سڤیل: مێهرەبان مەحمود

بەشداریكردنی ژنانی دەڤەری رانیە لەبوارە جیاجیاكانی ژیانی رۆژانەدا، بەشێوەیەكی زۆر كەم دەبینرێت و كۆمەڵەیەكیش خولێكی فێربوونی وتارنوسین بۆ كچانی رانیە دەكاتەوە.
كۆمەڵەی خەڵك بۆ گەشەپێدان، بەمەبەستی دەرخستنی تواناكانیان و قسەكردن لەسەر پرسەكانی ژنان و توندوتیژییەكانیان، دەورەیەكی وتارنوسینی بۆ كچانی ئەم ناوچەیە كردەوە، ئەو كۆمەڵەیە كە رێكخراوێكی نەرویجییەو لەئەنجامی خۆماڵیكردنی چالاكییە مەدەنییەكانی بەرنامەی گەشەپێدانی كۆمەڵ لەرێكخراوی فریاگوزاری گەلی نەرویجی NPA ساڵی 2004 لەكوردستان دامەزراوە، لەساڵی 2008ەوە سەنتەرێكیان لەرانیە هەیە، كەوا كاردەكات بۆ گەشەپێدانی سیستەمی ژیان و دیدوبۆچوونی گرۆ كۆمەڵایەتییە جیاوازەكان، بەتایبەت پەراوێزكەوتووەكان، تاوەكو گەشە بەكۆمەڵگایەك بدەن، كە تێیدا ئاسایشی مافە سیاسی و مەدەنی و ئابووری و كۆمەڵایەتی و كەلتوورییەكان بەیەكسانی دابین بكەن.
ئاراستەكاری مەیدانی رێكخراوی كۆمەڵەی خەڵك بۆ گەشەپێدان، ئاماژەی بۆ ئەوەكرد، كە ئەم دەڤەرە توندوتیژی ژنان و بەشدارینەكردنیان لەزۆربەی مەجالەكاندا زۆرە. (بەهار مونزیر) ئاراستەكاری مەیدانیی رێكخراوەكە بۆ (سڤیل) گوتی "ژنانی ئەم دەڤەرە پێویستیان بەوشیاری زیاترە، هەربۆیەش زۆر تەركیزمان خستۆتە سەر ئەم ناوچەیە". بەهار، ئاماژەی بۆ ئەوەشكرد كە پێویستە ژنان بنوسن و بەشداربن لەبەڕێوبردنی كۆمەڵگادا، دەشڵێت "ژنانی ئەم ناوچەیە توانایەكی زۆر باشیان هەیە، بەڵام ناتوانن دەریبخەن یان پشتیوانیان نییە، ئەمەش زیاتر بەهۆی زاڵبوونی بیركردنەوەی پیاوسالارییە".
دڵسۆز عەبدوڵڵا، كە قوتابی ئامادەییەو بەشداری لەدەورەی وتارنوسین كردووەو وتاری نوسیوە لەسەر پرسی ژنان، پێیوایە ئەمە دەروازەیەك بووە بۆ دەرخستنی تواناكانی. دڵسۆز، بۆ (سڤیل) دەڵێت "هەستدەكەم منیش توانام هەیە، بەڵام دەرمنەخستووە، بەڵام كە ئێستا بەرچاوڕونیمان هەیە لەنوسین لەسەر پرسەكانی پەیوەست بەخۆمان وەكو مێینە، ئەوەم بەروونی بۆ سەلماوە، كە منیش هەندێ توانای شاراوەم هەیەو هەستم پێنەكردووە". پەیام كەیفی، قوتابی زانكۆیەء یەكێ لەبەشداربووانی دیكەی خولەكەیە، ئەویش ئاماژەی بۆ ئەوەكردو گوتی "فێربوونم لەچۆنیەتی وتارنوسین بەرچاوڕوونیەك بوو، بۆ ئەوەی كە بتوانم تواناكانم بەكاربهێنم".
چالاكوانێكی بواری رێكخراوەیی لەرانیە، جەخت لەوە دەكاتەوە كە بەشداری كچان و ژنان لەبواری رێكخراوەكان و بوارەكانی دیكەدا زۆركەمە، هۆكارەكەشی گەڕاندەوە بۆ نەبوونی ئاستی رۆشنبیری رەگەزیی مێینە. سۆزان ئەحمەد، بۆ (سڤیل) گوتیشی "نەبوونی متمانە لەلایەن كچانەوە بەخۆیان كە بەشداری لەبوارە جیاجیاكاندا بكەن و رۆڵیان هەبێت، هاوكات دەبێت ئەوەش بگوترێت كە رێكخراوەكانیش تائێستا لەناوچەكەدا، لەئاستی متمانەی كچان و ژناندا نەبوونە و نین".
بەرپرسی سەنتەری كۆمەڵەی خەڵك بۆ گەشەپێدانی لقی رانیە، جەختی لەوە كردەوە، كە پێویستە ئاستی رۆشنبیری و هۆشیاری ژنان بەرزبكرێتەوە لەبەرامبەر ئەو توندوتیژیانەی بەرامبەریان دەكرێ، لەلێدوانێكیدا بۆ سڤیل (یوسف) لەبارەی ئەو خولەی وتارنوسین كە بۆ ئافرەتانی دەڤەرەكە كردویانەتەوە، گوتی "ئامانجمان بەرزكردنەوەی ئاستی هۆشیاری و رۆشنبیری ژنانی ئەم دەڤەرەیە كە بتوانین ئەو توندوتیژیانەی بەرامبەر بەژنان لەو دەڤەرە دەكرێت، وابكەین لەڕێگای نوسینەوە تەعبیر لەئازار و مەینەتییەكانی خۆیان بكەن".