سڤیل: تایبەت

دوای ئەوەی یانەی رۆشنبیری و هونەری سەر بەوەزارەتی رۆشنبیری و لاوانی حكومەتی هەرێم لەزاخۆ، شەوانە دەكرێتە شوێنی سەماكارانی ژنان و كچانی عەرەب و خەڵكی دەوروبەری ئەو شوێنەش ناڕەزایی دەردەبڕن، بەفەرمانی وەزیری رۆشنبیری و لاوان یانەكە دادەخرێت. هاوكات هەر لەشارۆچكەی زاخۆ 3 پۆلیس لەگەڵ 3 ژنە لەشفرۆش دەسگیر دەكرێن و رەوانەی دادگایان دەكەن.
بەر لەدوو ساڵ، هەر لەناو یانەی رۆشنبیری و هونەری لەزاخۆ، بەشێكی تایبەت بۆ خواردنەوە كرایەوە و پیاوێك كرایە سەرپەرشتیاری ئەو بەشە تایبەتە، دواتر ئەویش بەشەكە رادەستی پیاوێكی دیكە دەكات و بارودۆخەكە دەگاتە ئەوەی كە ئەو بەشە بكرێتە شوێنی سەماكردن و ژمارەیەكی زۆری كچان و ژنانی عەرەب لەبەغدا بهێنرێنە یانەكە.
شەوانە لەدوای كاتژمێر 9 تا بەرەبەیان (گەنجان و نووسەران) لەچواردەوری ژنە سەماكارەكان كۆدەبوونەوە، كە دواجار ئەمەش دەبێتە هۆی بێزاری خەڵكی ناوچەكە و چەندین جاریش شەڕ و ئاژاوەی گەورە لەوناوە دروستدەبێت و گلەیی و گازاندەی خەڵكەكە ئاراستەی لایەنی پەیوەندیدار دەكرێت، تەنانەت خودی بەڕێوەبەری رۆشنبیری و هونەری لەزاخۆ، ناڕازیبوونی خۆی لەسەر رەوشەكە رادەگەیەنێت و سكالا ئاراستەی سەرووی خۆی دەكات.
كوڕە گەنجێكی هاموشۆكەری یانە شەوانەیەكە كە نەیویست ئاماژە بەناوەكەی بكرێت، هەموو شەوێك لەو یانەیە لەدوای كاتژمێر 9ی شەو، بەدیار كچە سەماكارەكانەوە دانیشتووە و بۆ (سڤیل) گوتی "هەموو شەوێك چوار تا پێنج كچی جوان دەهاتن و بەجلی سەماكردن كە سێ بەشی لەشیان رووتبوو، سەمایان دەكرد و گەنجەكانیش پارەیان دەخستە نێوان مەمكەكانیان".
فەرمان شوكر، بەڕێوەبەری رۆشنبیری و هونەری لەزاخۆ، سەرباری پشتڕاستكردنەوەی مەسەلەكە، بەڵام ئەو ئاماژەی بۆ ئەوەكرد كە دەرگای یانە شەوانەیەكە و دەرگای كۆشكی هونەری لەیەكتری دوور بووینە و دواتریش دەوامی ئەوان كاتی ئێواران بووە و دەوامی یانەكەش لەدوای كاتژمێر 9ی ئێوارە دەستیپێكردووە. (فەرمان شوكر) ئەوەشی ئاشكراكرد كە دوای ئەوەی وەزیری رۆشنبیری و لاوان، دكتۆر (هادی مەحمود) بەمەسەلەكە دەزانێت، راستەوخۆ بڕیاری داخستنی یانەكەی داو دەسبەجێش بڕیارەكە جێبەجێكرا، دەڵێت "ئێستا كەلوپەلی یانەكەیان بردۆتە دەرەوە و شوێنەكە دەكرێتە جێگای خولی راهێنان و سازدانی وۆرك شۆپ".
هەفتەی رابردوو، هەر لەقەزای زاخۆ، سێ پۆلیس كە دوو لەوان سەر بەبەڕێوەبەرایەتی بەدواداچوونی توندوتیژی دژ بەئافرەتان بوون و یەكێكیش سەر بەبنكەی لاوان بوو، دوای ئەوەی سێ ژنە لەشفرۆش بەمەبەستی ئەنجامدانی كاری سێكسی دەبەنە بنكەی لاوانی زاخۆ و بەڕێوەبەرایەتی پۆلیسی زاخۆ بەمەسەلەكە دەزانێت، پۆلیسەكان و ژنە لەشفرۆشەكان دەسگیر دەكات.
ئەفسەرێكی مولازم لەپۆلیسی زاخۆ، كە نەیویست ئاماژە بەناوەكەی بكرێت بۆ (سڤیل) گوتی "هەفتەی رابردوو لەكاتی شەودا، پۆلیسێكی بنكەی لاوان سێ ژنە لەشفرۆشەكە دەباتە بنكەكە و خۆی و پۆلیسێكی دیكە لەگەڵ ژنەكان دەچنە ژوورەوە و پۆلیسێكی دیكەش پاسەوانیان بۆ دەكات، بەڵام بەر لەوەی كاری سێكسی ئەنجام بدەن، پۆلیسی زاخۆ گەیشتە سەریان و پاش دەسبەسەركردنیان، رەوانەی دادگایان كردن".
لەوبارەوە بەڕێوەبەرایەتی پۆلیسی زاخۆ ئامادە نەبوو هیچ لێدوانێك بدات.