لەگەڵ بەرەوپێشچونی تەمەندا، هەموو ژنان توشی تەمەنی نائومێدی دەبن، كە تێیدا ئاستی هۆرمۆنی ژنانە بەشێوەیەكی گەورە دادەبەزێ و ئیتر سوڕی مانگانە نامێنێ و ئەگەری توشبوون بەنەخۆشییەكان زیاد دەكات. ئەوەی لەم بارەیەوە نوێ بوو، لێكۆڵینەوەیەكی بەریتانی بوو كە 17ی ئەم مانگە لەگۆڤاری The New England Journal of Medicine دا بڵاوبوەوە ئاماژە بەوە دەكات، كە هەندێ پیاوانیش لەگەڵ بەرەوپێشچونی تەمەندا توشی تەمەنی نائومێدی دەبن، بەوەی ئاستی هۆرمۆنی نێرینەیان دادەبەزێ. لێكۆڵینەوەكە لەلایەن زانكۆی مانچستەری بەریتانییەوە لەسەر 3169 پیاو لەهەشت وڵاتی ئەوروپییەوە و لەنێوان تەمەنەكانی 40-79 ساڵیدا ئەنجامدراوە. لێكۆڵەران نیشانەكانی تەمەنی نائومێدی پیاوانیان كرد بە سێ گروپەوە: نیشانە سێكسییەكانی وەك كەمبونەوەی ئارەزوی سێكسی، نیشانە جەستەییەكانی وەك زوو ماندوبوون و نەتوانینی ڕێكردن بۆ زیاتر لەكیلۆمەترێك، نیشانە دەروونییەكانی وەك خەمۆكی و هەستكردن بە ماندویی. پسپۆڕان بۆیان دەركەوت دەركەوتنی ئەم نیشانانە بەگشتی لە 2%ی حاڵەتەكاندا پەیوەندی بە كەمبوونەوەی ئاستی هۆرمۆنی نێرینە هەیە و پێدەچێ ئەم توشبوانە سود لە وەرگرتنی هۆرمۆنی پیاوانە وەربگرن. بیرمان نەچێ نەمان و كەمبونەوەی ئارەزوی سێكسی بەڕێژەیەكی بەرز هەیە، بەڵام دەكرێ بەهۆی نەخۆشی دیكەوە هەبێ. واتە لەو كەسانەی تردا هۆكارەكە كەمبوونەوەی ئاستی هۆرمۆنی نێرینە نییە، بەڵكو هۆكارگەلێكی تری لەپشتە وەك نەخۆشیی و ڕەقبونی بۆرییەكانی خوێن و نەخۆشیی دەمارەكان. قەڵەوی و وەرزشنەكردن و فشاری دەرونی، كە لە كێشەكانی مرۆڤی ئەم سەردەمەن، ڕێگە خۆشكەری گەورەن بۆ نەخۆشییەكانی بۆڕی خوێن و شەكرە و جەڵتە كە ئەمانیش لای خۆیانەوە لەهۆكارە سەرەكییەكانی لاوازبونی ئارەزوی سێكسی و نیشانە هاوشێوەكانی تری تەمەنی نائومێدی پیاوانن، بۆیە ناكرێ هەركەس ئەو نیشانانەی هەبێ، كە باسكران، وا گومان بكات كە توشی نائومێدیی پیاوانە هاتووە.