مرۆڤ لەلایەنی ڕۆحیی خۆیدا مانای ژیان و هیوا و ئاسودەیی و ئاشتی ناوەكی دەبینێتەوە. زۆربەی خەڵكی لایەنی ڕۆحییان بەئایینەوە پەیوەست دەكەن، كەچی هەندێكی تر لایەنە ڕوحییەكانیان لەمۆسیقا، هونەر، هاوڕێیەتی سروشت و ژینگە یان دابونەریتەكانیاندا دەبیننەوە. تۆ هەركامیان پەیڕەو دەكەیت، گرنگ ئەوەیە ئەم لایەنە لەژیانتدا دوور نەخەیتەوە، چونكە ئەو كارە فشاری دەروونی و كێشەی تەندروستیی ترت بۆ دەنێتەوە.
لایەنی ڕۆحی چ پەیوەندییەكی بەتەندروستییەوە هەیە؟
تائێستا بەوردی سروشتی ئەم پەیوەندییە نەدۆزراوەتەوە. بەڵام زۆربەی پسپۆڕانی تەندروستی پێیانوایە جەستە و عەقڵ و ڕۆح پەیوەستن و باری تەندروستیی هەریەكەیان كار لەدوانەكەی تر دەكات.
هەندێ لێكۆڵینەوە ئەوە پشتڕاست دەكەنەوە، كە ئەو مەعنەویەتە بەرز و ئاسودەیی و ئارامییەی لەپیادەكردنی عیبادەتی دینی و یۆگا و پرۆسە ڕۆحییەكانی ترەوە دەستدەكەون، پرۆسەی چاكبوونەوە لەنەخۆشی خێراتر دەكەن و هەستكردن بەتەندروستیی زیاتر دەكەن. پتەوكردنی لایەنی ڕۆحی ڕاستەوخۆ نەخۆشیت لەكۆڵ ناكاتەوە، بەڵام هەندێ كێشەی تەندروستیت لێ دووردەخاتەوە و هەستكردنت بەخۆشبەختی دەداتێ و یارمەتیت دەدات، تا لەگەڵ فشاری دەروونی و نەخۆشیی جەستەیی و ترسان لەمردندا ئاسانتر هەڵبكەیت.
چۆن تەندروستیی ڕۆحیم بپارێزم؟
*بەدوای ئەو شتەی ژیانتدا بگەڕێ، كە هەست دەكەی ئەو دەتوانێ ئاسودەیی ناخ و ئاشتیی ناوەكی و هێز و خۆشەویستی و پەیوەستبوونت دەداتێ.
*هەمو ڕۆژێك كاتێك تەرخان بكە بۆ پیادەكردنی پرسێك یان زیاتری ڕۆحی، وەك نوێژكردن و عیبادەت، یۆگاكردن، پیاسەیەكی ئارام لەسروشتێكی پاكدا، خۆبەخشیی لەكارێكی خێرخوازی یان خزمەتگوزاریی مەدەنیدا، تەرخانكردنی كاتێكی ئارام بۆ بیركردنەوە یان بەشداری لەڕێوڕەسم یان كارێكی خزمەتگوزاریی ئایینی، یاخود گوتنی گۆرانیی بۆ خۆت و ...