سڤیل: قائید میرۆ مزووری

بەپێی توێژینەوەیەك كە لەلایەن دوو پزیشكی پسپۆڕ لەنەخۆشخانەیەكی شاری هەولێر و نۆڕینگە تایبەتییەكەیان ئەنجامیان داوە، دەركەوتووە جگەرەكێشان و ئیلتیهاب، دوو هۆكاری سەرەكین بۆ توشبوونی پیاوانی كوردستان بەنەخۆشی نەزۆكی.
دكتۆر هێمن فازڵ، پزیشكی پسپۆڕی خێزان لەلێدوانێكیدا بۆ (سڤیل) ئەنجامی ئەو توێژینەوەی خستەڕوو كە بەهاوبەشی لەگەڵ (دكتۆرە عەتییە) پسپۆڕ لەنەخۆشییەكانی ئافرەتان و منداڵبوون لەنەخۆشخانەی رزگاری شاری هەولێر و نۆڕینگە تایبەتییەكەیان ئەنجامیان دابوو. دكتۆر هێمن پیرخدری، لەبارەی نەخۆشی نەزۆكی پیاوان، دەڵێت "ئێستا وشەی نەزۆكی لەهەموو دنیا زۆربەكەمی بەكار دەهێندرێت، چونكە وشەیەكی ناخۆشە و دواتریش هەموو ئەو پیاوانەی منداڵیان نابێت نەزۆك نینە"، وەك ئەو دكتۆرەش دەڵێت "ئەگەر بێت و ئامارێكی دروست ئەنجام بدرێت، لە 95%ی ئەو كەسانەی كێشەی منداڵبوونیان هەیە چ بەچارەسەری ئاسایی یان چارەسەری پێشكەوتوو، دەتوانرێت منداڵیان ببێت، ئەو لە 5%شی دەمێنێتەوە، پێیات دەوترێت نەزۆك، بۆیە دەتوانم بڵێم نەخۆشی نەزۆكی لەپیاواندا، ئەوەیە كە بەهۆی ئاوەكەی كە منداڵی تێدا نییە، توانای دروستكردنی منداڵیان نییە"، لەبارەی نەخۆشییەكەش وەك ئەو دكتۆر گوتی "ئەگەر پیاوێك بۆ ماوەی ساڵێك لەگەڵ هاوسەرەكەی هەوڵی منداڵبوونی دا، بەمەرجێك ئەو پیاوە لەهەفتەیەكدا بەلایەنی كەم دوو تا سێجار لەگەڵ هاوسەرەكەی كاری جووتبون ئەنجام بدات و لەماوەی ئەو ساڵەدا هاوسەرەكەی دووگیان نەبوو، ئەوەیان پێی دەگوترێت دواكەوتنی منداڵ، كە لەكوردستان پێی دەگوترێت نەخۆشی نەزۆكی".
دكتۆر هێمن فازڵ، لەدرێژەی ئاخاوتنەكانیدا بۆ (سڤیل) هێمای بۆ ئەوەشكرد، كە لەكورستان دكتۆری پسپۆڕ لەبواری نەزۆكی و منداڵنەبوون زۆر كەمە و گوتی "لەتوێژینەوەكەماندا، كە لەسەر 4000 پیاو و 4000 ئافرەت ئەنجاممان دابوو، دەركەوت كە نەخۆشییەكە بۆ چەند هۆكارێك دەگەڕێتەوە وەك نەبوونی پزیشكی خێزانی و دكتۆری پسپۆری تایبەت بەمنداڵنەبوون".
لەبارەی ژمارەی ئەو پیاوانەشی كە لەهەرێمی كوردستان نەخۆشی نەزۆكیان هەیە، ئەو دكتۆرە ئاماژەی بۆ ئەوەكرد، كە بەهۆی نەبوونی سەنتەرێكی تۆماركردن و شوێنێكی تایبەت بەبینینی ئەو جۆرە كەسانەی ئەو نەخۆشییەیان هەیە، بۆیە ناكرێت هیچ ئامارێكی دروست بخرێتە بەردەست. بەڵام وەك دكتۆر (هێمن فازڵ) هێمای بۆ دەكات، بەپێی راپۆرتی رێكخراوی تەدروستی جیهانی ئێستا لەسەرتاسەری جیهاندا هەشتا ملیۆن كەس كێشەی منداڵنەبوونیان هەیە.
لەبارەی سەرئەنجامی توێژینەوەكەشیان دەڵێت "هەموو پیاوەكان بەشێوەیەك لەشێوەكان لایەنێك بوون لەكێشەكە، بەتایبەتی 95% بەسەرەوەی پیاوان رۆشنبیری تەندروستیان لەكرداری جووتبووندا نییە و دڵنیاشم لەلای ئافرەتان رێژەكە زیاتریش بوو لەو رێژەیە". هاوكات وەكو (دكتۆر هێمن) گوتیشی "دەریشكەوت لە 30%ی حالەتەكانی نەزۆكی، ئافرەتەكان كێشەیان هەیە، لە30%یش پیاوەكان كێشەیان هەبوو، لە 40%یش هەردوكیان، ژن و مێرد بەرپرس بوون لەمنداڵنەبوون".
لەبارەی هۆكارەكانی نەزۆكیش لای پیاوان لەهەرێمی كوردستان، دكتۆر (هێمن) ئاشكرای دەكات دەڵێت "ئیلتیهاب و جگەرەكێشان، دووهۆكاری سەرەكی بوون لەنەخۆشی نەزۆكی لای پیاوان، لە 60% لەو 4000 پیاوەی سەردانی ئێمەیان كردبوو، ئیلیتیهابیان هەبوو، بەراوردمان كرد دروست لەو رێژەیە ئافرەتانیش ئیلتیهابیان هەبوو كە ئەوە شتێكی زۆرگرنگە"، ئەو دكتۆرە ئەوەشی گوت كە "رێژەیەكی زۆر لەپیاوان جگەرەیان دەكێشا و بەو هۆیەوەش تۆوەكەیان لاوازبوو".