نەخۆشی چیا كۆمەڵە نیشانەیەكە كە توشی هەندێ لەو كەسانە دەبێت، كە هەڵدەگەڕێنە سەر چیا، بەتایبەت ئەگەر چیاكە لە 2000 مەتر بەرزتر بێت.
نیشانەكانی:
1- نیشانە مامناوەندەكان:
*خەوزڕان *سەرئێشە و گێژبوون *هەست بە ماندوێتی كردن *نەمانی ئارەزوی خواردن *دڵتێكهەڵاتن و ڕشانەوە *خێرالێدانی دڵ *تەنگە نەفەسی.
2- نیشانە توندەكان:
*شینبوونەوە *توندبوونی سنگ *خەڵەفان *كۆكە *هەڵهێنانەوەی خوێن لەگەڵ كۆكەدا *نزمیی ئاستی هۆشیاری *تەنگەنەفەسی تەنانەت لەكاتی پشوشدا.
هۆی ئەم حاڵەتە:
لەبەرزاییەكاندا هەم فشاری هەوا كەم دەبێتەوە و هەم ڕێژەی ئۆكسجین كەم دەكات. بەمەش ڕادەیەكی كەمتری ئۆكسجین دەگاتە ئەندامەكانی لەش، بەتایبەت: سی، مێشك و دەمار، دڵ و ماسولكەكان. بەگوێرەی ئەو ئەندامەی كاری لێكراوە و ڕاددەی كارلێكرانەكەی، نیشانەكانی حاڵەتەكە لەمامناوەندەوە تا توند دەگۆڕێن و ئەگەر چارەسەر نەكرێت لەوانەیە مردنی لێبكەوێتەوە. خێرا سەركەوتن و زۆر خۆماندوكردن لەبەرزایی چیاكاندا نیشانەكان قورستر دەكات، بەتایبەت ئەگەر كەسەكە لەناوچەیەكی تەختاییدا بژی.
دەستنیشانكردن:
گوێگرتن لەسنگی كەسەكە بە بیستۆكی پزیشكی نیشانەكانی كۆبوونەوەی ئاو لە سیدا دەردەخات. لەوانەیە پێویست بەگرتنی تیشكی سینی سنگ بكات.
چارەسەر:
لەگەڵ دەركەوتنی نیشانەكاندا پێویستە كەسەكە بەرەو نزماییەكان بێتە خوارەوە. ئەگەر هەبوو، ئۆكسجین بدرێتە كەسەكە. دەركەوتنی نیشانە توندەكان پێویستی دەكات كەسەكە بگەیەنرێتە نەخۆشخانە.
ئاڵۆزكارییەكان:
*نەمانی هۆش (غیبوبە).
*ئاوسانی مێشك.
*جێگاگیرانی چیكڵدانەكانی هەوا لەسیدا بە ئاو.
ڕێگاگرتن لە توشبون:
*بە پەلە بە چیادا هەڵمەگەڕێ. *لەشوێنە زۆر بەرزەكاندا مەخەوە. *ئەگەر هەستت بە نیشانەكان كرد، وەرە خوارەوە. *ئەگەر كەمخوێنیت، مەترسی زیاترت لەسەرە، بۆیە تا چارەسەری نەكەیت زۆر سەرمەكەوە. *شلەمەنی زۆر بخۆرەوە كاتێ خۆت ماندو دەكەیت و سەردەكەویتە سەر چیا. *لەخواردنەوەی كحولی دوور بكەرەوە.