سڤیل: سەباح شێخانی
رێژنە تاهیر، كچە یاریزانی یاری باسكە داوا لەقوتابخانەكان دەكات هیچیتر وانەی وەرزش فەرامۆش نەكەن و وەك وانەیەكی گرنگ بخوێندرێت.
رێژنە تاهیر ساڵی 1992 لەدایكبووە، خەڵكی رەواندوزە و ئێستا دانیشتووی شاری هەولێرە، قوتابییە لەقۆناغی سێیەمی كۆلێژی پەروەردەی وەرزشی، بۆ (سڤیل) گوتی "وەرزش سەرچاوەی خۆشی و كامەرانییە، هەتا بڵێی خۆشە و زیاتر حەز لەیاری باسكە دەكەم، لەبەرئەوەی یارییەكی زۆر خۆشە و دەتوانم خۆم تێدا بدۆزمەوە". بەڵام رێژنە نیگەرانە تاوەكو ئێستا لەزۆربەی قوتابخانەكان وانەی وەرزش فەرامۆشكراوەو وەك وانەیەكی كەمبایەخ سەیر كراوە، رێژنە باسی قوتابخانەكەی پێشووی خۆی دەكات و دەڵێت "كاتێك كە لەقۆناغی بنەڕەتی و ئامادەیی قوتابی بووم، زۆرجار مامۆستاكان، وانەی وەرزشیان بەقوربانی وانەیەكی دیكە كردووە، لەجێگەی وەرزش وانەیەكی دیكە خوێندراوە، كەچی لەڕاستیدا بایەخی وەرزش لەهیچ وانەیەكی دیكە كەمتر نییە".
لەبارەی حەز و ئارەزووەكانی خۆیشی رێژنە تاهیر گوتی "وەرزشم لەهەموو شتێك زیاتر خۆشدەوێت، بەپلەی یەكەم وەرزش دواتر رەواندوز".