سڤیل: كاوە شێخانی- ناهیدە ئەحمەد

بەشێك لەبۆچوونەكان، لەكاتی گەڵاڵەكردنی فیكرەی راپۆرتەكە لەلایان، ئاماژەیان بەوەدەدا كە ئەوەی ئێمە دەمانەوێت كاری لەسەر بكەین تەنها پەیوەست نییە بەژن و پیاوی كورد، بەڵام بۆچوونی دیكەش لەبەرامبەر ئەوەدا هەبوو، كە ئەو دیاردەیەیی سەرجێی لەنێوان هاوسەران، گرفتی سەرەكی پیاوی كوردە و هیچ كات ئافرەت لەو رووەوە دەسپێشخەری ناكات!. بۆیە ئەوەی كە ئێمە دەمانویست بیوروژێنین، پرسیار كردن بوو لەبارەی ئەوەی كە بۆچی هەر دەبێت پیاو داوای سێكس لەژنەكەی بكات؟ ئایا ئافرەت لەوەها داوایەك شەرم دەیگرێت یاخود بونیادی دەروونی و فسیۆلۆجییەكەی رێگەی پێنادات وەها داوایەك لەمێردەكەی بكات؟.
كوردۆ نەجمەدین، كە ماوەی 5 ساڵە ژیانی هاوسەری بەیەكەوە ناوە و تەمەنی 30 ساڵە، بۆچوونی وایە كە ئەمە گرفتی هەموو ژن و مێردێكی كورد نییە و وەكو ئەو گوتی "لەو رووەوە من بەپێچەوانەی ئەوەی ئێوە دەیڵێن، زۆر رازیم لەژنەكەی خۆم، چونكە وەك چۆن من داوای سێكسی لێدەكەم، بەهەمان شێوە ئەویش لەو كاتانەی كە خۆی حەز بەجووتبوون دەكات، داوای سێكسم لێدەكات".
نەهلە عەلی، كە ماوەی دوو ساڵە چۆتە ژیانی هاوسەری، ئەویش سەبارەت بەوەڵامی پرسیارەكەی ئێمە گوتی "زۆر لام ئاساییە ئەگەر بۆ كاری جوتبوون خۆم داوا لەپیاوەكەم بكەم، چونكە بەمافی خۆمی دەزانم و منیش وەكو ئەو، نەفس و ئارەزووم هەیە"، ئەو ژنە گوتیشی "ئەگەر ژنەكە خۆی داوای بكات، پیاوەكەی زیاتر چێژ وەردەگرێت، بۆیە هەر جارێك كە خۆم داوای جوتبوونم كردبێت، پیاوەكەم زۆری لەدڵ خۆشبووە و قەت دڵی نەشكاندووم".
سەمیرە، ناوی خوازراوی ژنێكی تەمەن 40 ساڵییە و ئەویش سەرەتا ئاماژەی بەوەكرد كە رەنگە هۆكاری ئەوەی ژنان دەسپێشخەر نەبن لەداوایەكی لەوجۆرە بۆ سێكسیبوونی زیاتری پیاوان بگەڕێتەوە، سەمیرە دەڵێت "پیاو لەسێكسكردن تێرنابن، گەر نان و ئاویان نەبێت، بەڵام سێكسیان هەبێت، ئەوان رازینە". گوتیشی "ئەگەر پیاوەكەم ئارەزووی سێكسی هەبێت، ئەوە خۆی داوای دەكات، ئەگەرنا قەت نەبووە كە من داوای لێبكەم، هەتا ئەگەر زۆریشم حەز لێ بووبێت".
بەبۆچوونی (یوسف عوسمان حەمەد) پسپۆڕی بواری دەرونناسی، كەلتووری كوردەواری وایكردووە كە هەمیشە پیاوان باڵادەستی بۆخۆیان بگەڕێننەوە و ئەمەش وایكردووە كە ئافرەت شەرم بكات داوایەكی لەوجۆرە لەپیاوەكەی بكات، كە ئەگەرچی شتەكە حەڵالێ خۆشیەتی. ئەو دەڵێت "زۆرجاری ئاواش هەبووە كە ژن داوای سێكس لەپیاوەكەی بكات، بەڵام ئەو داوایەی ئافرەتەكە بۆتە هۆی ئەوەی كە پیاوەكە بەنەزرەیەكی خراپ سەیری ژنەكەی بكات و بیخاتە چوارچێوەی گومانەوە، لەبەر ئەوە ئافرەت بەناچاری بێدەنگی هەڵبژاردووە، بۆ ئەوەی دووربێت لەتانەو تەشەری پیاوەكەی".
مامۆستای ئاینی (سەید ئەحمەد عەبدولوەهاب پێنجوینی) ئەویش بۆچوونی وابوو كە هۆكاری دەسپێشخەری نەكردنی ئافرەت بۆ سێكسكردن لەگەڵ پیاوەكەی، دەگەڕێتەوە بۆ چەند هۆكارێك، وەكو ئەو گوتی "پیاو تاقەتی جنسی زیاترە لەئافرەت، هەروەها شارەزاتر و چاوكراوەترە، بۆیە نەترسە و داوای دەكات، بەڵام ئافرەت هەروەكو لەزۆر شتی دیكە كە مافی خۆیەتی و بێ ماف كراوە، لەوەشیان ئەو مافەی لێسەنراوەتەوە و دواكەوتووە، لەبەرئەوە ئافرەت شەرم دەكات لەداوایەكی لەوجۆرە هەتا ئەگەر حەزیشی لێی بێت، ئەگینا لەئاینی ئیسلام ئەوە مافێكی هاوبەشە لەنێوان ژن و پیاودا". ئەو مامۆستا ئاینییە گوتیشی "هەركاتێك ئاستی رۆشنبیری ئافرەت وەكو پێویستی لێهات، ئەو دەمە ئاساییە گەر ئافرەتیش داوای سێكس لەپیاوەكەی بكات، بەڵام تاوەكو داوایەكی لەوجۆرە بخرێتە چوارچێوەی شەرم و ئەو بۆچوونە راستنەكرێتەوە، ئافرەت ناتوانێت ئەو داوایە بكات".