دوای ئەوەی هاوكارییەكی زۆر دەكرێن ئاسایش دەسگیریان دەكات

سڤیل: محەمەد گۆران

پێنج ژن بەمەبەستی سواڵكردن لەمانگی رەمەزاندا، لەشارۆچكەی حاجیاواوە دێنە كۆمەڵگای شاوێس لەنزیك شاری هەولێر، رۆژێك بەر لەرۆژووگرتنی خەڵكیش، لەگەڵ چەند جلێكی شڕ، ماڵەكەیان دەگوازنەوە ناحیەی دارەتوو، هەر لەرێگای ئەو هاوسێیانەش كە بەهۆی هەژارییەكەیان، سەرنجیان بەلای خۆیان رادەكێشن، بەرنامەیەكی خێرخوازی یەكێ لەتەلەفزیۆنە لۆكالییەكانی ناوشاری هەولێر رازی دەكەن بەوەی رێكلامیان بۆ بكەن لەو مانگەدا، بەڵام لەدوای كۆكردنەوەی پارەیەكی زۆر، لەناوەڕاستی رەمەزان و لەنیوەشەودا هەوڵی راكردن دەدەن و دواتر لەلایەن ئاسایشی دارەتووەوە دەسگیر دەكرێن.
ئەیوب ئەحمەد خەسرۆ، كە ماڵەكەی لەدارەتووە و ماوەی ئەم پانزە رۆژە، پێنج ژنەكە خانووەكەی تەنیشت خانووی ئەویان بەكرێ گرتبوو، دەڵێت "رۆژێك بەر لەرەمەزان، منداڵەكان گوتیان ماڵێكی فەقیر هاتوونەتە ماڵی پورە تاوس و هیچیان نییە و پیكابێك بەخێر ئەوانی هێناوە. هیچ شتێكیان نەبوو، هەتا سۆندەیان نەبوو كە ئاوی پێ لەبۆڕی رابكێشن. ئەوەبوو مام عوسمان كە هاوسێمانە بەخزمێكی گوت، چوو لەهەولێر بەفرگرێكی بۆ كڕین، كاك نازم كە ئەویش ماڵی لەو كۆڵانەیە، لەكۆیە و سلێمانی زەكاتی بۆ دەهێنان، تا لەتەلەفزیۆن ریكلامیان بۆ كراو گەیشتە ئەو رادەیەی كە مۆنیكا دەهاتە بەردەرگا و لەو ماڵەی دەپرسی كە چۆن یارمەتیەكەیان بەدەست بگەیەنن".
ئەو هاوسێیەیان كە سەرەتا زۆر سكی بەو ماڵە سووتابوو، سەبارەت بەو شەوەش كە ویستیان رابكەن و شوێنەكە جێبهێڵن، دەڵێت "ئێوارەیەك دوای فتاربوو، منداڵێكیان هاتوو عەلاگەیەك مریشكی هێنا، گوتی ئەوەمان بۆ لەناو سەلاجە دابنێن، منیش گوتم باشە و گۆشتەكەم لێوەرگرت. ئەوەبوو شەو، هەر ئەو منداڵە هات و گۆشتەكەی بردەوە. من دوای ئەوە، چووم خەوتم. شەو كاتژمێر یانزەونیو بوو، خزمێك تەلەفۆنی كرد و گوتی هەندێ دۆلارمان هەیە، بۆمان ناگۆڕیتەوە؟ چونكە خۆم ئیشی دۆلار دەكەم، ئەوەبوو هاتمە بەردەرگا، بینیم وا دوو پیكاب ماڵەكە بار دەكات، منیش پێم سەیربوو، كە ئەو ماڵە فەقیرە بەو نیوەشەوە دەبێت بۆ كوێ بچن؟ ئەوەبوو كاك نازم كە خەزووری خاوەنی خانووەكەیە، خۆی لەو كاتە هاتە دەرەوە، منیش گوتم باشبوو هاتی؟ ئەویش گوتی وەڵا هەندێك نانم بۆ ئەو ماڵە هێناوە، گوتم ئەوان باریان كرد؟! گوتی قەت شتی ئاوا نابێت. گوتم ئەوە بووە و رۆیشتیشن. ئەوەبوو هاوسێكانی دیكەش هاتن و ئاسایشی دارەتوویان ئاگادار كردەوە".
لەدوای هاتنی پیاوانی ئاسایش بۆ ناو ماڵەكە، وەكو هاوسێكەیان ئاماژەی بۆ دەكات، ئەو شتومەكەی كە لەحەوشەكە جێیان هێشتووە، ئاسایش جەردی دەكات كە لە "بەفرگرێك و موبەریدەیەك و فەردەیەك ئارد و سندوقێكی شكاو" پێكهاتبوو، دەڵێت "هەندێك داوای كەلوپەلی خۆیان دەكردەوە، یەكێ لەئاسایشەكان گوتی، با بەیانی شتەكان ببەین و دوای هاتنی ئەفسەرەكە، شتەكان جەرد دەكەین و دواتر هەركەسە و كەلوپەلەكانی خۆی بباتەوە. ئەو گوتی هەمووتان بڕۆنەوە ژوورەوە و دواتر چارەسەری دەكەین. ئێمە لەو مشتومڕە بووین، ئەو پیكابەی كە ماڵەكەی گواستەوە، لەسەری كۆڵان سوڕایەوە و هاتبوو ئەو شتانەی كە ماوە ئەوانیش ببات، منیش گوتم ئەوەتا، تا ئاسایشەكان گوتیان كوا؟ ئەوان گوێیان لێبوو رایانكرد، ئیدی پیاوانی ئاسایش كەوتنە دوایان و لەنزیك گۆڕستانەكە گرتیانن".
وەكو ئەو پیاوە باسی لێوە دەكات، شۆفێری پیكابەكە سەرەتا خۆی بەكرێگرتەی ژنەكان دەناسێنێ و خۆی لێیان ناكات بەخاوەن، بەڵام دواتر لەئەنجامی لێكۆڵینەوەی ئاسایش دەردەكەوێت، كە خاوەنی پیكابەكە پیاوی یەكێ لەژنەكان بووە، دەڵێت "ئەوان پێنج ئافرەت بوون لەگەڵ دوو منداڵ، لەلای ئێمە ژنەكان دەیانوت، ئێمە هیچمان پیاومان نییە، ئەوەبوو كاتژمێر 2ی ئەو شەوە هەموویان لەلایەن ئاسایشی دارەتوو دەسگیركران".
بارزان رەشید حەمەد، ئامادەكار و پێشكەشكاری بەرنامەی خێرخوازی (فریا) لەتەلەفزیۆنی جیهان، كە لەبەرنامەكەی خۆی ریكلامی بۆ ئەو پێنج ژنە كردبوو، دواتر هەر خۆشی داوایەكی لەسەر تۆماركردن، دەڵێت "ئێمە لەناو خۆمان، پێشكەشكاری هەموو بەرنامە خێرخوازییەكان، لەتەلەفزیۆنی ئارۆ و نیگا و جیهان و لاو و نیولاین، زانیاری دەگۆڕینەوە، بەڵام جاری ئاواش دەبێت كە بەسەرمان تێپەڕ دەبێت، خێزانێك هیچ كێشەیەكی نییە و هەژارنین، ئێمە دەقۆزێتەوە و پارەیەكی زۆر بۆ خۆی كۆدەكاتەوە. وەكو ئەوەی كە لەكۆمەڵگای دارەتوو بەسەرمان تێپەڕی، پیرەژنێكی تەمەن 80 ساڵی لەگەڵ ئافرەتێك كە خاوەنی دوو منداڵبوو، گوایە هەتیون، هەروەها لەگەڵ گەنجێك كە هەر ناویشی گەنجۆ بوو، تەمەنی 20 ساڵبوو، كاتێك بەرنامەكەمان پێشكەشكرد و وەكو خانەوادەیەكی هەژار بەخەڵكمان ناساندن، راستەوخۆ لەدوای بەرنامەكە چەند پەیوەندیەكی تەلەفۆنیمان پێوەكرا و پێیانڕاگەیاندین كە ئەو ماڵە لەحاجیاوا دەژین و وەزعیشیان زۆرباشە".
ئامادەكاری بەرنامە خێرخوازییەكەی تەلەفزیۆنی جیهان، دەڵێت "باندێك ئێستا كە لە 30 تاوەكو 40 ماڵ پێكهاتوون، هەموویان لەمانگی رەمەزان هاتوونەتە ناوشاری هەولێر، بەو شێوەیە خەریكی خۆدەوڵەمەندكردنن، بۆیە دوای گەیشتنی ئەو هەموو پەیوەندییە تەلەفۆنییە، من رۆژێك بەر لەراكردنیان تەلەفۆنم بۆ گەنجۆ كرد و گوتم، بەیانی فۆڕمێكت پێپڕ دەكەمەوە، ئەگەر هاتوو یەك زانیاری هەڵەت دابێت، دەبێ ئەو پارەی كە وەرتانگرتووە هەمووی بۆ تەلەفزیۆن بگەڕێنیتەوە. ئەوەبوو لەدوای هەڵاتنیان، ئاگادار كراینەوە كە ئەوان لەئاسایشی دارەتوو دەسگیركراون".
بارزان رەشید، دەڵێت "لەئاسایشی بنەسڵاوە، تەلەفۆنم بۆ رائید عوسمان كرد و داوایەكم لەسەر ئەو ماڵە تۆماركرد، چونكە ئەوان ئیستیغلالی بەرنامەكەی منیان كردبوو، بەڵام دوای ئەوەی كە پارەكەیان هەمووی بۆ تەلەفزیۆنی جیهان گەڕاندەوە، كە بڕی 22 وەرەقەی دۆلار و 53 هەزار دیناری عێراقی بوو، من داواكەی خۆم لەبنكەی ئاسایشی بنەسڵاوە كێشایەوە".
ئەو پێنج ژنە بۆ ماوەی 3 شەو لەئاسایشی دارەتوو و بنەسڵاوە دەسگیر دەكرێن و دواتر دەگوازرێنەوە بۆ ئاسایش هەولێر، دوای پەیوەندیكردن بەهەریەك لەبنكەكانی پۆلیس لەدارەتوو و بنەسڵاوە، هەروەها بنكەی ئاسایشی دارەتوو و بنەسڵاوە، بەڵام هیچكام لەوان ئامادە نەبوون لێدوان لەوبارەیەوە بدەن، سەرچاوەیەك لەئاسایشی بنەسڵاوە كە نەیویست ناوەكەی ئاشكرابكرێت بە (سڤیل)ی راگەیاند كە تائێستا هەر پێنج ژنەكە لەئاسایشی هەولێر دەستبەسەرن.