|
مەریوان عومەر
بەرەبەیانی رۆژێك بەر لە ساڵیادی 11ی
سێپتەمبەر ئۆباما لەچەند كەناڵێكی تەلەفزیۆنی
ئەمــــــریكیەوە دەركەوت و داوای لە (تێری
جۆنز)ی خاوەنی كڵێسای (دۆف) لە
(گینسیڤل-فلۆریدا) كرد، كە قورئان نەسوتێنێت و
وتیشی "گەر قەشە جۆنز ئێستا من دەبینێ، با
بزانێت كە من وەك سەركردەی هێزە چەكدارەكانی
ئەمریكا قسە دەكەم". ئۆباما قسەكانی جەنەڕاڵ
(دەیڤد پترایۆس)ی سەركردەی هێزەكانی ئەمریكا و
ناتۆ لە ئەفغانستانی دووبارە كردەوە، كە
سوتاندنی قورئان هەستی رق و دژایەتی و هەڕەشەی
زیاتریش بۆ ئەمریكا و سەربازە ئەمریكیەكان
دروست دەكات. ئەمریكیەكان زێدەڕۆییان
لەمەسەلەی دروستكردنی مزگەوتەكەی نزیك
"گراوەند زیڕۆ – شوێنی دوو تاوەرەكەی مەڵبەندی
بازرگانی جیهانی" كرد، چونكە پڕۆژەكە تەنیا
مزگەوت نیە، بەڵكو بەناوی (ناوەندی
قورتوبە)یە، نە تەنیا شوێنی موسڵمانەكانە،
بەڵكو شوێنی نوێژكردنی خەڵكانی ناموسڵمانیشی
تێدایە، نە دەشكەوێتە شوێنی دوو تاوەرەكە،
بەڵكو چوار شەقام لێیەوە دوورە. زۆر
لەچاودێران پێیان وایە ئەو سیاسەتكار و
رۆژنامەنوسە ئەمریكیانەی ئێستا توشی سەرسوڕمان
بوونە لەو ئاستەی تێكەڵكردنی ئیسلام و تیرۆر
لای ئەمریكیەكان پێی گەیشتووە، بەڵام ئەوان
هەر خۆیان بوون دوای رووداوەكانی 11ی
سێپتەمبەر ئەم دوو چەمكەیان تێكەڵ كرد.
دوو رۆژ دوای رووداوەكانی 11ی سێپتەمبەر،
بەرلەوەی ئەنجامدەرانی هێرشە تیرۆریستیەكە
بناسرێن، "واشنتۆن پۆست" لەبارەیانەوە
نوسیبووی "شێوە و رووخساریان هی رۆژهەڵاتی
ناوەڕاستە". كاتێكیش بۆش چووە شوێنی دوو
باڵەخانە خاپووربووەكە، باسی لە "تیرۆری
ئیسلامی" و "ئیسلامی فاشی" نەكرد، بەڵام ئەمڕۆ
واشنتۆن پۆست چەندین وەسفی لەشێوەی
"ئیسلامیەكان"، "ئیسلامیە توندڕەوەكان"،
"یاخیبووە ئیسلامیەكان" بەشێوەی ئاسایی بەكار
دەهێنێت.
دوای رووداوەكان سەرۆك "بۆش"یش زۆر خۆی بۆ
نەگیرا، كاتێك بڕیاری ناردنی هێزە
ئەمریكیەكانی دا بۆ ئەفغانستان، ئەو پرۆسەكەی
بە "كروسید-هەڵمەتی خاچپەرستی" وەسف كرد. كە
پنتاگۆن پلانی داگیركردنەكەی راگەیاند، دروشمی
"جەنگی جیهانی لە دژی تیرۆر" بەرزكردەوە،
لەگەڵ وێنەی نەخشەی جیهانی ئیسلامی، كە بازێكی
ئەمریكی بەسەریەوە فڕیبوو، وەك رەمزێك بۆ
پڕۆسەكە. ئەو رۆژەش كە "بۆش" لە كۆنگرێس
وتارێكی بۆ ئەمریكیەكان و جیهان دا، جیهانی
بەسەر دوو بەرەی "چاكەخواز" و "شەڕانگێز"
دابەش كرد، چەند وڵاتێكی ئیسلامیشی خستە
"بەرەی شەڕانگێزیی"ەوە. دوای داگیركردنی
عێراق، بەشێك لەچاودێران پێیان وابوو، كە بۆش
بەپاڵپشتی مەسیحی و یەهودیە توندڕەوەكان و
كۆمارییە پارێزگارەكان جەنگێكی ناڕاستەوخۆ
لەرۆژهەڵات و رۆژئاوا و باكوور و باشووردا دژ
بە موسوڵمانان بەڕێوە دەبات، كاتێك بڕیاری
ناردنی هێزەكانی دا بۆ مەشقپێدانی سوپای
"فلیپین" و "جۆرجیا" و "قیرغستان"، كە دژ بە
"ئیسلامیە توندڕەوەكان" لە جەنگدا بوون.
لەهەڵبژاردنی 2004دا بۆش ویستی جەنگی دژە
تیرۆر بۆ بردنەوەی خولێكی تری سەرۆكایەتی
بەكار بهێنێت، ئەوكات بوو كە بۆش بۆ یەكەم جار
و تەنیاجار دەستەواژەی "ئیسلامیە
فاشیستیەكان"ی بەكارهێنا، پاشان رەخنەی زۆری
لێگیرا و چیتر بەكاری نەهێنایەوە.
"رۆدی جۆلیانی" سەرۆك شارەوانی نیویۆرك
هەڵوێستی توندتر لە "بۆش"ی نواند، راگەیاندنی
ئەمریكیش لەمەدا هاوكاری بوون. لەكۆنگرەی
كۆمارییەكان لە نیویۆرك هەستایەوە و هاواری
كرد "ئەم هەموو پەنا و پێچەی بۆچیە؟ بۆ ناڵێین
ئەم تیرۆرە ئیسلامیە؟". چەند جارێكیش
دەستەواژەی "ئیسلاموفاشست"ی بەكارهێنا.
بەپێی ئەو راپرسیەی ناوەندی "گالوب" ئەنجامی
داوە و رۆژنامەی "لۆس ئەنجلۆس تایمز" ساڵی پار
بڵاوی كردەوە، ئەمریكیەكان رایان لەبارەی
تیرۆرەوە نەگۆڕاوە. 75%ی ئەمریكیەكان تیرۆر
بەمەترسی بۆ سەر ئەمریكا دەزانن، 65% پێیان
وایە موسوڵمانان لەكردە تیرۆریستیەكانی
سەرتاسەری جیهان بەرپرسیارن، هەمان رێژە
وتویانە كە ترسیان بەرامبەر بە ئیسلام و
موسوڵمانان هەیە.
پەلامارەكەی 11ی سێپتەمبەر و شوێنكارەكانی كە
تاكو ئێستاش بەردەوامە، ئەم هەڵمەتی دژایەتیەی
بەرامبەر بە موسوڵمانان تەنیا لەئەمریكا دروست
نەكردوە، بەڵكو زۆر لەوڵاتانی جیهان و
ئەوروپاشی گرتۆتەوە. لێدوانەكانی "جێرت
فیڵدرز"ی سەرۆكی حیزبی راستڕەوی توندڕەوی
هۆڵەندی لە نۆیەمین ساڵیادی 11ی سێپتەمبەر
سەروتار و مانشێتی میدیاكانی ئەڵمانیا بوو،
كاتێك وتی "بەناوی ئازادییەوە، هیچ
مزگەوتێكمان لەهیچ شوێنێك ناوێت"، كە
بارگرژییەكی گەورەی لەنێوان موسڵمان و
مەسیحیەكاندا دروست كرد. بەشداریكردنی
"ئەنگێلا مێركل"ی راوێژكاری ئەڵمانیش
لەئاهەنگی رێزلێنان لە كاریكاتێریستی
دانیماركی، مشتومڕی توندی لەبارەی ئیسلام و
ئازادی راگەیاندنەوە هێنایە ئاراوە، زۆر لایەن
ئەمەیان بەكارێكی ئیستیفزازی دژ بە
موسڵمانەكان زانی، لەكاتێكیشدا بوو، كە
موسڵمانەكانی ئەڵمانیا هانایان بردبووە بەر
حكومەت تا ئەو هەڵمەتی دژایەتیكردنە بەرامبەر
بەموسڵمانان بوەستێنێت، كە لەم ماوانەی
دواییدا زیاتر پەرەی سەندبوو. "فیڵدرز"یش
لەكاتی بەشداریكردنی خۆنیشاندانەكان دژ بە
هەوڵی فراوانخوازی موسڵمانەكانی ئەمریكا، بە
دروشمی "بەڵێ بۆ ئازادی، نەخێر بۆ مزگەوت"
ئاگری ئەو بارگرژییە ئاینیەی خۆشتر كرد. ئەو
پیاوە لەهۆڵەندا بە لێدوانە ئاگرینەكانی و
دژایەتیكردنی ئاشكرای ئیسلام و موسڵمانان
ناسراوە، ئەو بەردەوام داوای كردوە
موسڵمانەكان لەیەكێتی ئەوروپا و لەهۆڵەندا
دەربكرێن، دواهەمین داخوازیشی سەندنی باج بوو
لەو ئافرەتە موسڵمانانەی باڵاپۆشن و لەچك
دەكەن، هەرچەندە داخوازییەكەی مایەی گاڵتەجاڕی
بوو بۆ ئەندامانی پەرلەمانی هۆڵەندی، كە تێیدا
حیزبەكەی فیڵدرز "حیزبی ئازادی هۆڵەندی" بووە
سێیەمین حیزبی نێو پەرلەمان و لەكۆی 150
كورسی، 24 كورسی بەدەست هێنا.
|
