سڤیل: دهۆك
بەپێی ئاماری چاكسازی ئافرەتان و منداڵانی دهۆك، لەساڵی 2011دا (64) منداڵی كوڕ حوكم دراون و (35) منداڵی دیكەش دەستبەسەر كراون. هەر لەو چاكسازییەی دهۆك، ساڵی رابردوو (23) ژن حوكم دراون و (16) ژنیش دەستبەسەر كراون.
ژنێكی ناو چاكسازییەكە كە نەیویست ئاماژە بەناو و تەمەنی بكرێت، بۆ (سڤیل) ئاشكرای دەكات كە ئەو بەهۆی خیانەتی هاوسەرگیری و پێزانینی پیاوەكەی، رێگای كەوتۆتە ناو زیندان، دەڵێت "من نایشارمەوە، خیانەتی هاوسەریم لەپیاوەكەم كرد و پاش ئەوەی ئاشكرابووم، پەیوەندیم بە بەڕێوەبەرایەتی توندوتیژی دژ بەئافرەتان كردو دواتر رەوانەی ئێرە كرام". گوتیشی "من ئومێدبڕاو بوومە لەوەی كە جارێكی دیكە بگەڕێمەوە ناو خێزانەكەم و ژیانێكی ئاسایی دەستپێبكەمەوە، كەسوكارەكەشم دەڵێن ئەگەر پیاوەكەت تەڵاقت بدات، ئێمە تۆ دەكوژین". ئەو ژنە بەچاوی پڕ لەفرمێسكەوە باسی ئەوەشی كرد كە زۆرجار بیری منداڵەكانی دەكات، بەڵام پیاوەكەی رێگایان پێنادات بهێنە ناو چاكسازی و بیان بینێت. دەشڵێت "ئێستا زۆر پەشیمانم كە ئەو كارەم كردووە، داواش لەهەموو ژنێك دەكەم كەوا كەس نەچێت بەلای ئەو كارەوە".
ژنێكی دیكەی ناو چاكسازییەكە، بەناوی خوازراوی (ئارەزوو) قسە بۆ (سڤیل) دەكات و دەڵێت "من لەسەر دیار نەمانی هەندێ پارە لەیەكێ لە بەڕێوەبەرایەتییەكان دەسگیركراوم، سەرەڕای ئەوەی كە بێتاوانیش بووم، بەڵام دادگا رێگای پێنەدام بەرگری لەخۆم بكەم و ماوەی 3 مانگ دەستبەسەر بووم و ئێستاش زیندانیكراوم".
فریال محەمەد سدیق، بەرپرسی هۆبەی ئافرەتان لەچاكسازی ئافرەتان و منداڵانی دهۆك، هێما بەوە دەكات كە ئەو ژنانەی لەلایەن دادگاوە رەوانەی چاكسازییەكەی ئەوان دەكرێت، "بەشێوەیەكی زۆر بەڕێزەوە پێشوازی لەژنەكان دەكرێت" و ئەوان هیچ پەیوەندییەكیان بەوەوە نییە كە ئاخۆ ئافرەتەكە چیكردووە و لەسەرچی گیراوە؟. ئەو بەرپرسەی هۆبەی ئافرەتان، ئەوەشی دركاند كە بۆ كۆنتڕۆڵكردنی ئافرەتەكانی ناو چاكسازییەكە، ئەوان كامێرای نهێنییان داناوەو ئافرەتەكانیان خستۆتە ژێر چاودێری، دەڵێت "بەڵام لەناو ژووری تایبەتی ئافرەتەكان، ئەوە وەكو ماڵی خۆیانە و لەوێ كامێرای نهێنی دانەنراوە"، دەشڵێت "ئێمە هەموو هەوڵێكمان بۆ ئەوەیە كە ئەو ئافرەتانەی لەو ماوەیەی لای ئێمەنە، لەهەموو رووێكەوە سوودمەندبن و ئاگایان لەوە نەمێنێت كە زیندانیكراون، بۆیە بەردەوام خولی كۆمپیوتەر و دوورمان و وەرزشیان بۆ دەكەینەوە"، بەڵام وەك ئەو بەرپرسەی هۆبەی ئافرەتان دەڵێت "لەگەڵ ئەو هەموو جددییەتەی ئێمە، بەڵام ئافرەتەكانی چاكسازی هەر شلوخاون و كاتێك كە لێرەش دەڕۆن هەر تەمبەڵن و حەز بەجموجۆڵ ناكەن".
لەبارەی ئەوەش كە ئایا ئافرەتانی حوكمدراو، وەكو چاكسازی پیاوانی دهۆك، بۆیان هەیە لەناو بینایەی چاكسازی خەلوەی شەرعی لەگەڵ پیاوەكانیان ئەنجام بدەن؟ فریال محەمەد سدیق، بەرپرسی هۆبەی ئافرەتان لەچاكسازی ئافرەتان و منداڵانی دهۆك، گوتی "تاوەكو ئێستا هیچ بڕیارێكی لەو شێوەیە بۆ ئێمە نەهاتووە، كە ژنان لێرە خەلوەی شەرعی بكەن، بەڵام ئەو ئافرەتانەی كە سێ بەشی حوكمەكەیان تەواو كردووە، لەبەرامبەر رەهەنكردنی گوژمەیەك پارە، بۆیان هەیە هەرسێ مانگ جارێك، هەفتەیەك بچنەوە ماڵەوە".
ئیسماعیل ئیبراهیم ئەمین، بەڕێوەبەری چاكسازی ژنان و منداڵان لەدهۆك، لەبارەی سەرەتای هاتنی زیندانیانی ژن و منداڵ بۆ چاكسازییەكە، هێما بەوە دەكات كە هەر زیندانییەك دێتە چاكسازییەكە، یەكەمین كاریان 3 دۆسییەی تەندروستی و كۆمەڵایەتی و یاسایی بۆ دەكەنەوەو هەموو زانیارییەكانی لەسەر تۆمار دەكەن. سەبارەت بەوەش بۆچی منداڵی كوڕ لەچاكسازی هەیە و كچ نییە، گوتی "لەكۆمەڵگای ئێمە كاتێك كچ تاوان دەكات زیاتر لەرێگای عەشایەرییەوە كێشەكە كۆتایی پێدەهێنرێت و لێناگەڕێن گرفتەكە بگاتە دادگا".