سڤیل: سلێمانی

بەرپرسی لقی سەندیكای پزیشكانی هەولێر: هەر دكتۆرێـــــــك وا بــــــكات ســــــــزای دەدەم

هاوڵاتییان گلەیی لەو پزیشكانە دەكەن كە بە كۆمەڵ نەخۆشەكان بۆ پشكنین دەبەنە ژووری نۆڕینگەكانیان، كە توێژەرێكی كۆمەڵایەتی بە "دیاردەیەكی تا بڵێی دزێو" وەسفی دەكات و بەرپرسی لقی سەندیكای پزیشكانی هەولێریش لەبارەی ئەو دیاردەیەوە دەڵێ "بزانم هەر پزیشكێك ئەو كارە بكات سزای دەدەم".
شەماڵ ئەیوب، كە یەكێ لەو نەخۆشانەیە بۆخۆی لەسەردانیكردنی بۆ لای دكتۆر، بەسەری هاتووە كە چۆن لەكاتی چوونی بۆ ژووری دكتۆر، چەند كەسێكی دیكەش لەگەڵی چوونەتە ژوورەوە، دەڵێت "بەراستی ئەمە دیاردەیەكی زۆر ناشیرینە كە لەلای زۆر لەپزیشكەكان هەستی پێدەكرێت، چونكە دەبێتە هۆی ئەوەی كە نەخۆش لەكاتی باسكردنی نەخۆشییەكەی، جۆرێك لەشەرمی لا دروست بێت". شەماڵ، سەرەڕای باسكردنی ئەو جارانەی كە چۆتە لای دكتۆر و بەشەرمەوە باسی لەنەخۆشییەكەی كردووە، "بەتایبەتیش ئەو جارانەی كە ئافرەتی گەنجم لەگەڵ هاتۆتە ژوورەوە"، بەڵام ئومێدەواریشە كە ئەو دیاردەیە بنبڕ بكرێت، تاوەكو نەخۆش زیاتر سوود وەربگرێت، لەسەردانیكردنی بۆ لای پزیشك.
گومانی تێدا نییە كە بەهۆی دابونەریتی كۆمەڵایەتی ناو كۆمەڵگای كوردی، دیاردەكە ئەگەر جارێك بۆ پیاو ناخۆش بێت، وەكو ئافرەتەكان هێمای بۆ دەكەن، ناخۆشییەكەی بۆ ئافرەت دوو بەرابەرە. هەروەك فاتیمە عەبد دەربارەی دیاردەكە بۆ (سڤیل) گوتی "كۆمەڵگای ئێمە بەستراوە بەكۆمەڵێ دابونەریتی عەشیرەتگەری كە هەقوایە ئەگەر دكتۆرەكان خۆیان لەخەڵكی سادە بەرۆشنبیرتر دەزانن، رەچاوی ئەو لایەنە بكەن و ژن و پیاو بەیەكەوە نەكەنە ژوورەوە، بەڵام جێگای داخە كە زۆربەی پزیشكەكانمان سەیری تایبەتمەندییەكانی ناو كۆمەڵگای كوردەواری ناكەن و تەنها بیر لەپارە دەكەنەوە". فاتیمە، باسی لەوەشكرد كە ئەگەر دكتۆری باشی ئافرەت هەبێت، ئەوان هیچكات ئامادەنین بچنە نۆڕینگەی ئەو دكتۆرە پیاوانە، "بەڵام وەك دەبینین پزیشكی ئافرەتی پسپۆڕ بۆ نەخۆشییەكانی ئافرەت ژمارەیان زۆر كەمە".
كاروان فەتاح، خەڵكی ناو شاری هەولێرە و تەمەنی 33 ساڵە، ئەو پیاوە كە باوكی كوڕ و كچێكە و ماوەی پێنج ساڵە ژیانی هاوسەری بەیەكەوە ناوە، بەهۆی نەخۆشییە درێژخایەنەكەی چەند جارێك چۆتە وڵاتەكانی (ئوردەن و ئێران و سوریا)، لەبارەی جیاوازی نۆڕینگە پزیشكییەكانی وڵاتانی دەوروبەر لەگەڵ شارەكانی هەرێمی كوردستان، باسی لەوەكرد كە لەو وڵاتانەی ئەو سەردانیكردوون بەمەبەستی چارەسەری، هیچكات هەستی بەوە نەكردووە كە دكتۆر تەنها بۆ لایەنە ماددییەكەی خۆی گرنگی بەو دەدات و دەڵێت "لەو وڵاتانە بەتایبەت وڵاتی ئوردەن، پزیشك تەنها بەقسەكردن، بەشێك لەئازارەكانت سارێژ دەكات"، كاروان، هاوكات هێمای بەیەكێ لەو دكتۆرانەی (ئوردەن)یش كرد كە لەیەكەم دیدار و چوونی بۆ لای، تەنها قسەیان لەبارەی ژیان كردووەو رۆژی پاشتر لەبارەی نەخۆشییەكەی دكتۆر پرسیاری لێی كردووە. بۆیە وەك ئەو دەڵێت "نۆڕینگە پزیشكییەكانی ئێمە نەوەك بەئەوروپا، هێشتا زۆری ماوە بەراورد بەوڵاتانی دەوروبەریش بكرێت".
رۆژنامەنوسێكی كوڕ، لەبارەی دیاردەكە و ئاستی رۆشنبیری كۆمەڵگا، باسی لەوەكرد كە جگە لەناشارستانیبوونی دیاردەكە، هاوكات تاكەكانی كۆمەڵگای كوردیش نەگەیشتوونەتە ئەو ئاستەی كە ژن و پیاو ئازادانە لەبەرامبەر یەكتری، باس لەبەشێك لەجەستەی نەخۆشییان بكەن. ئەو رۆژنامەنووسە (شاخەوان شێخانی) دەشڵێت "هەموو نەخۆشێك، نەخۆشییەكەی جیایە لەگەڵ نەخۆشێكی دیكە، بۆیە بەمەبەستی چارەسەركردن و پشكنین و تێگەیشتن لەنەخۆشییەكەی دەچێتە لای دكتۆر، تاوەكو چارەسەری نەخۆشییەكەی بكات"، وەك هێماشی بۆكرد، هەم بۆ پزیشكەكە و هەم بۆ نەخۆشەكەش واباشترە كە بەبێ شەرم لەیەكتری قسەبكەن، بەڵام كاتێك دكتۆر چەند كەسێك بەیەكەوە دەباتە ژوورەوە، "نەخۆش لەبەر شەرم و دكتۆریش لەبەر لایەنە ماددییەكەی، حەزدەكەن دیدارەكەیان زوو كۆتایی پێبهێنرێت".
سڤیل، سەردانی دوو لەو نۆڕینگە پزیشكیانەی كرد كە دكتۆرەكە چەند نەخۆشێك بەمەبەستی چارەسەری، بەیەكەوە دەباتەوە ژوورەوە، بەڵام هیچكام لەو دوو دكتۆرە ئامادە نەبوون لەبارەی دیاردەكەی ناو نۆڕینگەكانیان قسەبكەن.
دكتۆر حەیدەر، بەرپرسی لقی سەندیكای پزیشكانی هەولێر، دەربارەی ئەو دكتۆرانەی كە چەند نەخۆشێك بەیەكەوە دەبەنە ژورەوە و بۆچوونی ئەوان لەسەر دیاردەكە، بۆ (سڤیل) گوتی "ئەگەر دكتۆرێكی پسپۆڕ چوار چوار نەخۆش بباتە ژوورەوە و بەڵگەش هەبێت لەسەر ئەوشتە، ئەوە من سزای دەدەم و سزاشم داوە"، هاوكات چەند جارێك ئەو رستەیەی دووبارە كردەوەو گوتی "بەڵێنت پێدەدەم كە سزای دەدەم". لەوەڵامی ئەو پرسیارەش كە ئاخۆ ئەو دیاردەی نۆڕینگە پزیشكییەكان، چەندە لەرووی پزیشكییەوە رێگا پێدراوە؟ دكتۆر حەیدەر، گوتی "ئەو دیاردەیە وەكو سلوكی تەندروستی قبوڵ نییە، وەكو مافی نەخۆشیش قبوڵ نییە، ئینجا لایەنی سایكۆلۆژی و كۆمەڵایەتیش پەیوەستە بەوە، جگە لەوەش هەر نەخۆشێك كێشەی تایبەت بەخۆی هەیە". بەرپرسی لقی سەندیكای پزیشكان لەهەولێر، گوتیشی "من داوا لەهاوڵاتیان دەكەم، ئەو كەسەی گلەیی لەو دكتۆرە هەیە كە نەخۆش چوار چوار دەباتە ژوورەوە، با جارێكی دیكە نەچێتەوە لای".
توێژەری كۆمەڵایەتی (جێگر سلێمان) لەبارەی دیاردەكەی ناو نۆڕینگە پزیشكییەكانی هەرێم بۆ (سڤیل) گوتی "ئەگەر لەڕووی سۆسیۆلۆژییەوە سەیری دیاردەكە بكەین، هەتا بڵێین دیاردەیەكی دزێوە". گوتیشی "ئەگەر بەپێوەری ئەخلاقی سەیری دیاردەكە بكەین، هەتا بڵێی دیاردەیەكی ناشرینە و ئەخلاقی كۆمەڵگا قبوڵی ناكات". ئەو توێژەرە، ئەوەشی گوت كە "دەبێ ئەوە بزانین كە ئەو كچە یان ئەو ئافرەتەی كە سەردانی نۆڕینگەی پزیشكی دەكات، بەهۆی بوونی چەند كەسانێك لەڕەگەزی نێر، ڕەنگە شەرم دایبگرێت و لەو كاتەدا نەتوانێ بەتەواوەتی و ڕاشكاوی باس لەنەخۆشییەكەی خۆی بكات". جێگر، ئەوەشی بۆ (سڤیل) خستەڕوو كە سەرەڕای شەرمكردنی نەخۆش، بەتایبەت ئافرەت، "دكتۆریش بەهۆی سەرقاڵی لەگەڵ ئەو كەسانەی لەنۆڕینگە پزیشكییەكەن، بەشێوەیەكی باش بیروزەینی لەلای نەخۆشەكە نابێت، بۆیە هەر ئەمەشە كە زۆرجار گرفتی ناحاڵیبوون روودەدات و دكتۆر لەنوسینی دەرمان، رەنگە هەڵە دەكات و داودەرمانی نەخۆشێك بۆ یەكێكی دیكە بنوسێت".