جاران كە باسی تەندروستی ددان و پوكمان دەكرد، زیاتر خەیاڵمان لای رەهەندە جوانكارییەكە و ئازاری دەم و ددان بوو. بەڵام ئێستا دەركەوتوە هەبوونی كلسی ددان و هەوكردنی پوك، مەترسی لەسەر گەلێ لەئەندامە سەرەكییەكانی وەك دڵ و دەماخ و جومگەكانیش دەكات!
*كاریگەری كلس لەسەر تەندروستی ددان:
كلس بەكتریای تێدایە، ئەم بەكتریایە ماددەی ئەسیدی دەردەدات، كە دەبێتە هۆی زیان گەیاندن بە توێكڵی ددان و سەرەنجام بەرەو كلۆری بردنی. بەكتریای ناو ئەم كلسە هەروەها دەبێتە هۆی نەخۆشخستنی پوك و داخورانی، بەجۆرێك بنی ددانەكە زیاتر ڕوت دەبێت و كاریگەری بەكتریاكە پێدەچێت بگاتە ئێسكی بنی ددانەكەش.
*مەترسی هەوكردنی پوك:
هەتا ئێستا كە ئەم بابەتە دەخوێنیتەوە، سەلمێنراوە هەوكردنی پوك ڕێگە بۆ ئەم حاڵەتانە خۆشدەكات:
1- نەخۆشییەكانی دڵ. 2-شەكرە. 3-خەڵەفان. 4-ڕۆماتیزمی جومگەكان. 5-لەدایكبوونی منداڵی نەبەكام لە دایكێك كە پوكی نەخۆشە.
* نەخۆشی پوك و نەخۆشییەكانی دڵ:
لەمەودوا ئەو پزیشكەی بەدواداچون بۆ حاڵەتی تەندروستی دڵت دەكات، هەر لەبارەی فشاری خوێن و شەكرەوە پرسیارت لێناكات، بەڵكو لەبارەی تەندروستی ددان و پوكیشتەوە دەپرسێت. لە ئەمریكا ئەمە چوەتە چوارچێوەی جێبەجێكردنەوە، بەتایبەت دوای ساڵی 2009 كە پەیوەندییەكە تەواو سەلمێنرا.
* نەخۆشیی پوك كار لەیادەوەری و توانا دەماخییەكان دەكات و ئەگەری توشبون بە خەڵەفان لە تەمەنەكانی دواتردا زیاتر دەكات.
* هەوكردنی پوك رێگە خۆش دەكات بۆ هەوكردنی جومگەكان و چارەسەركردنیشی، ئازار و سنورداركردنی جوڵان لەهەوكردنی جومگەكاندا باشتر دەكات.
* هەوكردنی پوك رێگە خۆشدەكات بۆ لەدایكبوونی منداڵی نەبەكام:
چارەسەركردنی نەخۆشی پوك لەپێش 35هەمین هەفتەی سكپڕیدا، وا دەكات كۆرپەلە لە تەمەنی زوتردا لەدایك نەبێت و بگاتە تەمەنی ئاسایی.
رێگاگرتن لە توشبوون:
رۆژانە دوو جار ددانت بشۆ، بەمەرجێ مەعجونی ددانەكە ماددەی فلۆرایدی تێدابێ. هەروەها دەزوولێدانی نێوانی ددانەكان بە مەبەستی پاككردنەوەیان گرنگە. وەردانی ئاو و خوێ یاخود گیراوە تایبەتە دژە میكرۆبەكانی تر لەناودەمدا، تەگەرە دەخاتە بەردەم گەشەی بەكتریاكان و تەندروستی دەم و ددانت باشتر دەكات.