سڤیل: هەولێر

بەپێی ئاماری ئەنجوومەنی دادوەری كوردستان، لە 6 مانگی رابردووی ئەمساڵدا، واتا لە 1/1/2010 تاوەكو 31/6/2010 لەسەرجەم دادگاكانی باری كەسی لەهەولێر و دەوروبەری 3636 داوا هەبووە كە تاوەكو ئێستا 2770 داوا یەكلاكراوەتەوە، لەسلێمانیش لەكۆی 4629 داوا تاكو ئێستا 2667 داوا یەكلاكراوەتەوە. هاوكات لەپارێزگای دهۆك و دەوروبەریش لەكۆی 964 داوا 757ی یەكلابۆتەوە.
هەر لەو ئامارەی ئەنجوومەنی دادوەری هاتووە، كە لە 6 مانگی رابردوو، لەهەولێر و دەوروبەری 7609 حالەتی مارەبڕین هەبووە و لەسلێمانی 6518 و لەدهۆك 4527 و لەگەرمیانیش 2779 حالەتی مارەبڕین هەبووە. سەبارەت بەرێپێدان بەهێنانی ژنی دووەمیش، هەولێر 16 حالەت و سلێمانی 15 و دهۆك 13 و گەرمیانیش 91 حالەتی ژنهێنانی دووەمی هەبووە لە 6 مانگی رابردوودا. هەر لەو ئامارەشدا لەبارەی "پەسەندكردنی مارەبڕینی دەرەكی" هاتووە كە هەولێر 853 حالەت و سلێمانی 409 و دهۆك 225 و گەرمیانیش 56 حالەتی تێدا هەبووە.
بەپێی زانیاریەكانی ناو ئەو ئامارەی ئەنجوومەنی دادوەری، 857 حالەتی تەڵاقدان لەهەولێر هەبووە و لەسلێمانیش 1028 حالەت و دهۆكیش 293 حالەت، لەكاتێكدا كە هیچ ئاماژەیەك بۆ ناوچەی گەرمیان نەكراوە كە لە 6 مانگی رابردووی ئەمساڵدا رێژەی تەڵاقدان تێیدا بەچ شێوەیەك بووە.
جێگەی ئاماژەپێكردنە، كە ئەوەی لەئاشكراكردنی ئاماری دادگاكانی باری كەسی لەهەرێم لەماوەی 6 مانگی رابردوو، شوێنی سەرنج بێت، بەپێی ئامارەكە لەزۆربەی شار و شارۆچكەكانی كوردستان، رێژەی داوای تەفریق (جیابوونەوە) لەلای ئافرەتان بەشێوەیەكی بەرچاو زیادی كردووە، بۆ نموونە لەشاری سلێمانی و دەوروبەری لە 6 مانگی رابردوو، لەبەرامبەر 1028 حالەتی تەڵاقدان كە لەلایەن پیاوانەوە تۆمار كراوە، 1213 حالەتی تەفریقیش هەبووە لەلایەن ژنانەوە.