سڤیل: تەرزە بەختیار
(فادیمە بەدەف یادت دەكەینەوە)، پارچە میوزیكێك بوو بەئامێری دەف پێشكەشكرا، لەلایەن چەند خوێندكارێكی هونەرەجوانەكانی هەولێر، لەبەشێكی دیكەی كۆنفراسەكە، ژنە ئامادەبووەكان لەكارێكی هونەریدا كە لەلایەن (مامۆستا نامۆ) ئامادەكرا بوو، تاڵێك لەقژی خۆیانیان بڕی و لكاندیان بەمیزەڵدانێكەوەو تێیدا پەیامی خۆیان دەربڕی و (هێشوو كەریم) قوتابی زانكۆ ئەویش نووسی (فادیمە لەبیر مەكەن، چیتر بەبیانووی شەرەف مەمانكوژن)، پاشتر میزڵدانەكەیان بەرەو ئاسمان هەڵدا.
كاتژمێر 2ـی پاش نیوەڕۆی رۆژی 22ـی 1/2012 لەزانكۆی جیهان لەشاری هەولێر، كۆنفراسێكی یادەوەری بەناوی (رۆژێك بۆ فادیمە) لەچوارچێوەی میهرەجانەكەی وڵاتی سوێد، بەهاوكاری رێكخراوی (تواناسازی لاوان، لاعنف، میهرەبان، ئەنجومەنی خانمان) و بەئامادەبوونی (كوردۆ عومەر) بەرێوەبەری گشتی بەدواداچوونی توندوتیژی دژ بەژنان و (ئەمەل جەلال) ئەندامی ئەنجومەنی كاروباری خانمان و (هاژە سلێمان) ئەندامی پەرلەمانی كوردستان و ژمارەیەك لەچالاكوانانی كۆمەڵی مەدەنی و ژنان، سازكرا.
لەسەرەتای كۆنفرانسەكەدا، (هاژە سلێمان) بڕیاردەری لێژنەی بەرگریكردن لەپەرلەمانی كوردستان، گوتی "لەم خولەی پەرلەمان، بەهۆی زیادبوونی رێژەی ژن كە لە %36 تێپەڕی كردووەو بەهۆی فشاری رێكخراوەكانی ژنان و كۆمەڵی مەدەنی لەپەرلەمان، چەند یاسایەكی گرنگ دەركراوە، كە گرنگترینیان یاسای بەرەنگاربوونەوەی توندوتیژی دژ بەخێزانە، كە ئێستا لەبواری جێبەجێكردنە". (ئەمەل جەلال) لەئەنجومەنی خانمان، ئەویش لەدوای قسەكانی (هاژە سلێمان) گوتی "حكومەتی هەرێمی كوردستان بەگرنگەوە دەڕوانێتە پرسی ژن و بەبەردەوام بەرنامە و پلانی هەبووە بۆ روبەروبوونەوەی توندوتیژی". هەروەها كوردۆ عومەر، بەرێوەبەری گشتی بەدواداچوونی توندوتیژی دژ بەژنان، ئاماژەی بەوەكرد كە "لەكوردستان لەژێر كاریگەری ئەو یاسایانەی كە دەرچوونە، كوشتنی ژن بەبیانووی شەرەف كەمی كردووە".
لەدواین راپۆرتی گشتگیری نەتەوە یەكگرتووەكان كە هەر چوار ساڵ جارێك لەلایەن ئەنجومەنی ئاسایشی سەر بەنەتەوە یەكگرتووەكان ساز دەكرێت و بارودۆخی مافی مرۆڤی سەرجەم وڵاتە ئەندامەكانی تێدا پێشكەش دەكرێت، لەراپۆرتی گشتی عێراق، كە بارودۆخی كوردستانیشی تێدا خرایەروو، لەمانگی شوباتی 2010 بەشێكی زۆر لەو راپۆرتەی كە ئاراستەی دەزگاكانی مافی مرۆڤ كرابوون، خاڵی نەرێنی زۆری تێدابوو سەبارەت بەكوردستان (كوشتنی ژن بەبیانوی شەرەف- خەتەنە).
ژنە پارێزەرێك باس لەوە دەكات كە لەزۆربەی كۆنفراس و سیمنارەكان كە لەدەرەوەی كوردستان ساز دەكرێت، دەڵێ "ئێمە كە وەك نوێنەری كوردستان ئامادەی دەبین، كاتێك باسی ئازادی و دیموكراسی دەكەین، چاودێرانی مافی مرۆڤ ئەو دیموكراسییە دەخەنە ژێر پرسیارەوە"، (ئاڤان تەحسین)ی پارێزەر، دەشڵێت "لەچەندین كۆنفراس پێمگوتراوە، ئێوە لەكوردستان یاسای جوان و سەردەمیانەتان هەیە و حەزتان لەدیموكراسی و سەربەخۆیی هەیە، بەڵام هێشتا ژن بەبیانوی شەرەف دەكوژن".
فادیمە شاهینداڵ، كچە كوردی باكووری كوردستان، لەوڵاتی سوید لە 21/1/2001 لەلایەن باوكییەوە بەناوی ناموسپەرستی كوژرا و كوشتنی ئەو كچە كوردەش لەمیدیا و كۆمەڵگای سویدی، كاریگەرییەكی نەرێنی بەسەر تێڕوانینی وڵاتانی دونیا بەرامبەر بەكوردستان دروستكرد. بەر لەفادیمەش، هەریەك لە(سارا، پێلا ئەتروشی) كە دوو كچە كوردی دیكە بوون و لەسوێد دەژیان، ئەوانیش لەلایەن كەسوكارییانەوە بەبیانووی شەرەف كوژرا بوون، بەتایبەت كوشتنی سارا، كە تەواوی وڵاتی سوێدی هەژاند.