لەساڵی 1990 ەوە لەئەمەریكا ئەوە قەدەغەكراوە جیوە بكرێتە كرێمەكانی پێستەوە، چونكە ئەم جیوەیە لەپێستدا هەڵدەمژرێت و دەگاتە خوێن و سەرەنجام وەك ماددەیەكی ژەهرین گەلێ كاریگەریی نەرێنی لەسەر گورچیلە و كۆئەندامی دەمار دروست دەكات. ڕۆژنامەی شیكاگۆ تریبیونی ئەمریكی ئاشكرای كرد ئێستا گەلێك لەو كۆمپانیایانەی كەرەستەی جوانكاری پێست دروست دەكەن، ماددەی جیوە دەكەنە كرێمەكانیان و ئەو كرێمانەش بەڕێگەی جیاواز دەگەنە ئەمریكا. دوای وروژانی ئەم بابەتە، بەرنامەی خۆراك و دەرمانی ئەمریكی بڕیاری بەدواداچونی وردی دا و داوای لەئەمریكییەكان كرد، هیچ كرێمێكی سپیكردنەوەی پێست بەكار نەهێنن، ئەگەر ئاماژەی بەرنامەی خۆراك و دەرمانی ئەمریكی لەسەر نەبێت. لێرەوە داوا لەهاوڵاتیانمان دەكەین، وریاییەكی زۆر بنوێنن لەبەكارهێنانی كرێمی پێستدا و بێ ڕاوێژی دكتۆر كرێمی سپیكردنەوە بەكارنەهێنن. ئەو زانیارییانەی لەسەر قاوغی كرێمەكانن، بێ سەلمێنرانیان لەلایەن دەزگا زەبەلاحە تەندروستییەكانی وەك (بەرنامەی خۆراك و دەرمانی ئەمركی FDA) نرخێكی ئەوتۆیان نییە و نابێ پشتیان پێ ببەسترێ.