5ی ئەم مانگە ئاژانسی هەواڵی فرانس پرێس ئەنجامی لێكۆڵینەوەیەكی زەبەلاحی بڵاوكردەوە كە بە هەماهەنگیی زانایانی بریتانی و ئیتالی لەسەر 1،3 ملیۆن كەس ئەنجامدراوە و دەری خستوە نوستنی كەمتر لە 6 كاتژمێر لەشەوێكدا ئەگەری مردنی پێشوەخت زیاد دەكات.
بەپێی داتاكانی ئەو لێكۆڵینەوە بڕواپێكراوە ئەوانەی لە 6 كاتژمێر كەمتر لە شەوێكدا دەنون ئەگەری مردنی پێشوەختیان 12% زیاد دەكات. فرانسیسكۆ كاپوشیۆ سەرۆكی تیمی لێكۆڵەرانی بریتانیا دوای ڕاگەیاندنی ئەنجامەكە بە ئاژانسی فرانس پرێسی وت "كەمخەوی توشی شەكرە و قەڵەوی و بەرزیی پەستانی خوێن و كۆلیسترۆلتان دەكات و زیادكردنی ئەگەری مردن بەهۆی كەمخەوییەوە بۆ كۆمەڵێك گۆڕانكاری هۆرمۆنی و میتابۆلیكی دەگەڕێنەوە". بەپێی زانیارییەكانی تیمەكە 20%ی خەڵكی ئەمەریكا كەمتر لە 5 كاتژمێر لە شەو و ڕۆژێكدا دەخەون. زاناكان وتیان پەیوەندییەكی ڕاستەوخۆ و بێگومان لەنێوان كەمخەوی و زوو مردندا هەیە، بەڵام خەوتنی زیاتر لە 9 كاتژمێریش دیسان زیانمەندە و ئەگەری مردن زیاتر دەكات، بۆیە پسپۆڕان ئامۆژگاریتان دەكەن زیاتر لە 6 سەعات و كەمتر لە 9 سەعات لە شەوو ڕۆژێكدا بخەون.