مەبەستمان لەوە نییە راستەوخۆ بەر لەوەی بنوی دەم و چاوت بشۆیت و خەوەكەت بزڕێنی، بەڵكو ئەوەیە دوای هاتنەوەت لەكار یان بازاڕی ئێواران یان هەر چووە دەرەوەیەك پێش نوستن، دەم و چاوت بشۆیت. ئەم شوشتنە دەبێتە هۆی داماڵینی ماددە كیمیاییەكانی میكیاج و كرێمە جیاوازە كیمیاییەكان، تەپوتۆز و ماددە پیسكەرەكانی تر. ئەگەر دەم و چاو نەشۆی، ئەوانە دەبنە هۆی ڕووانی كارلێكی كیمیایی نەخوازراو لەسەر پێست و ژینگەیەكی لەباریش دەخولقێنن بۆ میكرۆبەكان و لەئەنجامدا پێستێكی نەخۆشتر و كەمدرەوشاوەترت دەبێت. جگە لەمە، دەم و چاو شوشتن سوڕی خوێن چالاك دەكات و كارلێكە بەسودەكانی كاتی نوستن لە پێستتدا چالاكتر دەكات و لەئەنجامدا پێستێكی گەنجتر و درەوشاوەترت دەبێت.