|
 سڤیل:
ئێڤا براون دوو خولەك پێش هیتلەر كەپسوول
ژاراوییەكانی لەژێر ددانەكانیدا تەقاند
كاتێك لێكۆڵینەوە دەربارەی ژیانی ئێڤا براون
دەستیپێكرد، كە ئەم ژنە گەنجە لەكەناری ئادۆڵف
هیتلەر دەژیا و هێشتا لەگەڵ "پێشەوا"
خۆینەكوشتبوو.
خزمەتكارە فزولەكانی هیتلەر بەوەیان زانیبوو،
كە ئەو لەگەڵ ئەو ئافرەتە گەنجە، كە 23 ساڵ
لەوە گەنجتر بوو، پێوەندییەكی "تایبەتی"ـیان
نییە و عەشقی ئەوان عەشقێكی ئەفلاتوونییە.
ژیانی تایبەتی "پێشەوا" لەلای خەڵك شاراوە
بوو. زۆربەی ئەڵمانەكان دوای مەرگی هیتلەر ئەو
هەواڵەیان بیست، كە كیژێكی بلۆند لەگەڵ
"پێشەوا"ـدا دەژیا و لە 30ـی نیسانی 1945
لەگەڵ هیتلەر خۆی كوشت.
هیتلەر حەزی نەدەكرد خەڵك بەپێوەندیی ئەو و
ئێڤا براون بزانن، چونكە لەو بڕوایە بوو،
خۆشەویستییەكەی لەناو ئافرەتە گەنجەكان كاڵ
دەبێتەوە، جگە لەوەش زیانی بەو وێنایەی هیتلەر
دەگەیاند، كە ئەو ئەفسانەیەكی سیاسییە نەك
كەسێكی ئاسایی.
هیتلەر وای پێخۆش بوو، كە جەماوەرەكەی بڕوا
بكەن كە "پێشەوای هەمیشەیی ئەڵمانیا" لە
"خواردن و ژن و خەو" بێنیازە و تەنیا بیر لە
"گەشەكردن و گەورەیی رایشی سێهەم" دەكاتەوە.
دیارنەمانی ئێڤا براون قسە و قسەڵۆكێكی زۆری
لەناو خەڵكی ئاڵمانیدا لێكەوتەوە، كە زۆری
واقعییانە نەبوو، بۆ نموونە ئەوەی كە ئەم
ئافرەتە شێتانە ئاشقی هیتلەرە و ئێرەیی بە
تەواوی كەسە نزیكەكان و تەنانەت بە "بلۆندی"
سەگەكەی هیتلەریش دەبات.
لەم ماوەیەدا لەئەڵمانیا لێكۆڵینەوەیەك لەسەر
ژیانی ئەم ئافرەتە گەنجە "مونیخ"ـییە،
بەپشتبەستن بەبەڵگەی بڕواپێكراوەوە
بڵاوكرایەوە.
ئافرەتێكی ناسیاسی و "ئاسایی"
زۆربەی ئەو مێژوونووسانەی لەسەر ژیانی هیتلەر
لێكۆڵینەوەیان كردووە، گوتوویانە كە ئێڤا
براون لەژیانی ئەودا رۆڵێكی گرنگی نەبووە.
كتێبێكی تازە لە هایكە گوتماكری مێژوونووسی
سەردەمی ئەڵمانیای نازی، ئەوەمان بۆ
دەخاتەڕوو، كە ئەمە لەگەڵ راستییەكەندا زۆر
گونجاو نییە.
ئەم ئافرەتە لێكۆڵەرە پێشەكی ئەو قسە و
قسەڵۆكانە هەڵدەسەنگێنێت، كە بەرای ئەو هیچ
بایەخێكیان نییە و تەنیا لەبەر نەبوونی
زانیاری تەواو و راستی كەوتووەتە سەرزاران.
ئەو لەكتێبەكەی خۆیدا هەوڵیداوە، تەنیا پشت
بەرووداوە مێژوویی و دەربڕینە راستییەكانی
كەسە نزیكەكانی هیتلەر ببەستێت. بەپێی ئەم
سەرچاوانەی كە باسمان كردن، ئەم لێكۆلەرە
ئەوەمان بۆ دەخاتە روو، كە ئێڤا براون رۆڵێكی
گەورەی لەژیانی هیتلەر هەبووە.
هیتلەر لەوەسیەتنامەیەكدا كە 1938 ئامادەی
كردبوو، داوای لە "حیزبی ناسیۆنال سۆسیالیستی
كرێكاری" كردبوو، مووچەیەكی هەمیشەیی بۆ "ئەم
ئافرەتە بەڕێزە" ببڕنەوە.
كەسە نزیكەكانی هیتلەر بۆ نموونە جۆزێف گۆبڵزی
وەزیری راگەیاندنەكەی، جەختی لەوە كردۆتەوە كە
"خاتوو براون لەلای پێشەوا پێگەیەكی تایبەتی
هەبووە".
بەگوتەی دەوروبەرەكەی هیتلەر "پێشەوا"
بەرنامەی وابوو، كە دوای كۆتاییهاتن
بە"پەیام"ـەكەی و سەركەوتن لەشەڕەكەدا،
ماڵئاوایی لەدنیای سیاسەت بكات و لەگەڵ ئێڤا
براون ژیانێكی ئارام دەستپێبكاتەوە.
دیكتاتۆری تەنیا
بەپێی رای نووسەر، ئەگەر پێگەی ئێڤا براون
دیاری نەكەین، ناتوانین هیچ لێكۆڵینەوەیەك
لەسەر ژیانی هیتلەر بكەین. ژیاننامەنووسانی
هیتلەر گوتوویانە، هیتلەر ژیانی تایبەتی
نەبووە و بەتەواوی خۆی بۆ سیاسەت تەرخان
كردبوو.
هیتلەر لەژیانیش زۆر تەنیا بوو، جگە
لەسەركەوتنی سیاسی نە شتێكی بووە و نە شتێكیشی
دەویست، لەم بۆشاییەشدا ئافرەتێكی وەكو ئێڤا
براون دەیتوانی بۆ ئەو پەناگەیەك بێت.
ئەو ژیاننامەی كە هایكە گوتماكەر تێیدا ئێڤا
براونمان پیشاندەدات، هێشتا تێیدا زۆر شت
بەشاراوەیی ماوەتەوە، بەڵام ئەوەی باسی
لێكراوە، تەنیا بەپشتبەستن بەبەڵگە و شایەدە
جێگەی باوەڕەكان بووە.
هیتلەر بەنزیكبوونەوە لەدۆڕان لەسەرەتای ساڵی
1945 فەرمانی دەركرد، تا تەواوی بەڵگەكانی
ژیانی تایبەتی ئەو بسڕنەوە، بێگومان نامە
تایبەتیەكانی ئەو و ئێڤا براونیش هیچ
ئاسەوارێكیان نەماوە.
ئافرەتێكی هەڵوەدا
ئێڤا براون لەساڵی 1929 كە هێشتا هیتلەر
نەگەیشتبووە دەسەڵات، بۆ یەكەم جار سەرۆكی
نازییەكان دەبینێت و هەر لەیەكەم بینینیش شێت
و شەیدای دەبێت.
هیتلەر كە زۆر دڕندانە و بێبەزەییانە كوشتاری
بەكۆمەڵی دەكرد، لەگەڵ ئافرەتاندا زۆر بەهێمنی
و ناسكی هەڵسوكەوتی دەكرد و كاریگەرییەكی زۆری
لەسەر ئەوان هەبوو.
ئێڤا براون دوای ئەوەی ئاشقی "پێشەوا" دەبێت و
بۆ ماوەیەك لەبێمەیلییەكەی هیتلەر زۆر خەمگین
و پەشۆكاو دەبێت و دوو جار هەوڵی خۆكوژی دا،
بۆئەوەی "پێشەوا" ئاوڕێكی لێبداتەوە.
هیتلەر دوای گەیشتن بەدەسەڵات لەساڵی 1933
ئاوڕێك لەئێڤا براون دەداتەوە و یەكەم
هەنگاویش ئەوەیە، فەرمانێك بۆ لێكۆڵینەوە
لەبنەماڵەی ئێڤا دەردەكات، مەبادا بنەماڵەی
براون ئەسڵ و نەسەبێكی یەهوودییان هەبێت.
دواتر سەرۆكی حیزبی نازی كارێكی كرد، كە براون
بێتە ناو بازنەی كەسە نزیكەكانییەوە، بەتایبەت
لەسەفەرەكانیدا كە ئەویشی لەگەڵ بێت.
هیتلەر هەمیشە ئێڤا براونی وەك "سكرتێری
تایبەت"ـی خۆی دەناساند، بەڵام دواتر هەموو
لایەك زانیان كە پێوەندییەكی نزیكتریان هەیە،
لەوەی كە خۆیان باسی دەكەن، بەڵام پێویستە
قسەوباسی ئەم پێوەندییە نەگاتە دیوارەكانی
ئەودیوەوە و خەڵك بەمە بزانن.
سەرەڕای ئەو سانسۆرە قورسەی هیتلەر داینابوو،
سەرەنجام ئەم پێوەندییە ئاشكرا بوو. ساڵی 1939
زۆربەی راگەیاندنەكان، بۆ نموونە گۆڤاری تایمی
ئەمریكی ئەو هەواڵەیان بڵاوكردەوە، كە هیتلەر
مەعشووقەیەكی بەناوی براون هەیە.
ژیان و مەرگ لەگەڵ "پێشەوا"ـدا
لەبیۆگرافیای تازەی ئێڤا براوندا ئاماژە بەوە
كراوە، ئەو ئافرەتێكی ئاسایی بوو و زۆر لە
"ئافرەتی نموونەیی ئەڵمانیای نازی" دوور بووە،
هەر بەم هۆیەش هەندێك لەسەركردەكانی نازی
دەبارەی براون بەشێوەیەكی سلبی قسە دەكەن.
نووسەر لەهەڵسەنگاندنی ئەم دیاردەیەدا لەو
باوەڕەدایە: براون "ئافرەتێكی ناسیاسی" بووە،
بەڵام سەبارەت بە "ئافرەتی نموونەیی" هیچ
كێشەیەكی لەگەڵ رای نازییەكان نەبوو، چونكە
ئەوان ئافرەتانیان تەنیا لەخزمەتی پیاوان و
"خەون و ئارمانجەكانی پیاواندا" دەبینی.
ئێڤا براون بەتەواوی بڕوای بەئایدیۆلۆژیای
حیزبی نازی بوو و بێ سێ و دوو فەرمانەكانی
هیتلەری جێبەجێ دەكرد. جگە لەمەش ناتوانین
چاوەڕوانی شتێكی دیكە لەم ئافرەتە بكەین: ئێڤا
براون نیوەی تەمەنی خۆی لەناو سەركردەكانی
حیزبی نازی تێپەڕاند، كە خۆی 33 ساڵ ژیا.
ئێڤا براون بێ بیركردنەوە فەرمانەكانی
"پێشەواوی ئەبەدی حزب و كۆمەڵگا" جێبەجێدەكرد.
هیتلەر لەیەكێك لەدوایین هەڵچوون و
توڕەییەكانی گوتبووی "ئەمڕۆ تەنیا ئێڤا براون
و سەگەكەم بە من وەفاداران".
لەدوایین رۆژەكانی شەڕدا، كاتێ ئەوروپا ببووە
وێرانەیەكی گەورە و یەكەم گرووپەكانی سوپای
سوور گەیشتنە بەرلین، ئێڤا براون دەیتوانی خۆی
لەدەسەڵات دوور بخاتەوە و ژیانی خۆی رزگار
بكات، بەڵام ئەو بڕیاری خۆی دابوو، كە لەگەڵ
"پێشەوا" بمێنێتەوە و دوایین هەنگاویش لەگەڵ
ئەو بهاوێ.
ئێڤا براون دوو خولەك لەپێش هیتلەر كەپسوول
ژاراوییەكانی لەژێر ددانەكانیدا تەقاند، رێك
لەكاتژمێر 3 و 28 خولەكی دوانیوەڕۆی 30 نیسانی
1945. لەكاتێكدا ئەوان تەنیا دوو رۆژ بوو،
بەشێویەكی رەسمی زەواجیان كردبوو.
BBC
|
