سڤیل: م. جەمال كەمال

لەو ماوانەی دواییدا لەوڵاتەكەمان مۆدەیەكی تازە لەنێو وەرزشواناندا بڵاوبۆتەوە، ئەویش نمایشكردن و دەرخستنی ماسولكەكانیانە، لەڕێگای بەكارهێنانی دەزری تایبەت بۆ زەقكردنەوە و دەرخستنی ماسولكەكانی برایسبیس و ترایسبس و سەرشانەكانیان، تا بەشێوەیەكی گەورە و بەرچاو دەربكەون. تێبینیم كردووە ئەم مۆدەیە بەشێوەیەكی ناسروشتی پەنای بۆ دەبردرێت، یا بۆ خەڵەتاندن و سەرنجڕاكێشانی بەرامبەر، یا وەك كێبڕكێی نێوان وەرزشوانان، هەموو لایەكیان هەوڵی دەرخستنی گەورەیی شان و پیلی خۆیان دەدەن بۆ بەرامبەرەكەیان، هەموو ئەمانەش لەسەر حسابی تەندروستی خۆیانە، بەهۆی بەكارهێنانی خراپترین رێگا و ئامراز بۆ گەورەكردن و شێواندنی شێوەی قۆڵ و باسكیان، تەنانەت بەشێك لەوەرزشوانان قوربانی بەقۆڵ و باسكی خۆیان دەدەن و دەیخەنە بەردەم مەترسی نەشتەرگەرییەوە، بەهۆی رەقبوون یا هەوكردن یا خوێنبەربوون یا لەبەریەك هەڵوەشانی ماسولكەی بایسبس، یا دەرەنجامی خراپی تر لەو نەخۆشیانەی دووچاری ئەو كەسانە دەبێتەوە، كە ئەم دەرزیانە بەكار دەهێنن، چونكە بەشێكیان دەرزی تایبەت و بەهێز بەكاردەهێنن، كە لەبنچینەدا بۆ ئاژەڵ بەكاردەهێنرێت، وەك AD3، بەشێكی تریشیان تاندرلوت و تیستیرون بەكاردەهێنن، یا ئاوی موقەتەر لەرێگای دەرزیەوە لەقۆڵ و باسكیان دەدەن، بەشێكی تریشیان(Escleau) سایكلین بەكاردەهێنن، كە دەبێتە هۆی هەوكردنێكی بەهێز لەماسولكەدا، دوای ئاوسانی بەقەبارەی چەند سەنتیمەترێك. هەندێكی تریش لەوەرزشوانان (سیناسول) بەكاردەهێنن، كە مادەیەكی سلیلكۆنەو لەماسولكەی یایسبیسدا بۆماوەیەكی زۆر درێژ رەق دەبێت، هەموو ئەمانەش لەپێناو دەرخستن و نمایشكردنی ماسولكەكانیانە، لەرێگای لەبەركردنی جلی تەسلكەوە، كە بەجەستەیانەوە دەنوسێت و جۆرێك لەجوانی دەدات بەماسولكەكانیان.
ئەم حاڵەتە دەبێتە هۆی ئیدمانبوون و زۆربوونی رێژەی ئەم دەرزیە لەجەستەیاندا، هەروەها دەبێتە هۆی شێواندنی شێوەی ماسولكەكانی یایسبیس و ترایسبیس و سەرشانەكان و ئەو شوێنانەی تریش كە دەرزیان لێدەدرێت، بەهۆی ئەمەشەوە هەندێك جار حاڵەتی مردنی لەناكاو لەنێوان هەندێك لەم وەرزشوانانە هەست پێدەكەین، یا كورتی تەمەنیان لەوەرزشكردندا، واتە چواریەك یا سێیەكی تەمەنیان لەوەرزشدا بەسەردەبەن و پاشان لەتەمەنێكی زوودا وازدەهێنن، بەهۆی ئەو نەخۆشیانەی دووچاریان دەبێت، یاخود بەهۆی شێوانی شێوەی ماسولكەكانیان، كە رێگر دەبێت لەبەردەوامبوونیان لەسەر وەرزش.
پێویستە وەرزشوانان لەوە تێبگەن، كە ئەم جۆرە لەدەرزی و دەرمانانە چەندە زیان بە ماسولكەكانی قۆڵ و باسكیان دەگەیەنێت، بۆیە لێیان دەپرسم ئایا هەڵئاوسانی ماسولكە هێندە دەهێنێت ژیانتانی بۆ بخەنە مەترسیەوە؟