|
 سڤیل:
مامەند رۆژە
بانێك و دوو هەواكەی ئەردۆغان
لەدوایەمین رۆژی مانگی یەكەمدا، رەجەب تەیب
ئەردۆغان لەكۆبوونەوەی گروپی (فراكسیۆن-
توركەكان گروپی پێدەڵێن) پارتەكەیدا گوتارێكی
دا، كە لەچەند لایەنێكەوە راستەوخۆ پەیوەندی
بە كەسێتی، كارەكتەر و پێناسی گەلی كورد
لەباشور و حكومەتی هەرێمی كوردستانەوە هەیە.
ئەم پیاوە كە خۆی بەفریادڕەسی موسڵمانانی
جیهان دەزانێ، ئەوەی بەدڵی نەبێ و ئەوەی رقی
لێبێ، بەچەپ و راستدا تێیدەسرەوێنێت. دەست
لەكاروباری ناوخۆیی وڵاتان وەردەدا و لەڕووی
سیاسی و تەنانەت سەربازیشەوە كار بۆ روخاندنی
هەندێك وڵات دەكات. كاتێكیش لەشوێنێكەوە كەسێك
قسەیەكی خێر بۆ بارودۆخی ناوخۆیی شپرزی
وڵاتەكەی بكا، ئەوە وەك سوژنت تێڕاكردبێ،
هاواری لێ هەڵدەستێ "وای بەچی هەقێك باسی پرسە
ناوخۆییەكانی وڵاتی ئێمە دەكەن؟" ئەمە لۆژیكی
ئەو پیاوەیە.
ئەورۆژە ئەردۆغان لەكۆبوونەوەی پارتەكەیدا
سەبارەت بەدۆخی عێراق و هەرێمی كوردستان دەڵێت
"ئێمە چۆن دەتوانین بەرانبەر بەپرسی توركمانە
هاوزمانەكانمان بێدەنگ بین، كە ئەو هەمووە
زوڵمەیان لێدەكرێت؟". ئەمە ئیتر لەموسڵمانێـتی
لادەدا و بەرگی توركپەرستی ناوبراو دەردەخات.
وادیارە پێش برایانی موسڵمانیتر توركێتی بۆ ئم
پیاوە گرنگترە. ئەم قسەیەی ئەردۆغان رێك
هەڵوێستی ئەو رۆژەیمان بیردەخاتەوە، كە
بەرانبەر بەلێدوانێكی بەڕێز تاڵەبانی سەبارەت
پرسی كورد لەو وڵاتە دەریبڕیبوو. بەرێز
تاڵەبانی گوتبووی "پێویستە توركیا بۆ
چارەكردنی پرسی كورد لێخۆشبوونێكی گشتی
دەربكات". دەمودەست ئەردۆغان لەكۆبوونەوەیەكدا
گوتبووی "تاڵەبانی هەقی نییە دەست لەكاروباری
ناوخۆیی ئێمە وەربدات". ئەوەندەی نەبرد
وتەبێژی حیزبەكەی حوسێن چەلیكی بەبنەچە كورد!
وەڵامێكی توندتری دایەوەو بەمیدیاكانی گوت
"تاڵەبانی بەچی هەقێك باس لەپرسە ناوخۆییەكانی
وڵاتی ئێمە دەكات؟ ئەو مافی ئەمەی نییەو لێی
قبوڵناكرێت؟"
كاتێك بێین و ئەم دوو بابەتە پێكەوە بەراورد
بكەین، ئەوە رووبەڕووی یەك كۆمەڵ ناتەبایی،
ناتەرازی و بانێك و دووهەوا و دەبڵ ستاندارد و
تاد دەبینەوە. بەڵام هەتاكەی ئێمەی كورد
بەرانبەر بەسوكایەتی، تەحقیر و
جنێوفرۆشییەكانی ئەم جەماعەتە بێدەنگ بین؟
ئایا پەیوەندی نێوان ئێمە و ئەوان پەیوەندی
فەرمانكەر و فەرمانپێكراوە؟ پەیوەندی نێوان
ئێمە و ئەوان پەیوەندی سەردار و سەردەرە؟
ئەوان ئاغا و ئێمە...؟ بێدەنگ بوون بەرانبەر
بە تەحقیر، سوكایەتی و جنێوەكانی ئەردۆغان و
جەماعەتەكەی زیان بەكەسێتی، پێناس و تەنانەت
كەرامەت و شەرافەتی مرۆیی ئێمەی كورد لەسەرووی
هەمووشیەوە ح.ه.ك دەگەیەنێت. بۆیە هەقە و
زۆریشی بەسەردا تێپەڕیوە كە حكومەتەكەی ئێمەش
لەئاست ئەم جەماعەتەدا دەم بكاتەوە و حەدێكی
بۆ دیاریبكەن.
لەگەڵ سێ ئەزمونی پرۆئیسلامی!
ئەزمونی ئێمەی كورد و حوكمە پرۆئیسلامییەكان
وا خەریكە لەسێ نمونەدا خۆی دەنوێنێت. لەئێران
لەسەردەمی دەسەڵاتی شادا، كورد بەدەست حوكمێكی
نەژادپەرستەوە گیریخواردبوو، كە بەهەموو
شێوەیەك حاشای لەمافەكانی گەلی كوردستان
دەكرد. بەتەنها حاشالێكردن نەبوو، بەڵكو
بەئاگر و ئاسنیش كوردی دادەپلۆسی. كاتێك شا
روخا، كوردیش وەكو هەموو گروپێكی ئەتنی و
تایفیتر پێشوازی لەحكومەتی نوێ كرد كە گرۆیەكی
پرۆئیسلامی پێكەوەیاننابوو. ئەمانە سەرەتا
دانیان بە هەموو مافێكی كورددا دەنا و باسیان
لەبرایەتی، پێكەوەژیان و مافەكانی كورد دەكرد.
تەنانەت كاتێكیش یەكەم كۆبوونەوەی نوێنەرانی
كورد و نوێنەرانی حكومەتی ئیسلامی هاتەكایەوە،
ئەوە لەباتی خودموختاری باسی خودموختاری
ئیسلامیان كردبوو. پاش ئەوە هاتن و لەباتی
خودموختاری باسی "خودگەردانی"یان
هێنایەكایەوە. كوردگوتەنی هەر ئەوەندە
لەپردەكە پەڕینەوە، ئەوە حاشایان لەبەڵێنەكانی
خۆشیان كردو زۆر-زۆر خراپتر لەنەژادپەرستەكانی
شا كەوتنە وێزەی كورد. ئەوەی ئەوان كردیان
هەردوو شاكە نەیانكردبوو!
لەعێراق جەماعەتی ئیسلامی خوارەوە ساڵانێكی
زۆر میوانی كورد بوون و هەتا لێرە بوون دانیان
بەهەموو مافەكانی كورددا نابوو. كاتێك چونە
سەر حوكم خەریك بوو بابدەنەوە. ئەگەر فاكتەری
هێزی كورد خۆی و فاكتەری نێودەوڵەتی نەبوایە،
ئەوە بەڵایان بەسەر كورد دەهێنا. ئەوەتا
مالیكی بەچەپ و بەراستدا پێچەوانەی دەستوری
فیدراڵی هەڵدەسوڕێ و بۆی بكرێ دەستورەكەش
دەگۆڕێت. پێش ماوەیەك سەبارەت بەكورد لەكۆڕێكی
نیمچەداخراودا گوتبوی "جارێك دەستمان
بەستراوە، رۆژی خۆی بێ ئەو حسابە
تەسفیەدەكەین". كاتێكیش لە 2008 كێشەی موسڵ و
سوپای مەهدی لەكۆڵ بۆوە، ئەوە رووی هێزەكانی
لەكوردستان كرد و لەخانەقین و جەلەولا و تاد
دەمەقاڵەیەكی لەگەڵ هەرێمی كوردستان دەسپێكرد،
كە ئەگەر بەخت یاوەر نەبوایە و كێشەیتری ناو
عێراق دەرنەكەوتایە ئەوە رەوشەكە وەك ئەمڕۆ
نەدەبوو.
لەتوركیاش كاتێك ئیسلامگەراكان هێشتا حوكمیان
بەدەستەوە نەبوو، ئەوە یار و یاوەری كورد
بوون. كاتێكیش تازەبەتازە دەسەڵاتیان
بەدەستەوە گرتبوو، ئەوە بەیەكجاری باسی
مافەكانی كوردیان دەكرد. ئەردۆغان بۆخۆی هاتە
دیاربەكر و بۆ یەكەمجار گوتی "پرسی كورد
پرسێكی سیاسیەو پێش هەموو كەسێك پرسی منە".
ئەوجا بەڵێنی چارەكردنی ئەم پرسەی دا. سەرەتا
گوتیان با مەترسی ئەرگەنەكۆن لابەرین ئەوسا
پرسەكە چارەدەكەین. پاش ئەرگەنەكۆن گوتیان با
تەنها حكومەت نا، بەڵكو دەوڵەتیش دەسبخەین،
ئەوجا دێینەوە سەر پرسی كورد. دەوڵەتیان
یەكلاییكردەوە. پاش ئەوە گوتیان هێشتا سوپا
مەترسی كودەتای لەسەرە، با ئەوەش بەلادابخەین،
ئەمجا پرسەكەی ئێوە یەكلاییدەكەینەوە.
لەهاوینی رابردووەوە سوپاشیان گرمۆڵەكردو وەبن
فەرمانی خۆیان خستووە.
بەدرێژایی ئەو 10 ساڵە بەردەوام راستەوخۆ و
ناراستەوخۆ لەژێرەوە شاندیان ناردووەو داوایان
لەكورد كردووە كە "با تا ئەم هەڵبژاردنە، تا
ئەو هەڵبژاردنە، تا كۆتایی ئەمساڵە و ئەوساڵە
و...شەڕ رابگرن و ئاگربەست بكەن، ئەوسا ئێمە
لەگەڵیان كۆدەبینەوە". دوایەمجار لەبەهاری
ساڵی رابردوو بەنهێنی شاندێكیان بۆ هەرێمی
كوردستان راسپاردبوو "با فشار بخەنەسەر پ.ك.ك
تا كۆتایی هەڵبژاردنەكانی 12ی حوزەیران شەڕ
رابگرێ، پاش هەڵبژاردنەكان ئێمە ئەم پرسە
یەكلاییدەكەینەوە". هەڵبژاردنەكانی 12ی
حوزەیران تەواوبوو. كورد بەڵێنەكانی خۆی
بردەسەر و یەكلایەنە ئاگربەستی كردو
قوربانییەكی زۆریشی بۆ دا، بەڵام ئەردۆغان
لەكۆتایی ئۆگۆستدا سوپاشی دەست خۆی خست. ئەمجا
كاتێك ئیتر بارەكە بەیەكجاری لەپردەكە
پەڕێنرابۆوە، ئەوە بەوپەڕی بێشەرمی، بێپەروایی
و بێباكیەوە و بەپێچەوانەی هەموو پرەنسیپە
ئیسلامییەكانیشەوە پشتی لەهەموو بەڵێنەكان و
تەنانەت لێدوانەكانی خۆشی كردو بەراشكاوی گوتی
"لەتوركیا پرسی كورد بوونی نییە، پرسی
هاوڵاتیانی كوردمان هەیە". پاش ئەوەش لەوە
زیاتر رۆیشت و گوتی "ئەم پرسە پرسی تیرۆرە و
تاكۆتایی پێهێنانی، بەهێزەكانمانەوە رووبەڕووی
دەبینەوە. لەدوایەم ئاخاوتنی گروپی
پارتەكەشیدا ئیتر بێشەرمانە پەردەی لەسەر
هەموو نیەتەكانی خۆی هەڵماڵی و گوتی "هەتا
تیرۆر هەبێ هێزە چەكدارەكانمان رووبەڕوویان
دەبنەوە".
ئەی ئەردۆغان: ئەوەی بۆ تۆ رەوایە بۆ ئێمە
رەواترە!
ئێستا كاتێك بیر لەو 10 ساڵە دەكەینەوە، كاتێك
بیر لەو هەموو ئاگربەستە دەكەینەوە، كە كورد
خۆشباوەڕانە رایگەیاندن، هەتاوەكو كۆسپەكان بۆ
ئەردۆغان و جەماعەتەكەی تەختبكەن، كاتێك بیر
لەو خۆشباوەڕییەی خۆمان دەكەینەوە، كە فریوی
رووپۆشی ئیسلامیانەی گوتارەكانی ئەردۆغانمان
خوارد و لەباكور و لەباشور پشتیوانیمان
لێدەكردن، كاتێك بیر لەو هەموو توانا، وزە و
دەنگەی كورد دەكەینەوە، كە بۆ وەگەڕخستنی
ماشێنی پروپاگەندەی سیاسی ئەردۆغان خەرجكران و
دواجار بوون بە سوتەمەنی بۆ ماشێنی جەنگی ئەم
كابرایە لەدژی كورد، بەراستی تازە هیچ ناكرێ،
پەنجەی پەشیمانی دەگەزین و ئیتر متمانەمان
بەئەزمونە ئیسلامگەراكە دەڕوشێت. هەقە هێزە
ئیسلامگەراكانی ئێمەش پەردە لەسەر ئەم نیفاقە،
ئەم دوروییە، ئەم درۆزنی و بێبەڵێنییە، ئەم
مونافقییە هەڵماڵن. كاتی ئەوەیە چیتر فریوی
ئەم برایەتیە ساختە و ناتەرازە نەخۆین.
هەقوایە پێش هەموومان برایانی ئیسلامگەرامان
ئەردۆغان و جەماعەتەكەی رسوابكەن.
ئەی ئەردۆغان: تۆ باس لەمافی موسڵمانانی غەزە
دەكەی، بەڵام رۆژانە موسڵمانانی كورد
كوشتاردەكەی، تۆ باس لەمافی خوێندن بەزمانی
توركی بۆ توركەكانی بوڵگارستان دەكەی،
لەملاشەوە دەڵێی بەهیچ كلۆجێك پەروەردە
بەزمانی كوردی قبوڵناكەین و تاقە زمانی رەسمی
توركییە، تۆ باس لەمافی توركمانەكانی كوردستان
دەكەی، لەكاتێكدا هەموو مافەكانی هاوڵاتیانی
كوردی وڵاتەكەی خۆت پێشێلدەكەی، تۆ باس لەماف
دەكەی، بەڵام خۆت ماف دەخۆی...ئەوە بزانە ئەم
دوفاقییەت رسواییەو ئەوەی بۆ تۆ رەوایە بۆ
ئێمە رەواترە. درزەكان دەمدەكەنەوە و
دیوارەكان دەترازێن، چونكە پاژنەی ئەشیلت
كوردە. ئەمە ئەو پاژنەیە بوو كە حوكمی دێوێكی
وەكو سەدام حوسێنی دێواندێوكرد. بیزانە تەمەنی
زوڵم، درۆ، نیفاق و دووڕوویی و دووزمانی
كەمە...ئەی ئەردۆغان!
|
