سڤیل: میهرەبان محمود
بەپێی ئەو ئامارەی لەبەڕێوەبەرایەتی ئاسایشی راپەرین بە (سڤیل) دراوە، بەبەراورد لەگەڵ ساڵانی رابردوو، لەساڵی 2011 رووداوی هاتوچۆ و پێوەدانی دووپشك و مار زیادی كردووە، 74 حاڵەتی مردن بەهاتوچۆ و 4 كەسیش بەپێوەدانی دووپشك و مار مردوون.
بەپێی ئامارەكانی بەڕێوبەرایەتی ئاسایشی راپەرین، لەساڵی 2011 دا، كە لەسەرجەم بنكەكانیان پێكهاتووە، (662) حاڵەتی مردن و (3) حاڵەتی حەبخواردن و (74) حاڵەتی مردن بەهۆی رووداوی هاتوچۆوە روویانداوە، هاوكات (4) كەس بەهۆی تەقە و (12) كەس بەهۆی سووتان و (4) كەسیش بەهۆی پێوەدانی مار و دووپشك مردوون.
هەر بەپێی ئەو ئامارەی بەڕێوەبەرایەتی ئاسایشی راپەرین، لەساڵی رابردوودا (448) رووداوی ئۆتۆمبێل روویداوە و (385) كەس بەهۆی پێوەدانی مار و دووپشك ژەهراوی بوونە و (247) حاڵەتی سووتانیش هەبووە و (36) كەسیش بەهۆی چەكەوە برینداربوونە. لەئامارەكە ئەوەش خراوەتەڕوو، كە لەساڵی رابردوو (185) حاڵەتی شەڕكردن هەبووە و (63) حاڵەتی دزیكردن و (12) رووداوی ماڵ سووتاندنیش هەبووە، لەگەڵ (1015) حاڵەتی بریندار بوون و بەربوونەوەی ئاسایی و (5) حاڵەتی خۆكوشتن و (139) حاڵەتی شكان و (320) حاڵەت بەهۆی رووداوی هاتووچۆوە و (150) حاڵەتی ئاگركەوتنەوە، لەگەڵ (60) كەس كە كارەبا گرتوونی و (19) كەسیش خۆیان سوتاندووە و (3) حاڵەتی تەقینەوەش روویانداوە.
نەقیب محەمەد، بەرپرسی بەشی راگەیاندنی بەڕێوبەرایەتی ئاسایشی راپەرین، لەلێدوانێكی بۆ (سڤیل) ئەوەی ئاشكراكرد، كە بەبەراورد لەگەڵ ساڵانی پێشوو، حاڵەتی رووداوی هاتوچۆ و پێوەدانی مار و دووپشك لەساڵی 2011 زیادی كردووە. ئەو بەرپرسەی راگەیاندنی ئاسایشی راپەرین سەبارەت بەزیادبوونی حاڵەتی پێوەدانی مار و دووپشك وتیشی "ئەو حاڵەتە لایەنی تەندروستی لێی بەرپرسیارە، چونكە ساڵانی پێشوو بەهۆی رژاندنی دەرمان و پێدانی موادی سپی بەخەڵكەكە، لەرێگای لیژنەیەكەوە كە چووەتە گوند و ناحیەكان، كاریگەری زۆری هەبووە لەسەر كەمبوونی ئەم رووداوانە".
جێگای ئاماژە پێكردنە بەپێی هەمان ئاماری ئاسایشی رانیە، لەساڵی 2011 توانراوە دەست بگیرێت بەسەر زیاتر لەسێ كیلۆ ماددەی هۆشبەر و (19) حەبی جۆراوجۆری هۆشبەر.