دیارە مەبەست لەوەرزشكردن بەهێزكردنی ماسولكە و لەدەستدانی چەوری زیادەی لەشە، هەتا ماسولكەكان بەهێز و گەورەتر بن، وزە زیاتر بەكاردەهێنرێت و كەمتر لەشێوەی چەوریدا خەزن دەكرێت. زانكۆی ماك ماستەری كەنەدایی سەرپەرشتی لێكۆڵینەوەیەكی كرد، كە تێیدا سەرپەرشتیی و چاودێری دوو گروپ لەژنانیان دەكرد، كە هەمان جۆر وەرزشیان دەكرد و دوو كاتژمێر پێش وەرزشكردن هیچ شتێكیان نەدەخوارد جگە لەئاو، بەڵام دوای وەرزشەكە گروپێكیان دوو پەرداخی گەورە (هەر پەرداخەی 250 میللیلیتر) شیریان دەخواردەوە و گروپەكەی تر هەمان قەبارە خواردنەوە وزەبەخشە وەرزشییەكانیان دەخواردەوە كە شەكری دەستكردیان تێدایە. دوای سێ مانگ لەچاودێری زانایان بۆیان دەركەوت، ئەو گروپەی شیریان دەخواردەوە ماسولكەیان گەورە و بەهێزتر و چەوری لەشیان كەمتر بوو كێشیان زیادی نەكردبوو، بەپێچەوانەی گروپەكەی تر. پسپۆڕان وا شرۆڤەی زیادنەكردنی كێشی شیرخۆرەكانیان كرد، كە ئەمە بەهۆی ئەوەوە بووە كە ئەوان لەلایەكەوە كێشیان بەهۆی گەورەبوون و بەهێزبوونی ماسولكەكانیانەوە زیادی كردوە، بەڵام لەلایەكی ترەوە بەهۆی لەدەستدانی چەورییەوە كێشیان ڕێك بۆتەوە. ئەنجامدەرانی لێكۆڵینەوەكان دەڵێن ئەم كاریگەرییە ئەرێنییەی خواردنەوەی شیر بۆ ئەوە دەگەڕێتەوە كە شیر سەرچاوەیەكی دەوڵەمەندی كالیسیۆم و پرۆتین و ڤیتامین (دی)یە.
ئەو زانكۆیەی هەستاوە بەم لێكۆڵینەوەیە، لەڕیزی 100 باشترین زانكۆكانی جیهانە و پشت بە داتاو لێكۆڵینەوەكانیان دەبەسترێ. ئەنجامی ئەم لێكۆڵینەوەیەیان لەسەر سایتی مێدیكاڵ نیوز تودەی لە 28ی ئایاری 2010 بڵاوبوەوە و بڕیارە لە ژمارەی مانگی حوزەیرانی گۆڤاری Medicine and Science in Sport and Exercise دا بڵاوببێتەوە.