نیشتەجێیە، كتێبێكی بە ناوی (چەند نامەیێك بۆ ئەشكەنجەگەرەكەم) ی نووسیوە، كە لەبەشێكیدا بیرەوەری و دۆستایەتی خۆی لەگەڵ خامنەیی دەگێڕێتەوە، بەتایبەت دواین دیداری لەژوری تاكەكەسی زیندانی سەردەمی شادا، كە پێی گوتبوو باوەڕ بكە گەر ئیسلام بێتە سەر كار، دلۆپێك فرمێسك لە چاوی هیچ بێگوناحێك نایەتە خوار. ئەسەدی دوای نزیك بە كەمتر لە دە ساڵ لەو رۆژە، واتە ساڵی 1984 جارێكی تر دەخرێتەوە زیندان، بەڵام ئەمجارە زیندان، زیندانی كۆماری ئیسلامی ئێرانە و ئیسلام فەرمانڕەوایە و خامنەییش هەمەكار و دەسەڵاتدارە. ئەسەدی ئەمجارە شەش ساڵی پێدەچێ، دوو ساڵ لەژووری تاكەكەسیدا بەند دەكرێ و سەختترین ئەشكەنجەی لەسەر تاقی دەكرێتەوە، ئەو دوو ساڵەی بەردەوام فرمێسكی لەسەر چاوانە و وادە و بەڵێنەكانی خامنەیی وەبیر دێتەوە، سەیری زەمانە دەكات و بیر لەو گۆڕانە دەكاتەوە، كە بەسەر خامنەیی داهاتوە. ئەسەدی ماوەیەك لەمەوبەر بە رۆژنامەی "الشرق الاوسط"ی گوت "دەسەڵات وای لەخامنەیی كرد. ئێمە سەرەڕای دۆستایەتیێكی لەمێژینە، چ پێوەندییەكمان بەیەكەوە نییە، سەر بە دوو دنیای جیاوازین، حەزناكەم هەر خۆشی لێبدەم". ئەسەدی دوای بیستوپێنج ساڵ تێپەڕبوون بە سەر چركەساتانەی ئەشكەنجە و ژوری زیندانی تاكەكەسی دەڵێت "ئازارەكان لەبیر ناچنەوە، بەردەوام لەگەڵمن، بوون بە هاوڕێم، ئەوەندە بە ئێشن، كە پزیشك نووسینی ئەو كتێبەی لێ قەدەغە كردبووم، بەڵام من بەردەوام بووم لەسەری تا تەواوم كرد، بەراستی نوسینەوەی ئەو بەسەرهاتانەش هەر بەئازار بوو، بەیانیان كە دەستم بەنوسین دەكرد، دەتگوت لەسەرڕا ئەشكەنجە دەكرێمەوە. ئەسەدی لەكتێبەكەیدا دەگێڕێتەوە "رۆژێك لەژوری تاكەكەسیدا پاڵم دابۆوە، كە پیاوێكی لاوازی ریش رەش و عەینەك لەچاویان هاویشتە ژوورەوە، بە عەبای شانییەوە دیار بوو مەلایە، كە دانیشت گوتی: ناوم سەید عەلی خامنەییە، بەخێرهاتنم كرد، دوای ئەوە بەینمان خۆش بوو، قسەمان بۆ یەكتر دەگێڕایەوە، باسی شیعر و ئەدەب و فەلسەفەمان دەكرد، ئەو سەربوردەی خۆی بۆ دەگوتم، جارێكیان داستانی ژنهێنانەكەی بۆ گێڕامەوە، كابرایەكی زۆر بە هۆش بوو، شتی لەبیر نەدەچوو، لەسەر بەرماڵی نوێژ دەگریا، نێوانمان ئەوەندە خۆش بوو، كە منی گەنجی چەپڕەوی 25 ساڵە هۆگری مەلایەكی قسە خۆشی37 ساڵە ببم".
ئەسەدی لەشوێنێكی دیكەی كتێبەكەیدا دەنووسێ "خامنەیی جگەرەكێش بوو، هەر كەسەی رۆژێ جگەرەیێكی هەبوو، من ئەوەی خۆشم بۆ ئەو وەردەگرت، جگەرەكانی لەت دەكرد و بە وەخت دەیكێشا، تا بەشی بكا، رۆژێك بە یەكەوە ناردیانینە حەمام، خامنەیی فانیلە و شۆرتەكەی دانەنا، كە لێم پرسی بۆ دایاننانێی، گوتی پیاو (...)ی پیاوی تر ببینێ گوناحە، منیش قەولم پێدا روو وەرگێڕم تا خۆی دەشوات".
هەروەها ئەسەدی دەنوسێ "جارێكیان كە قسەمان دەكرد باسی چەپم كرد، پێی گوتم من تۆم پێ موسڵمانە، دەتوانم خوا لە دڵتدا ببینم، تەنانەت ئەوكاتەی باس لەئیلحاد دەكەی، بۆنی خوات لێدێ".
ئەسەدی و خامنەیی سێ مانگ زیاتر بە یەكەوە لە ژوورێكدا زیندانی بوون، لەو ماوەیەدا وا لەیەك نزیك بوون كە زۆر جار تەكبیریان دەكرد، كە لە دەرەوە دوای ئازادبوون لە كوێ یەكتر ببینن، ئەو تەكبیرەی كە قەت رووی نەدا و یەكتریشیان نەدیتەوە.
دوایین دیداری ئەسەدی و خامنەیی لە كتێبەكەدا ئاوا هاتوە "بەیانییەك ئێشكچی زیندان بانگی كردم، كە خۆ كۆكەمەوە و بەدوای دابڕۆم، خامنەیی كە گوێبیستی ئەمە بوو، هەستا سەرپێ و یەكترمان لە ئامێز گرت و دەلەرزی، چاكەتەكەی خۆمدایە، وەریگرت، بینیم فرمێسكی بە چاواندا دەهاتە خوارێ، یەكترمان كوشی، لەبن گوێچكەم بە چرپە گوتی "لەبیرت بێ كە لەژێر سێبەری حكومەتی ئیسلامی تاقە فرمێسكێك لەچاوی هیچ بێگوناحێك نایەتە خوار".
ئەسەدی لەكۆتایی بیرەوەرییەكانیدا دەنووسێ "باوەڕم وایە بزوتنەوەی ئێستای ئێران لەناخی زوڵم و زۆرییەوە سەری هەڵداوە و دەگاتە ئەنجام، 70%ی خەڵكی ئێران لەژێر 35 ساڵیان تەمەنە و دەسەڵاتدارانی مەلا سەرووی 70ساڵن، لەئەنجامی شەڕی نێوان جیلی كۆن و نوێ سیستەمێكی دیمۆكراتی لەئێراندا لە دایك دەبێت".
لەوەڵامی پرسیاری پەیامنێری (الشرق الاوسط)دا، كە لێی دەپرسێ ئایا پەیامێكت بۆ خامنەیی هەیە، گوتی "پێم خۆشە ئەو ساتەی وەبیر بێنمەوە كە بە گریانەوە لەبن گوێم چرپاندی "لەژێر سێبەری حكومەتی ئیسلامی تاقە فرمێسكێك لەچاوی هیچ بێگوناحێك نایەتە خوار".