سڤیل: هاوكار محێدین

"نەمدەویست ئەو ژنەم تەڵاق بدەم، بەڵام كە ژیانی خۆی و ئێمەشی كردە دۆزەخ، ناچاری كردم ئەو بڕیارە بدەم"

پاش ئەوەی ژنەكە هەوڵی خنكاندنی هەوێیەكەی دەدا، پیاوەكەی دەستبەجێ بڕیاری جیابوونەوەی لەگەڵ دەدات و دادگاش بەهۆی خراپی باری دەروونی ژنەكە، سەرەڕای زیندانیكردنی، بەڵام حوكمەكە تا ماوەی سێ ساڵ رادەگرێت.
وەكو ژنی یەكەمی پیاوەكە بۆ (سڤیل) ئاماژەی بۆ دەكات، بەر لەبەیەكەوەنانی ژیانی هاوسەری، ئەوان بۆ ماوەی دوو ساڵ و نیو خۆشەویستی یەكتر بوون و دواتریش پێنج ساڵ وەكو ژن و مێرد بەیەكەوە ژیاون و لەو ماوەیە سێ منداڵیان بووە. ئەو ژنە دانیشتوی گەڕەكی (ماسیكا ئێك)ی ناو پارێزگای دهۆكە و چەند رۆژێك لەمەوبەر هەوڵی خنكاندنی هەوێیەكەی خۆی دا، بەهیچ جۆرێك نكۆڵی ناكات لەكارەكەی و بێ ئاماژەكردن بەناوەكەی (كە مەرجی ئەو بوو) بۆ (سڤیل) گوتی "ئەوكاتەی من بڕیاری ژیانی هاوسەریم دا لەگەڵ ئەو پیاوە، هیچی نەبوو، بەڵام لەو ماوەیە بووینە خاوەنی خانوو و سەیارە و دوكانی خۆمان، بۆیە راستە، كە دەڵێن ئەگەر كورد دەوڵەمەند بێت، یان ژنێك هەڵدەگرێت یان پیاوێك دەكوژێت، بۆیە ئەوەی من ژنێكی بەسەر خۆیدا ساغ كردەوە". ئەو ژنە ئاماژە بەوەش دەكات، كە پیاوەكەی لەدوای ئەوەی دوكانێك بۆ جلوبەرگی ژنان لەناو بازاڕی دهۆك دادەنێت، وەك دەڵێت "رەوشتی تێكچوو و لەگەڵ كچان دەچووە دەرەوە، تاوەكو لەگەڵ یەكێ لەو كچانە قەوماندی و ماڵی لەمن و منداڵەكان تێكدا".
وەكو ئەو ژنە باسی لێوە دەكات، پیاوەكەی لەدوكان كچێكی تەمەن 29 ساڵی دەناسێت و پاشتر چەند جارێك بەیەكەوە دەچنە لای دارەكانی زاویتە و "كاری ناشەرعی" دەكەن، تا لەدواجاردا وەك ئەو ژنە دەڵێت "پیاوەكەم ئەو كچەی كردە ژن و بەیەكجاری ماڵی بەسەر مندا كاول كرد. بێگومان ئەوە پیلانێكی پێشوەختەی كچەش بوو، چونكە ئەگەر ئاوا نەبووایە و خۆی بەملی پیاوەكەمدا نەهێنابایە، من بەهیچ شێوەیەك رازی نەدەبووم ئەو ژن بەسەر من بێنێت". وەكو ئەو ژنە ئاشكراشی دەكات، دواتر دایكی كچە بەمەسەلەكە دەزانێت و ئەویش ئامۆژگاری پیاوەكەی ئەم دەكات، بۆ ئەوەی خۆی و كچەكەی ئەو نەكوژرێت، پێویستە پیاوەكە بەبێدەنگی بچێتە داوای كچەكەیان و بەو جۆرەش كەس بەمەسەلەكە نازانێت.
ئەو ژنە كە لەدادگا وەك تاوانبارێك مامەڵەی لەگەڵدا كرا و پیاوەكەشی دواتر لێی جیابۆوە، بەچاوی پڕ لەگریانەوە بۆ (سڤیل) گوتیشی "پاش ئەوەی هەردوولا، پیاوەكەم و دایكی ئەو كچە لەسەر ئەوە رێكەوتن بۆ روونەدانی هیچ كێشەیەك، مەسەلەكە بەزەواج كۆتایی پێبهێت، ئینجا زانیم ماڵ بەسەر مندا كاول بوو و ژیانم لێ تێكچوو. ئاخ بۆ ئەو هەموو خۆشەویستی و پێكەوەژیانە، من تازە چی لەو منداڵانە بكەم، كە بەبێ نازی لەوێم جێهێشتوون".
وەك ئەو ژنە باسیشی دەكات، دوای ئەوەی پیاوەكەی ژنی دووەم دەهێنێت، ئەو دەستی هەرسێ منداڵەكەی دەگرێت و دەچێتەوە ماڵی باوكی، بەڵام دوای سێ مانگ، ئینجا رۆژێك پیاوەكەی دێتە دوای و رازی دەكات لەبەرخاتری منداڵەكان بگەڕێتەوە و هەموویان بەیەكەوە بژین. بۆیە وەك ژنەكە دەڵێ، هەرچەندە ئەو رازی بوو لەگەڵیدا بچێتەوە ماڵ "بەڵام ماڵی چی؟ ئەوجارە لەجیاتی بەهەشت ماڵەكەمان ببووە دۆزەخ، بەردەوام لەگەڵ هەوێیەكەم شەڕمان بوو، چونكە ئەو خۆی بەخاوەن ماڵ دەزانی و ئێمەشی لەوێ وەك میوان دەبینی، بۆیە هەركاتێك پیاوەكەم دەهاتەوە ماڵیش، لەبەر شەڕی ئێمە دەچۆوە دەرەوە".
ساڵێك بەو جۆرە دەگوزەرێنن، پیاوەكەی هەر لەهەمان خانوو، نهۆمێكی دیكە لەسەرەوە دروست دەكات و هەر خێزانە و لەنهۆمێك دەژین، بەڵام وەك ئەو ژنە دەڵێت "راستە ئەوجارە كەمتر یەكترمان دەبینی، بەڵام فەرق و جیاوازی پیاوەكەم دەستی پێكرد و زیاتر گرنگی بەهەوێیەكەم و منداڵەكانی ئەو دەدا، ئەمەش وایكرد رۆژ بەرۆژ رقم ئەستورتر بێت بەرامبەر بەو هەوێیەم". بۆیە هاوسەری یەكەمی ئەو پیاوە، چیدی ناتوانێت ئەو رقەی خۆی بشارێتەوە و رۆژێك كۆنتڕڵی خۆی لەدەست دەدات و بەپارچە پەڕۆیەك هەوڵی خنكاندنی هەوێیەكەی دەدات.
رۆژی دادگاییەكەش، هاوسەری دووەمی پیاوەكە، هاتە بەردەم دادوەری دادگای تاوانەكانی دهۆك، هەوڵی خنكاندنی لەلایەن هەوێیەكەی ئاوا گێڕایەوە و گوتی "رۆژێك لەماڵەوە دانیشتبووم، بەبێ ئەوەی هیچ شەڕێكمان كردبێت ئەو رۆژە یان قسەیەكی ناخۆشمان بەیەكتری گوتبێت، لەناكاو هەوێیەكەم لێم بەژوورەوە كەوت و بەپارچە پەڕۆیەك ویستی بمخنكێنێ، بەڵام من بەرگریم لەخۆم كرد و دواتریش هاوسێكان بەهۆی قیژە و هاواری من بەمەسەلەكەیان زانی و هاتن منیان لەبەردەستی ئەو قورتار كرد"، ئەو ژنە كە هەوڵی خنكاندنی لەلایەن هەوێیەكەوە درابوو، لەدادگا قسەكانی هەوێیەكەشی رەتكردەوە بەوەی گوایە، پیاوەكەی سەرەتا ئەوی لەكچێنی خستبێت و پاشتر بەناچاری شووی بەو پیاوە كردبێت و گوتی "بەرلەوەی شوو بەو پیاوە بكەم، من بۆ ماوەی سێ ساڵ مارەبڕی كوڕە كوردێكی هەندەران بووم، بەڵام لەدوای ئەوەی زانیم ناتوانێت بمباتە هەندەران، ئینجا بڕیاری جیابوونەوەم دا و شووم بەو پیاوەی ئێستام كرد".
لەكۆتایی قسەكانیشدا، ئەو ژنە هەرچەندە هەوڵی خنكاندنیشی لەلایەن هەوێیەكەوە درابوو، بەڵام لەبەردەم دادوەر رایگەیاند، كە ئەو لەهەوێیەكەی خۆی خۆش دەبێت و گوتیشی "من چاوم لەمنداڵەكانیشی دەبێت، تەنها بەو مەرجەی ئەویش بەڵێن بدات چیدی ئازارم نەدا و بەڵای خۆی لەكۆڵ من بكاتەوە".
هاوسەری هەردوو ژنەكە دوای تەواوبوونی قسەكانی هاوسەری یەكەمی، ئەویش هاتە بەردەم دادوەری دادگای تاوانەكانی دهۆك و لەدەسپێكی قسەكانیدا گوتی، كە ئەو پێشتریش زۆر حەزی بەوە كردووە خاوەن دوو یان سێ ژن بێت، بەڵام دوای ئەوەی بەراستی بووە خاوەنی دوو ژن، "ئینجا زانیم چ دۆزەخێكە"، ئەو پیاوە گوتیشی "من زۆرم هەوڵدا كەسیان ماڵ و حاڵیان لێ تێكنەچێت، بەڵام كە زانیم هاوسەری یەكەمم هەوڵی خنكاندنی هاوسەری دووەمی داوە، چیتر نەمتوانی دان بەخۆمدا بگرم و تەڵاقم دا". لەبارەی منداڵەكانیش، كە ئێستا لەگەڵ باوكیان دەژین، پیاوەكە وتی، كە لەدوای تەڵاقدانی هاوسەری یەكەمی، ئەویش توڕە دەبێت و دەڵێ، ئەو منداڵانەش مادام لەتۆنە، دوارۆژ وەكو باوكیان خائین دەردەچن، بۆیە گوتی "من منداڵی تۆشم نەویست و منداڵەكانی بەسەردا جێهێشتم".
بۆیە وەك ئەو پیاوە بۆ دادوەر ئاماژەی پێدا، ئەو بەهیچ جۆرێك لەگەڵ تەڵاقدانی هاوسەری دووەمی نەبووە، بەڵام ئەوە دوا چارەسەر بووە و ئەو هاوسەرەی یەكەمی بەدرێژایی ماوەكە، نەیتوانیوە خۆی لەگەڵ بارودۆخەكە و هاوسەری دووەم بگونجێنێت و ژیانی خۆی و ئەوانیشی كردووە بەدۆزەخ.
دادوەری دادگای تاوانەكانی دهۆك، لەكۆتایی دانیشتنەكە، بڕیاریدا بەشەش مانگ زیندانیكردنی هاوسەری یەكەمی پیاوەكە، بەڵام بەهۆكاری ناتەواوی باری دەروونی ژنەكە بەهۆی لەدەستدانی منداڵەكان و هاوسەرەكەی، هاوكات لێخۆشبوونی هەوێیەكەی و خاوێنی دۆسییەی ژنەكە جگە لەم تاوانە، بۆیە دادگا ماوەی حوكمەكەی كە شەش مانگ بوو، بۆ ماوەی سێ ساڵ راگرت، بەڵام لەماوەی ئەو سێ ساڵە، ئەگەر ژنەكە هەر تاوانێكی دیكەی ئەنجام بدا بەو هۆیەوە حوكم درا، ئەو شەش مانگەش دێتەوە سەر حوكمەكەی.