|
 لەبیرچونەوە
دەكرێ بەشێكی زانیارییەكان و هەستەكان
بگرێتەوە، یان سەرجەمی زانیارییەكان و
هەستەكان بخاتە مەترسی. دەشكرێ كاتی یان
هەمیشەیی، كورتخایەن یان درێژخایەن بێت.
جۆرەكەشی بەپێی ئەو ناوچەیەی لە مێشكدا كاری
لێكراوە دەگۆڕێت.
هۆیەكانی:
* فشاری دەروونی.
*حاڵەتە دەرونییەكانی وەك خەمۆكی و
شیزۆفرینیا.
*وەك بەشێك لەپرۆسەی چوونە تەمەن: خانەكانی
دەماخ وردە وردە دەمرن و ئەمەش وا دەكات ئاسان
زانیاری لە مێشكدا خەزن نەكرێت و ئاسانیش
نەهێنرێتەوە.
*بەركەوتنی زەبر بە مێشك.
*جەڵتەی دەماخ.
*چەند جۆرێكی فێ لێهاتن.
*هەندێ جۆری دەرمان: وەك ڤالیۆم و
هاوشێوەكانی. لێكۆڵینەوە نوێیەكان ئاماژە بە
ڕۆڵی نەرێنی حەبەكانی دژە چەوریش دەكەن لەم
میانەیەدا.
*هەبونی وەرەم یان هەوكردن لەناو سەردا.
*بەدخۆراكی: وەك كەمی ڤیتامین بی 12 و
ڕەگەزەكانی تری وەك زینك و مس و ڤیتامین سی.
* زیادەڕەویكردن لە خواردنەوە كحولییەكان.
نیشانەكانی:
لەوانەیە نیشانەكانی سادە و ساكار بن، وەك
لەبیرچونەوەی ناو و بەروارەكان، یان زوو زوو
هەڵەكردنی ڕێگاوبان، بەڵام لەوانەشە هێندە
توند بن، كە كەسەكە كردارە ڕۆژانەكانی وەك
ئوتومبێل لێخوڕینی بیر بچێتەوە.
دەستنیشانكردن:
پزیشك بەپرسیاركردنێكی ورد لە نەخۆشەكە دەست
پێدەكات. پاشان پشكنینی دەرونی و دەماری
دەكات. دوای ئەمانەش ئەگەر پێوبست بكات، داوای
هێڵكاریی كارەبایی مێشك، یان سیتی سكان
(ئەشیعەی تەنوری) مێشك، یاخود ڕەنینی
موگناتیسی مێشك دەكات، بۆ دەستكەوتنی زانیاری
زیاتر و گەیشتنە دەستنیشانكردنی هۆكاری
لەبیرچونەوە لە كەسەكەدا.
رێگاگرتن لەتوشبوون:
1- بۆ ڕێگاگرتن لەبەركەوتنی زەبر بە مێشكت
لەكاتی روودانی كارەساتی ئوتومبێلدا، هەمیشە
پشتێنی سەلامەتی ببەستە و دڵنیابە لەكاركردنی
ئێرباگی ئۆتۆمبێلەكەت.
2- رێگا بگرە لە روودانی جەڵتەی دەماخ: ئەویش
بە كۆنترۆڵكردنی فشاری خوێن و شەكرە و قەڵەوی.
3- خۆراكت هەمەڕەنگ بكە و لەبەدخۆراكی بەدوور
بە.
4- دووركەوتنەوە لەخواردنەوە ئەلكهولییەكان و
زیادەڕەوینەكردن لەبەكارهێنانیاندا.
5- دووركەوتنەوە لەجگەرەكێشان.
6- وەرزشی ڕۆژانە بۆ ماوەی نیو كاتژمێر.
7- ئارامكردنەوەی دەروون و دوركەوتنەوە
لەفشارە دەروونییەكان: خەوی تەواو و عیبادەت و
یۆگا و مۆسیقای ئارام.
8- دروستكردنی لیست بۆ كارە ڕۆژانەكانت.
9- راهێنان بە مێشك: وەك شیكاركردنی تۆڕە وشە،
شەترەنج و یارییە هاوشێوەكان.
چارەسەر:
بەپێی هۆیەكەی دەگۆڕێت. هەر لەگۆڕینی ستایلی
ژیانەوە تا پێدانی چارەسەری پزیشكی و دەرمانی.
|
