سڤیل: بیلال سەعید - سۆما حەمید: تاران

لە ئەمەریكا كات بۆ هەموو شتەكان هەیە، بۆ كار و بۆ پێكەنین و بۆ خۆشی بەڵام لە ئێران وانییە

فلور ئەرزی توێژەرێكی ئێرانی و خاوەن بڕوانامەی ماستەرە و زیاتر لە 20 ساڵ لەئەمەریكا ژیاوە، بۆ ماوەی چەند ساڵێكە گەڕاوەتەوە ئێران. وەك خۆی ئاماژەی بۆ دەكات، یەكەمجارە لەرێگای گۆڤارێكی كوردی (سڤیل) هەڵسەنگاندن بۆ باری كۆمەڵایەتی وڵاتی ئەمەریكا دەكا و دەڵێ، خێزانەكان لەئێران زانیاری ناو خێزان لەمنداڵەكان دەشارنەوە، ئەمەش كاردانەوەی نێگەتیڤی دەبێ لەسەر داهاتووی كۆمەڵگای ئێرانی.
یەكێك لەو رەخنانەی بەردەوام رووبەڕووی بەرپرسانی ئێرانی دەبێتەوە، زەوتكردنی مافی تاكەكانە، بەڵام زۆرجار توێژەرانی ئێرانی ئاماژە بەوە دەكەن، كە كاریگەری خێزان رۆڵی سەرەكی هەبووە لەدروستكردنی تاكەكان، بەڵام ئازادی تاكەكان لەئەمەریكا گرنگی تەواوی پێدراوە، وەك فلور ئەرزی دەڵێت "تاكی ئەمەریكی راستگۆ و كراوەترن لەگەڵ یەكتر، ئەمەش لەخێزانەوە بۆیان دروستبووە، چونكە منداڵەكانیان خاوەن بڕیاری خۆیانن"، وەك ئەوە توێژەرە ئێرانییە، دەڵێت "ئەگەر لەئەمەریكا مەسەلەی پارە كەوتە ناو خێزان، لەمنداڵ ناشاردرێتەوە، بەڵكو كارێك دەكەن منداڵەكە ئاگاداربێت، بۆ ئەوەی بزانێت خێزانەكەی چۆن دەژی، بۆیە دەتوانم بڵێم هەقیقەت زیاترە لەناو خێزان لەئەمەریكا، بەڵام بەپێچەوانەوە خێزانی ئێرانی وا راهاتووە زۆرشت لەمنداڵەكانیان بشارنەوە، وەك چۆن هەندێك ئافرەت هەیە پیس و پۆخلی ماڵەوە دەكاتە ژێر فەرشەكەی بۆ ئەوەی بیشارێتەوە، لەئێرانیش بۆ هەموو شت ئەو سیاسەتە بەكاردەهێنرێت، بەتایبەت بۆ منداڵ و گەنجانیان".
لەكاتێكدا زۆر لەئامێرە تازەكانی بواری تەكنەلۆژیا لەجیهان بەكارهێنانیان رێگا پێدراوە، بەڵام زۆر لەهاوڵاتیانی ئێرانی گلەیی و گازندەی ئەوەیان هەیە، كە هێشتا لەزۆر لەشارەكانی ئێران رێگا بەبەكارهێنانی سەتەلایت و ئەنتەرنێت نەدراوە و سانسوری لەسەرە، لەبواری راگەیاندنیش تەنیا راگەیاندنی حكومەت بوونی هەیە. فلورا هەرچەندە لەناو ژینگەیەكی وەك وڵاتی ئەمەریكا بۆ ماوەیەكی زۆر ژیاوە، وای دەبینی كە بەشێك لەو پرۆسەی شاردنەوەی نهێنیەكان لەناو خێزانی ئێرانی، كاریگەری بۆ ناو كۆمەڵگاش دەبێت، بۆیە دەڵێت "دەبێت چاوەڕێی ئەوە بكەین دواتر چ كارەساتێك روودەدات، بەڵام لەئەمەریكا بەپێچەوانەیە هەموو مرۆڤەكان ئازادن لەدەربڕینەكانیان، تەنانەت لەناو كۆمەڵگاش، چونكە سیستەمێكی سیاسی دیموكراسی پەیڕەو دەكرێت و راگەیاندنیش بەهەمان شێوە رۆڵی چاودێریكردنی حكومەت دەگێڕێت، بۆیە شاردنەوەی نهێنی لەهاوڵاتیانی ئەمەریكی كەمتر هەستی پێدەكرێت وەك ئەوەی لەئێراندا هەیە".
زۆر لەكچان و كوڕانی ئێرانی باس لەوە دەكەن، كە بەهۆی بەرزبوونەوەی نرخەكان و زیادبوونی داواكاری كچان لەسەر ئاڵتون و دانانی پێشەكی و پاشەكیەكی زۆر و گرانبوونی نرخی یەكەی نیشتەجێبوون، ئاستی خوازبێنی كچان بەرێژەیەكی زۆر كەمی كردووە، بەڵام ئەم توێژەرە كە ئێستا لەئێران دادەنیشێت، هاوكات ئەویش ئاماژەی بەو مەترسیە كرد و وتی "بەهۆی بوونی پیاوسالاری لەزۆر لەكۆمەڵگەكان، زۆرینەی ژنان لەجیهان یەك كێشەیان هەیە، ئەویش نەبوونی ئەمنیەتی پارەیە. لەئێرانیش بەهۆی ئەوەی كچان لەكاتی مێردكردن داواكارییەكی زۆری موڵك و ماڵیان هەیە و پارەیەكی زۆریان دەوێت، بۆیە دەتوانم بڵێم بەشێكی پەیوەندی بەنەبوونی ئەو ئەمنیەتی پارەوە هەیە، چونكە بەشێكی زۆر لەژنان لەماڵەوەن و سەرچاوەی پارەیان تەنیا پارەی مێردەكانیانە و لەترسی جیابوونەوە، ئەو فشارە دروست دەكەن، بۆیە كاتێك باری ئابووری هاوڵاتیان خراپە، بێگومان كاریگەری راستەوخۆی دەبێت لەكەمكردنەوەی ژنهێنان"، بەڵام وەك ئەو دەڵێت "دیاردەكە لەئەمەریكا كەمترە و بەشێكی پەیوەندی بەوەوە هەیە، كە زۆر لەهاوڵاتیان خوێندەوارن و پیاوسالاری كەمتر هەیە، ژن زیاتر خۆی سەرچاوەی ماددی خۆی دابین دەكات، نەك وەك ئێران بێت".
زۆر لەهاوڵاتیانی ئێرانی لەكاتی گفتوگۆكردنیان لەگەڵ (سڤیل) بەتایبەت بەتەمەنەكان، باسیان لەوە دەكرد، كە نەوەی تازەی ئێرانی، كەمتر ڕیزگرتنیان تێدا ماوە. فلورا لەو بارەیەوە بۆچوونی وایە، كە بەشێكی زۆری نەمانی رێزگرتن لەناو هاوڵاتیانی ئێرانی پەیوەندی بەوەوە هەیە، كە حكومەتێكی نەخوێندەوار وڵات بەڕێوە دەبات و دەڵێت "راستە تادێت زانكۆ زیاتر دەبێت، بەڵام وانەكان هەر كۆنن، ئەوەش ناڵێم خوێندكاری زیرەكمان نییە، بەڵام ئاستی خوێندەواری كەمترە و ئاستی زانستیان زۆر كەم بووەتەوە، بەڵام لەگەڵ ئەو هەموو زانكۆیەی هەیە، كەچی ئامادەنین دایانمەزرێنن، ئەوە باسی زانكۆ ئازادەكان هەر مەكە، بەڵام وڵاتانی دیكە وانیە. وڵاتێكی وەك دوبەی رۆژ بەرۆژ لەرووی خوێندنەوە لەبەرەو پێشچووندایە، سەرۆكی وڵاتەكەیان كە خوێندنی لەئەمەریكا تەواو كردووە، هەموو هەوڵەكانی خستووەتە كار بۆ ئەوەی ئاستی خوێندن لەوڵاتەكەیان بەرز بكەنەوە، بەڵام لەئێران شتێكی وانیە. لەئێران هەیە پارەی هەیە بچێتە زانكۆ، بەڵام خۆ تەنیا رۆیشتنە زانكۆ حساب نیە، چونكە پێویستە بەزانستەوە بێیتە دەرەوە، كە ئەمەش لەئێران دەستناكەوێت، بەڵام لەئەمەریكا لەهەر گەڕەكێك بێت دەتوانێت بخوێنیت، لەگەڵ ئەوەشدا لەپۆلی نۆیەمی بنەڕەتی كار لەسەر ئەوە دەكرێت، كە وەك گەنجێك دەتەوێت لەچی بخوێنێت؟ دەتوانیت جیاواز لەخوێندنەكەت حەزەكەی خۆت جێبەجێ بكەیت، وەك وەرزش یان هونەر یان هەركارێكی دیكە، بۆیە ئەوكات دەبیتە خاوەن سیڤی خۆت و كاریگەری دەبێت لەسەر خوێندن لەو زانكۆیەی دەتەوێت بخوێنیت، لەگەڵ ئەوەشدا لەئەمەریكا هاوكاری ئەو قوتابیانە دەكرێت، كە باری داراییان خراپە، بەوەی كە خوێندنی تەواوكرد بەقیست پارەكەی دەوڵەت دەداتەوە".
بۆیە وەك ئەو ژنە توێژەرە دەڵێت "ئەو بەو سیستەمەی لەئێران پەیڕەو دەكرێت، زۆر ئەستەمە خوێندن پێشبكەوێت، چونكە دەرچوون لەزانكۆ زۆر ئاسانە، ئەو قوتابییانەی لەئێران لەزانكۆ دەردەچن هیچ تایبەتمەندێكیان نییە. لەئەمەریكا كاتێك دەبیتە خوێندكار، ئەگەر بتەوێت پزیشكی بخوێنی تەنانەت كاتی ئەوەت نامێنی قژت شانە بكەیت، نەك وەك ئێران بەكەیف و خۆشی بەڕێی بكەیت، تەنانەت خوێندكاری وا هەیە زۆر بەئەستەم دەتوانێت تەواوی بكات و هی وا هەیە لەنیوەی رێگا خوێندن بەجێ دەهێڵی، بۆیە لەزانكۆكانی ئەمەریكا هەمیشە خەمی ئەوە دەخورێت، كە كەسێكی زیرەك و تایبەتمەند لەبوارێكی دیاریكراو بهێنرێتە ناو كومەڵگا".
ئێرانیەكان، كاتێك باس لەمێژووی خۆیان دەكەن، زۆربەیان باس لەجوانی و دەنگخۆشیان دەكەن و مێژووەكەیان بەوپەڕی گەشبینییەوە وەسف دەكەن، بەڵام بەشێكیان لەئیستادا بەوە ناسراون، كە خەمناك و خەفەتبارن و پێكەنین بەكەمی لەسەر لێویان هەستی پێدەكرێت، فلورا هۆكارەكەی بۆ چەند خاڵێك دەگێڕێتەوە و پێیوایە "ئێرانیەكان لەهەموو روویەكەوە ناخیان پەنگی خواردۆتەوە، هیچ جۆرە ئازادییەك نیە لەرادەبڕین و جلوبەرگ و راگەیاندن و بیروڕا، كە یەكێكە لەهۆكارەكان، چونكە ئێرانیەكان ئێستا لەناو دیكتاتۆریەتدا دەژین. هەر كارێك بكەیت لێپرسینەوەی لەسەرە، ئەمەش دەبێتە هۆی خەم و خەفەت لەلای هاوڵاتی، بۆیە پێكەنین لەكوێ بمێنی؟ چونكە كاتێك من دەمەوێت بڕۆمە بازاڕ، دەبێت بەزۆر لەچك لەسەربكەم، بۆیە لەكۆی بتوانم شادبم؟ لەگەڵ ئەوەشدا گرانبوونی نرخی شتەكان، لەكاتێكدا ئەوانەی پارەی زۆریشیان هەیە، هەمیشە خەفەتبارن، بۆیە دەتوانم بەشێكی بە هۆكاری تێكچوونی باری ئابووری و خراپی داهاتی تاكەكەس بزانم".
فلورا، دەشڵێت "زۆرم پێ سەیرە بەشێك لەبەرپرسان باس لەوە دەكەن، فڵان شت بكە بابچیتە بەهەشت، نازانم ئەوان چیان بەو كارانەوە هەیە، كە من بڕۆمە بەهەشت یان جەهەنەم؟ ئەوە پەیوەندی بەخودی مرۆڤەكانەوە هەیە و خۆیان ئازادن چۆن هەڵیدەبژێرن؟ بەڵام لەئەمەریكا كات بۆ هەموو شتەكان هەیە، بۆ كار و بۆ پێكەنین و بۆ خۆشیش".