رەمەزانی ئەمساڵ لە وەرزێكدایە كە ئێجگار گەرمە و رۆژگارێكی ئەوتۆیە كە دەگاتە 16 سەعات. بۆیە گرنگە ئاگات لەباری تەندروستیت بێت. ئەمانە هەندێ ئامۆژگارییە بۆ هەمو لایەك:
1- ئەگەر هەر حاڵەتێكی تایبەتی تەندروستیت هەیە، ڕاوێژ بە پزیشك بكە، كە ئاخۆ ڕۆژو زیان لە تەندروستیت دەدات؟
2- ئەگەر تەنانەت تەندروستیشی، بەرنامەیەكی ئەوتۆ بۆ ژەمەكانی ڕەمەزان دابڕێژە كە تێیدا بڕی پێویستی ڕەگەزە خۆراكییەكان و شلەمەنی پێویست پێشكەش بە جەستەت بكەیت.
3- پارشێو بكەن: پارشێو گرنگترین ژەمی رۆژانی رەمەزانە و نابێ پشتگوێ بخرێ. زۆر گرنگە لەپارشێودا خۆراكی پرۆتینی، كاربۆهێدراتی ئاڵۆز و بڕێكی زۆر ئاو بخۆنەوە. بۆ نمونە: هێلكەیەك، نانێك، چەند قاشە پرتەقاڵێك، چەند گوێزێك و چەند پەرداخێك ئاو.
4- لە سەعاتە هەرە گەرمەكانی رۆژدا، ئەگەر توانیت لە ماڵەوە بمێنەوە و پشو بدە، ئەگەر كارەكەت بوارت نادا، ئەوا چالاكی جەستەییت كەم بكەرەوە و زیاتر لەسێبەردا بمێنەوە.
5- لەكاتی ڕۆژوشكاندندا زۆر مەخۆ. باشتر وایە سود لەخۆراكە سروشتییەكان وەربگریت بۆ ڕۆژوشكاندن، وەك خورما، شیر، شەربەتی سروشتی. پاشان كەمێك پشو بدە (وەك نوێژ و عیبادەتی تر) و ئینجا ژەمێكی سادە بخۆ كە پرۆتینی پێویستی تێدابێت. هەوڵبدە لە كاتی رۆژوشكاندنەوە تا كاتی نوستن 8 پەرداخ ئاو بخۆیتەوە، بەڵام لەسەرخۆ و بە تەدریجی.
6- هەوڵبدە دوای رۆژوشكاندن چا و قاوە و سۆدا كەم بخۆیتەوە.
7- لەشەوانی رەمەزاندا میوە و بادام بخۆن و دوور بكەونەوە لەشیرینی دەستكرد و چوكلێت.
8- شەوانی رەمەزان وەرزشی سادە بە ڕێكوپێكی ئەنجام بدەن، وەك ڕێكردن بۆ ماوەی 20 خولەك.
9- لەخواردنی سورەوەكراو و پڕ بەهارات دوور بكەونەوە لەڕەمەزاندا، چونكە دەبنە هۆی دڵەكزێ و تێكدانی كرداری هەرس.
10- سود لەحەبی مەڵتی ڤیتامین وەربگرن، بەڵام بە ڕاوێژی پزیشك.
11- رەمەزان هەلێكی گرنگە تا بە هەمیشەیی ماڵئاوایی لەجگەرە بكەیت و ئیتر رووی تێنەكەیتەوە.