سڤیل: سەنگەر عەبدولرەحمان

سێ ساڵ لەمەوبەر زاهیری كەریمەڕەش بیری لەڕێگایەك دەكردەوە، كە لەوێوە هەم خێرێك بكات بۆ ئەو دونیای باش بێت و هەم چاكەیەك لەگەڵ خەڵكی سلێمانی بكات، ئەو جیاواز لەو ڕێگا دووبارەو تەقلیدیانەی لەكۆمەڵگای ئیسلامیدا ئەنجام دەدرێت بۆ كارێكی خەیری، كارێكی هەڵبژارد كە زەحمەتە پێش ئەو كەس لەكوردستاندا كردبێتی، ئەویش تەرخانكردنی ئۆتۆبیلێكی گرانبەهایە بۆ گواستنەوەی تەرمی ئەو كەسانەی كۆچی دوایی دەكەن، بۆ گۆڕستان.
زاهیر بۆچوونی وایە ئەو كەسەی كۆچی دوایی دەكات و دەبێتە میوانی خودا، پێویستە لەهەموو ڕۆژەكانی تر جوانتر و بەڕێوڕەسمێكی شایستە بەڕێبكرێت، گواستنەوەی مرۆڤ بۆ گۆڕستان لەپشتی پیكابێكەوە، وەك گواستنەوەی كەلوپەل و خۆراك دەكات، بۆیە بیری لەڕێگایەكی باشتر كردەوە بۆ ئەو كارە، "بڕیارمدا ئۆتۆمبیلێكی مۆدێل تازە و جوان و گرانبەها تەرخان بكەم، بۆ ئەو كارەو شەو و ڕۆژ بێ بەرامبەر لەخزمەتی خەڵكی سلێمانیدا بێت".
زاهیری كەریمەڕەش بازرگانێكی شاری سلێمانیە، ساڵی 1953 لەسلێمانی لەدایك بووە، دوای ئەوەی قۆناغی ناوەندی و دواناوەندی لە سلێمانی تەواو دەكات، ساڵی 1974 كۆلیژی پۆلیسی عێراقی تەواو دەكات، لە ساڵی 1982 شەوە بەكاری بازرگانیەوە خەریكە.
ئەو گوتی "كاتێك مردویەك بەپیكاب دەبرێتە گۆڕستان دیارەو هەموو خەڵك دەیبینێت، بینینی دیمەنی مردوو بۆ هەر یەكێك لەئێمە كاریگەری دەروونیمان لەسەر جێدەهێڵێت، كاتێك بەیانیەكی زوو كە قوتابیەكی پۆلی یەكی سەرەتایی دەچێتە قوتابخانە و تەرمێك بەتەنیشتیدا دەڕوات، ڕەنگە هەموو وانەكانی ئەو ڕۆژە بیر لەو تەرمە بكاتەوە، شاردنەوەی ئەم دیمەنەو جوانكردنی، كارێكە هەم ڕێوڕسمەكە جوانتر دەكات، هەم خەڵك چیتر ئەو دیمەنە خەماوی و حەزینانە نابینێت".
ئەو ئۆتۆمبێلەی بازرگانەكەی سلێمانی بۆ ئەو كارەی تەرخانكردوە، جۆری پاصی هۆندای مۆدێل 2009یە، كە بەوتەی خۆی بیستوپێنج هەزار دۆلار (دوو دەفتەر و نیو)ی پێداوە، ناویشی لێناوە (كەشتی نوح)، لەبارەی هەڵبژاردنی ناوەكەیەوە گوتی "كەشتی نوح لە دوو لایەنەوە لای من خۆشەویستە، یەكەم ئەوەی كە بووە هۆی رزگاركردنی مرۆڤایەتی، هەمووشمان دەزانین كەشتی نوح دوای ئەوەی لافاوەكە كۆتایی دێت و ئەوانەی لەناویدان ڕزگاریان دەبێت، لەشاخەكانی كوردستان دەگیرسێتەوە، دووەم بەهۆی خۆشەویستیم بۆ حوجرە جوانەكەی مامۆستا نەجمەدینی مەلا كە ناوی نابوو كەشتی نوح، ئەو بلیمەتەی كە سەركردایەتی نەهێشتنی نەخوێندەواری كردووە لەسلێمانی، لەبەر ئەو دوو هۆكارە پێم خۆش بوو ناوی كەشتی نوح لەسلێمانی بەزیندوویی بهێڵمەوە".
وەك خۆی دەڵێت (كەشتی نوح) هاوشێوەی كەشتیەكەی حەزرەتی نوح هەمووان دەگرێتە خۆی، بە موسڵمان و مەسیحیەوە، بە كورد و عەرەبەوە، بە بیروبۆچونە سیاسیە جیاوازەكانەوە، هەر كەس كۆچی دوایی بكات (كەشتی نوح) دەیباتە گۆڕستان.
زاهیری كەریمەڕەش بڕوای وایە خەڵكی سلێمانی پێزانینێكی باشیان بۆ كارەكەی هەیە، بۆ ئەوەش چەند نمونەیەك باس دەكات كە چۆن خەڵك لەڕێگای كاردانەوەكیانیانەوە پێزانینی خۆیان بۆ كارەكە دەردەبڕن، گوتی "جاری واهەیە دەیبەینە غەسل بۆ شۆردن پارەمان لێ وەرناگرن، دەڵێن با ئێمەش بەشداربین لەگەڵتان، یان وەستای پەنچەرچی و ڕۆنگۆڕ پارە وەرناگرێت و دەڵێت رۆژێك دێت ئێمەش بەم ئۆتۆمبێلە دەبەن بۆ گۆڕستان، هەموان بە ئۆتۆمبێلی خۆیانی دەزانن و پێیانوایە لەكاتێكی زۆر نزیكدا سواری دەبێت".
ژمارەی ئەو مردوانەی لەماوەی نزیكەی سێ ساڵ كاركردنیدا كەشتی نوح بردونیەتە گۆڕستان، نزیك بۆتەوە لە 3 هەزار كەس.
لەبەر ئەوەی ڕۆژ لەدوای ڕۆژ داواكاری خەڵك لەسەر كەشتی نوح زۆر دەبێت، بازرگانەكەی سلێمانی بڕیاری داوە ئۆتۆمبیلێكی تری هاوشێوەو مۆدێل 2012 بۆ هەمان كار تەرخان بكات، ئەمە جگە لەوەی لەبەرنامەیدایە، ئۆتۆمبێلێك تەرخان بكات بۆ ئەو كەسانەی خاوەن پێداویستی تایبەتن، بۆ ئەوەش گوتی "لەداهاتویەكی نزیكدا ئۆتۆمبیلێكی تایبەت دەهێنم بۆ ئەو كەسانەی كەم ئەندامن، ئەو ئۆتۆمبێلە جەگێكی پێوەیەو دادەبەزێتە خوارەوە، كەمئەندامەكە بە كورسیەكەیەوە دەچێتە سەر جەگەكە و بەرزدەبێتەوە بۆ ناو ئۆتۆمبێلەكە، زۆر لەكەمئەندامانی ئێمە لەماڵەوە كەوتون و كارێكیان نیە، ئەوان تەنها قاچیان نیە، بەڵام بەهۆی نەبونی قاچیانەوە نەیانتوانیوە سود لەو ئەندامانەی تری جەستەیان وەربگرن كە كار دەكەن، ئەو ئەركە دەگرینە ئەستۆ بۆ ئەوەی ئەوانیش بگێڕینەوە ناو كۆمەڵگا، بۆ هەر شوێنێك بیانەوێت دەیانگوازینەوە".
كەشتی نوح دوو شوفێر كاری لەسەر دەكەن، ژمارە تەلەفۆنی هەردوو شۆفێرەكەش لەسەر ئۆتۆمبێلەكە هەیە، وەك زاهیر دەڵێت هەركات و ساتێك، شەوبێت یان ڕۆژ، خاوەن پرسە داوا بكات، شۆفێرەكانمان مردووەكەیان دەبەنە گۆڕستان.