هەستكردن بە ماندوێتی كێشەیەكی بڵاوە، بەتایبەت لەناو ئافرەتاندا. ئەمانە هۆیە بەربڵاوەكانی ئەو هەستكردنەن:

1-كەمخوێنی: بەهۆی ڕۆیشتنی خوێنی زۆر لە سوڕی مانگانەدا، یان بەهۆی گرێی منداڵدانەوە یاخود خوێنبەربوونی تری ناوەكی لەش. ئەمە جگە لە بەدخۆراكی و نەخۆشییە درێژخایەنەكان.
2-كەمچالاكی ڕژێنی دەرەقی: ڕژێنی دەرەقی لە ناوەڕاستی ملدا كۆنتڕۆلی پێكهێنانی وزەی لەش دەكات، كەمی چالاكی ئەم ڕژێنە، ماندوێتی دروست دەكات. كەمچالاكی ڕژێنی دەرەقی دەكرێ گەلێ نیشانەی تری لەگەڵ بێ وەك خاو و خلیچكی ئەندامەكانی لەش و هەستكردن بە خەمۆكی.
3-هەوكردنی كەناڵەكانی میز: ئەم نەخۆشییە باوەی ژنان مەرج نییە هەر بە میزی بە ئازار و سوتانەوەی دەرچەی میز خۆی بنوێنێ، لە هەندێ حاڵەتدا هەستكردن بە ماندوێتی تاكە نیشانەی حاڵەتەكەیە.
4-زۆر بەكارهێنانی ماددە كافایینییەكان: وەك چا و قاوە و نسكافە و كۆلا.
5-پێنەكەوتنی خۆراك: ئەوەی خۆراكێكت پێناكەوێ و لەشت خۆشی ناوێ، دەكرێ تە نها بە هەستكردن بە ماندوێتی خۆی بنوێنێ.
6-ناڕێكیی خەو: لەم میانەیەدا كەمخەوی تاوانباری یەكەمە. بەڵام هەندێ كەس خەوی تەواویشیان هەیە و هەر هەستیش بە ماندوێتی دەكەن، لەم بارەدا پرخە پرخی زۆر لەكاتی خەودا كە بە شێوەیەكی كاتی هەناسە دەوەستێنێ، دەبێتە هۆی ئەوەی ڕۆژی پاشتر هەست بە ماندوێتی بكەی.
7-نەخۆشییەكی دەستنیشاننەكراوی دڵ: دەكرێ تاكە نیشانەی نەخۆشییەكی دەستنیشاننەكراوی دڵ ئەوە بێ هەمیشە هەست بە ماندویی بكەی.