|
 سڤیل:
قائید میرۆ مزووری
دایكی سەهەند: لە پرێك پیاوێك خۆی كردە بە
ژووردا، هیچ دەنگی لەگەڵ من نەكرد، دەستی دایە
سەهەند و دەمی خستە ناو كۆشییەوە و ئەندامەكەی
لێكردەوە
منداڵێكی تەمەن 1 ساڵ و نیو لەیەكێ
لەگوندەكانی دەوروبەری شاری هەولێر، رۆژی
یەكشەممە 25/12/2011 لەلایەن كەسێكی تێكچوو
لەباری دەروونییەوە هێرشی كرایە سەر و ئەندامی
نێرینەی بەدەم قرتێندرا. ئێستاش دوای
ئەنجامدانی نەشتەرگەری یەكەم، منداڵەكە
لەماڵەوە چاوەڕوانی نەشتەرگەری دووەم دەكات،
لای خۆشییەوە (موحسین شەمزین) بەڕێوەبەری
كارگێڕی نەخۆشخانەی فریاكەوتنی رۆژئاوای
هەولێر بە (سڤیل)ی راگەیاند، كە تائێستا
حاڵەتی بەو شێوەیە نەچۆتە نەخۆشخانەكەیان و
یەكەم حاڵەتە كە لەوجۆرە دەبینن و چارەسەری بۆ
دەكەن.
دوای ئەوەی لەگەڵ موختار و چەند كەسێكی
گوندەكە رێككەوتین، كە لەو راپۆرتەدا ناوی
گوند و عەشیرەت و ناوچەكە بڵاونەكەینەوە،
رەزامەندیان نیشاندا تا (سڤیل) بەدواچوون بۆ
ئەم رووداوە بكات. باپیری سەهەند (غەفوور
سەعید) تەمەن 40 ساڵ بۆ (سڤیل) چۆنیەتی
دروستبوونی رووداوی قرتاندنی ئەندامی نێرینەی
(سەهەند)ی نەوەی گێڕایەوەو ئاماژەی بۆ
ئەوەكرد، كە ئەو رۆژەی رووداوەكە روویداوە،
ئەو لەماڵی خۆیان بووە، دەڵێت "كاتژمێر نزیكی
11ی پاشنیوەرۆ بوو، لەماڵەوە لەگەڵ سێ كەسی
دیكە خەریكی مامەڵەی گۆڕینەوەی چەكەكانمان
بووین، لەگەڵ دەنگی كچەكەم هەستم بەدروستبوونی
حالەتێكی نائاسایی كرد، بۆیە هەرزوو چوومە
دەرەوە، بینیم سەهەند لەسەردەستی كچەكەمە و
لەخوێن سووربووە و دەگریێت"، وەك باپیری
سەهەند گێڕایەوە "كوڕێكی گوندی خۆمان كە ناوی
(ر-ش) چەند رۆژێك بەر لەرووداوەكە، باری
دەروونی تێكچوو بوو، بەڵام تا ئەو رۆژەی هێرشی
نەكردە سەر ماڵی كوڕەكەم، نەمزانی ئەو گەنجە
تێكچووە".
(ر-ش) تەمەنی نزیكەی بیست ساڵان دەبێت، قوتابی
قۆناغی 12 ئامادەییە، لەقوتابخانە باری
دەروونی تێكچووە، ئەوكاتەی ئاواشی لەنەوەكەی
غەفوور كردووە، باب و برا و خوارزایەكی
بەدواوەی بوون تا بیگرن و كێشەیەك نەنێتەوە،
بەڵام هیچیان لەگەڵی پێنەكراوە.
مام غەفوور، بەردەوام دەبێت لەگێڕانەوەی
رووداوەكەو دەشڵێت "دوای ئەوەی (ر-ش) لەدەست
كەسوكارەكەی رادەكات، دێتە ناو گوند و دەچێتە
ناو ماڵی كوڕەكەم كە ناوی (سەبوور)ەو ماڵەكەی
دەكەوێتە تەنیشت ماڵی خۆم، ئەو رۆژەش سەبووری
كوڕم لەماڵ نەبوو و هاوسەرەكەی كە تازە سەری
كوڕەكەی شووشتبوو، لەسەر زەوی داینابوو، دوای
ئەوەش یەكسەر شێتەكە پەلاماری سەهەند دەدات و
دەمی لەناو كۆشی داناوە و ئەندامی نێرینەی
بەیەكجاری لێ كردۆتەوەو خواردویەتی"، باپیری
سەهەند، دەشڵێت "بەچاوی خۆم بینیم كە چۆن
شێتەكەیان لەناو ژووری ماڵی كوڕەكەم هێنایە
دەرەوە و ناودەمی هەمووی خوێن بوو و تا گەیشتە
ناو گەرووی دیاربوو". مام غەفور زۆر بەهێمنی
قسەی بۆ (سڤیل) دەكرد و هێمای بۆ ئەوەشكرد، كە
هیچ كێشەیەكی لەگەڵ ماڵی ئەو كەسە نییە، كە
پەلاماری نەوەكەی داوە و راشیگەیاند، نیەتی
ئەوەی هەیە لەبەرخوا لێی خۆشبێت، چونكە وەك
خۆی دەڵێت "شێت شێتی خوایە و ئەو رۆژەی
سەهەندی بچووكم بەو شێوەیە بینی زۆر پێی
دڵگران بووم، كلاشینكۆفم لابوو، بەڵام
بەئیرادەی خوا شتی خراپ نەهاتە ناو دڵم،
یەكسەر لەگەڵ دایكی هەڵمگرت و بردمە
نەخۆشخانەی فریاكەوتنی هەولێر، تەلەفۆنیشم بۆ
موختاری گوندی خۆمان كرد و پێمڕاگەیاند، كە
جارێ لەبەر ئەوەی هەموو خزمەكانی من
لەنەخۆشخانەن با ئەوان نەهێنە نەخۆشخانە و
ئاگاداری ئەو شێتەبن، تا كێشەیەكی دیكە دروست
نەكات، چونكە دوای ئەنجامدانی كارەكە (ر-ش)
پەلاماری باب و برایەكانیشی دەدا و بەبەرچاوی
خۆمەوە بۆكسێكی لەباوكی داو جامانەی خستە
خوارەوە".
لەبارەی ئەو كوڕەوەش كە پەلاماری نەوەكەی دا،
وەك باپیری سەهەند گوتی "ئەو كوڕە پێشتر
تابڵێی كوڕێكی بەئەخلاق و هێمن بوو، ئەو ماڵە
چوار كوڕیان هەیە هەموویان لەیەكتر بەرێزترن
بەتایبەت (ر) بەردەوام هاتوچۆی مزگەوتی دەكرد،
تا ئەو رۆژەی رووداوەكە روویدا، من نەمزانی
تێكچووە. دواتر خەڵكی گوند بۆیان گێڕامەوە، كە
هەفتەیەك بەر لەرووداوەكە باری دەروونی تێكچوو
بوو"، مام غەفور لەكۆتایی قسەكانیشیدا ئەوەی
رونكردەوە كە (ر-ش) ئێستا لەنەخۆشخانەیەو
لەبەر خاتری ئەوەی كوڕێكی باشبووە، ئەوان هیچ
كاردانەوەیەكیان نابێت و گوتیشی "ئێستاش هەموو
رۆژێك باوكی (ر) دێتە لامان لەتەندروستی
سەهەند دەپرسێت؟ منیش شەرم لەماڵی ئەو كوڕە
دەكەم و دامناوە لەرێی خوا لێی خۆشبم، چونكە
پێشتر تابڵێی كوڕێكی باش و بەئەخلاق بووە".
دایكی سەهەند، ئەویش لای خۆیەوە، ئاوا باسی
رووداوەكەی ئەو رۆژەی بۆ كردین، كە چۆن
بەبەرچاوی خۆیەوە پەلاماری كوڕە 1 ساڵ و
نیوەكەی دراوە و گوتی "دوای ئەوەی سەری
سەهەندم شووشت لەناو خاولیەك لەپێش زۆپام دانا
و خەریكی دەرهێنانی جلەكانی بووم لەناو
كەوەنتەرەكە، لەپرێك بینیم پیاوێك خۆی كردە
بەژوورەكەمان دا و یەكسەر دەرگای لەپشتەوە
داخست، هیچ دەنگی لەگەڵ من نەكردو دەستی دایە
سەهەند و دەمی خستەناو كۆشییەوە و ئەندامەكەی
لێكردەوە، منیش پڕم دایە كوڕەكەم و لەناو
دەستی دەرمهێنا، بەڵام ئەو پیاوە زۆر بە
بەهێزی كوڕەكەمی گرتبوو، سەهەندم بەبرینداری
هەڵگرتەوە و بردمە دەرەوە بۆ ماڵی باپیری،
خوشكێكی هاوسەرەكەم هات و لەمنی وەرگرت"،
گوتیشی "ئەوكاتەی من سەهەندم لەشێتەكە وەرگرت،
ئەو هەر لەژوورەوە مابۆوە و لەخۆچوو بوو و
لەسەر زەوی راكشابوو".
باوكی سەهەنەد (سەبوور غەفوور) لەلێدوانێكیدا
بۆ (سڤیل) باسی لەوەكرد كە ئەو لەساڵی 2009
ژیانی هاوسەری پێكهێناوەو سەهەند نۆبەرەیەتی،
ئەو رۆژەی رووداوەكەش لەماڵەكەی ئەوان
روویداوە، وەك خۆی هێمای بۆ دەكات، ئەو لەسەر
كاربووە و لەلایەن یەكێك لەمامەكانی
لەرووداوەكە ئاگادار كراوەتەوە، دەڵێت "ئەو
رۆژە من لەسەر كاربووم و لەماڵ نەبووم،
لەگوندی زەیتوونی ناوشاری هەولێر لەگەڵ مام و
خزمەكانم خەریكی كرێكاری و گەچكردن بووین،
تەلەفۆنێك بۆ مامم هات و بەدزی منەوە وەڵامی
پەیوەندییەكەی دایەوە، دوای ئەوە مامم گوتی
خۆتان بگۆڕن دەچینەوە، منیش هەستم بەهیچ
نەكرد، گوتم وەك رۆژەكانی دیكە كارەكەمان
كۆتایی هات و دەچینەوە ماڵ، بەڵام كە لەناوشار
بەسەیارە دەرهاتین، مامم رۆیشت بەرەو
نەخۆشخانەی فریاكەوتن و ئینجا بەمنی گوت
روداوێكی بەو شێوەیە روویداوە و سەهەند
بریندارە".
دكتۆر (جەلال حەمە ساڵح) پسپۆڕ لەبواری
نەشتەرگەری جوانكاری، لەبارەی نەشتەرگەریكردنی
جوانكاری بۆ سەهەند و رێژەی سەركەوتنی
نەشتەرگەرییەكە، هێمای بۆ ئەوەكرد و گوتی كە
"لەلایەن ئەو دكتۆرە ئاگادار كرامەوە كە
نەشتەرگەری یەكەمی بۆ (سەهەند) ئەنجامداوە، كە
حالەتێكی لەو شێوەیە هەیە و دواجار رێككەوتین
لەسەر ئەوەی كە چوارشەممەی داهاتوو منداڵەكە
ببینین و نەشتەرگەری دووەمی بۆ ئەنجام بدەین".
ئەو دكتۆرە پسپۆڕەی جوانكاری، گوتیشی "بۆ
یەكەمینجارە لەكوردستان حالەتی لەو شێوەیە
رووبدات". ئەوەشی گوت كە "نەشتەرگەری لەوجۆرە
بۆ منداڵی خوار تەمەن هەشت ساڵ زۆر ناخۆشترە
لەسەرووی ئەو تەمەنەوە و دەشبێت كاتێك سەهەند
گەیشتە تەمەنی هەرزەكاری جارێكی دیكە
نەشتەرگەری بۆ بكرێتەوە".
|
