"كێشەی سێكس و ئاین هۆكارەكەی راڤەكردن و لێكدانەوەی هەڵەیە"

سڤیل: مەریوان عومەر

خانمە نوسەری ئەڵمانی و بە رەچەڵەك تورك "سیران ئاتیس" لە كتێبێكی تازەیدا كە لە ئەڵمانیا بڵاوی كردۆتەوە، بانگەشەی شۆڕشێكی سێكسی لە ئیسلامدا دەكات، پێشی وایە ئەو شۆڕشە سێكسیە لە جیهانی ئیسلامیدا لەسەر ئاستی تاكەكەسەكان بەرپا بووە، بەڵام بە شێوازێكی پەنهان و شاراوەیە.
ئەو كتێبە جارێكی تر باس لە بابەتێك دەكات، كە مشتومڕی لە نێوان بیرمەندە ئیسلامی و عەلمانییەكان لە رۆژهەڵات و رۆژئاوادا لێكەوتۆتەوە، بە تایبەت كە كەسانێك هەن بانگەشەی ئازادی سێكسی دەكەن، لە بەرامبەریشدا بەشێكی تر پێیان وایە، دەبێ جیهانی ئیسلامی بە توندی بەرپەچی ئەو دیاردەیە بداتەوە، كە خەریكە لە هەندێ وڵاتی ئیسلامیدا ئاماژە و نیشانە سەرەتاییەكانی دەردەكەون.
"ئیسلام پێویستی بە شۆڕشێكی سێكسی هەیە"، ناونیشانی كتێبەكەی ئەو خانمە نوسەرەیە و تێیدا داوا لە ئافرەتە موسوڵمانەكان دەكات، كە هەوڵی سەربەخۆبوون بدەن، لە بڕیاردانیان سەبارەت بە ژیانی سێكسییان. پێشی وایە لە كاتی ئێستادا جیهانی ئیسلامی لە هەركاتێكی تر زیاتر پێویستی بە شۆڕشێكی سێكسی هەیە، تا پاشكۆبوونی سێكسیی ئافرەت بۆ پیاو و ئاین و نەریتە كۆمەڵایەتییەكان بە كۆتا بێنێت.
"ئاتیس" لە كتێبەكەیدا باس لەوە دەكات، كە لەوەتەی لە دایك بووە هەستێك لای دروست بووە، كە لە نێوان قاچەكانیدا شتێك یا ناوچەیەكی قەدەغە هەیە و نەدەبوو هەبایە، هەروەك كوڕانیش هەستێكی پڕ شەرمیان بەرامبەر بە ئەندامە سێكسیەكانیان لا دروست دەبێت.
ئاتیس پێی وایە لەسەر ئاستی تاكەكەسەكان، لە جیهانی ئیسلامیدا ئەو شۆڕشە سێكسییە بە شێوەیەكی نهێنی بەرپا بووە، بەڵام ئێستا كاتی هاتووە، كە ئەو شۆڕشە هەموو شوێنێكی جیهانی ئیسلامی بگرێتەوە، تاوەكو بگات بە كۆمەڵگا پێشكەوتوو و كراوەكان. بەڵام ئاتیس یەكەمین كەس نییە و دواهەمین كەسیش نابێت، كە بابەتێكی لەو شێوەیە بوروژێنێت.
توێژەری مەغریبی پڕۆفیسۆر عەبدولسەمەد دیالمی ساڵی پار لە دیدارێكیدا لەگەڵ رادیۆییەكی هۆڵەندی بانگەشەی یەكسانی سێكسی لە نێوان نێر و مێدا كرد. داواشی كرد دەقە پیرۆزەكان خوێندنەوەیەكیان بۆ بكرێت، كە لەگەڵ رۆحی سەردەمدا بگونجێت. وتیشی "هەموو دەقەكان قابیلی راڤە و لێكدانەوەی جیاوازن".
دیالمی بانگەشەی بۆ نوێگەری سێكسی كرد، كە دەوەستێتە سەر یەكسانی سێكسی لە نێوان رەگەزی جیاوازی ژن و پیاو و هاوڕەگەزەكانیشدا. كاتێكیش مرۆڤ لە رووی سێكسیەوە كێشەی دەبێت و لە چێژی سێكس بێبەش دەبێت، دەبێتە كەسێكی توندڕەو و دژ بە بزە و پێكەنین و پێكەوەژیان، رەنگە خۆشی بە خەڵكدا بتەقێنێتەوە.
دیالمی باس لەوە دەكات، كە دەقە ئیسلامیەكان بە شێوەیەكی ئاشكرا و راستەوخۆ رێگە بەو یەكسانییە نادەن، بەڵكو ئەو مافە تەنیا بە ژن و مێرد دەبەخشن، نەوەك ئەوانەی نەچوونەتە نێو هاوسەرگیرییەوە. هەروەك تەنیا سێكسی نێوان ژن و پیاویش لە ئیسلامدا رێگەپێدراوە، بەڵام سێكسی نێوان پیاو و پیاو و ژن و ژن قەدەغە كراوە. دیالمی پێی وایە هەموو دەقێك بواری لێكدانەوەی جیاوازی تێدایە، بۆیە پێویستە خوێندنەوەیەك بۆ ئەو دەقانە بكرێت، بە ئاڕاستەی هێنانەدی یەكسانی "بۆ نمونە تەمەنی هاوسەرگیری"، هەروەها ئیمان و عەقیدە لەگەڵ یاساكان لە یەكتر جیابكرێنەوە.
بە بۆچوونی دیالمی، ئافرەتان خوێندنەوەیەكی سنورداریان بۆ دەقە پیرۆزەكان هەیە، ئەمیش لە روانگەی سێكسەوە نییە، بەڵكو لە روانگەی بۆچوونێكی جێگیریی پێشوەختەیانەوەیە. ئەو ئافرەتانەی لە خودی خۆیاندا باوەڕی تەواویان بە یەكسانی هەیە، دەقی ئەوتۆ بۆ پشتگیرییكردنی بۆچوونەكانیان لە قورئان و فەرموودەكانیشدا دەدۆزنەوە، بەڵام ئەو ئافرەتانەی هەر لە سەرەتاوە باوەڕیان بە یەكسانی نێوان هەردوو رەگەز نییە و پێیان وایە دەبێ بنەمای "دادپەروەری" لە نێوان هەردوو رەگەزدا هەبێت، نەوەك یەكسانی و هەریەك لە پیاو و ئافرەت مافی تایبەت و جیاوازیان هەیە، ئەوانە لە كاتی گەڕان و خوێندنەوەی دەقە پیرۆزەكاندا، بە دوای پاڵپشتی دەقێكی پیرۆز بۆ یەكسانیی نێوان هەردوو رەگەز ناگەڕێن، بۆیە ناشیدۆزنەوە.
هەڵوێستی ئاینییەكان لە بەرامبەر سێكس، نەوەك تەنیا لە ئیسلامدا، بەڵكو لە مەسیحیەتیشدا بۆچوونی جیاوازی لە نیوان زانایانی ئاینی مەسیحی و بیرمەندە جیهانیە رۆژئاواییە عەلمانیەكان لێ كەوتۆتەوە.
قەشەی هۆڵەندی "بیرڵ فان دۆنك" پێی وایە ئاینی مەسیحیەت بۆ چەندین سەدە شەهوەتی سێكسی جڵەو كردووە، ئەوەی كە شۆڕشێكی سێكسی بەرپا كرد و ئازادی سێكسی لە كۆمەڵگای رۆژئاواییدا لێ كەوتەوە. هەروەك چۆنیش برسیەتی خواردن شۆڕشی ئابووری و سیاسی لێ دەكەوێتەوە، برسیەتی سێكسیش هەژان و شۆڕشی سێكسی بەرپا دەكات، لە هەر شوێنێكی جیهان كەبتی سێكسی هەبێت. وەك هەر شۆڕشێكی سیاسی و كۆمەڵایەتیش، ئەمیشیان خەڵكانی شۆڕشگێڕی خۆی هەیە، كە گەرمی و بڵێسەكەی زیاد بكەن. دۆنك پێشی وایە شۆڕشی سێكسیی ئایندە لە وڵاتانی ئیسلامی و چیندا سەرهەڵدەدات. بە بۆچوونی ئەو قەشە هۆڵەندیە مێژووی ئاینەكان تا رادەیەك پەیوەستە بە جوانی و جەستە و سێكسەوە، بەڵام پیاوانی ئاینی هەوڵ دەدەن ئەم راستییانە بۆ پاراستنی بەرژەوەندیەكانیان بشارنەوە. ئەو كەسانەش كە لادانی سێكسییان هەیە، خەڵكانی باوەڕدارن بە خوا و مەسیح، بێ باوەڕ و مولحید نین. ئەو دەڵێت "من چەندین ئافرەتی سێكسفرۆشم بینیوە، هاتوچۆی كڵێسەكانیان كردوە و بۆ ئاینەكەیان دڵسۆز بوونە".
بەڵام رەنگە ئەوەی "دۆنك" و زۆر خەڵكی تریش نایزانن، كە باس لە ئازادی سێكسی و گونجانی سێكس و ئاین لە بەلجیكا و هۆڵەندا و فەڕەنسا دەكەن، ئەم دۆخە لەگەڵ جیهانی ئیسلامیدا ناگونجێت. خانمە نوسەری میسری "بسنت رەشاد سەهلا" كە لە یەكێك لە گەڕەكە میللیەكانی شاری ئەسكەندەرییە نیشتەجێ بوو، لە ئەنجامی ئەو هەڕەشانەی لێیكرا بە هۆی نوسینی كتێبێك بە ناوی "خۆشەویستی و سێكس لە ژیانی پێغەمبەردا"، ناچار بوو ماڵەكەی جێبهێڵێت و بەرەو قاهیرە رابكات.
"سەهلا" كچێكە تەمەنی لە كۆتایی بیستەكان دایە، هەندێك جار "پۆشیەیەكی سەردەمیانە" دەكات، ئەو دانی پێدانا، كە ئەو زمانەی لە نوسینی كتێبەكەیدا بەكاری هێناوە، خوێنەرانی جیهانی عەرەبی دووچاری شۆك كردوە، بەڵام پێشی وایە ژیانی پێغەمبەر موڵكی هەموو لایەكە و پێویستە لێی نزیك بكەوینەوە و نەیگەیەنینە ئاستی پیرۆزیی و پەرستن.
گومان لەو كچە نوسەرە دەكرێت، لە پەنابردنی بۆ ژمارەیەكی زۆر فەرموودەی پێغەمبەر، كە گومان لە راستی و دروستییان دەكرێت و دەریدەخەن پێغەمبەر توانایەكی سێكسی لە ڕادەبەدەری هەبووە.
"سەهلا"، خاتوو عایشەی خێزانی پێغەمبەر بە "نازدار و سەركێش لە هەرزەكارییەكەیدا" وەسف دەكات. بەڵام بانگەشەكاری ئیسلامی "جەمال بەننا" پێی وایە لە ئیسلامدا هیچ هەستیاریەك بەرامبەر بە باسكردنی سێكس و پەیوەندی سێكسی نییە. تەنانەت نوسەری بەریتانی "سەلمان روشدی" پێی وایە رۆژئاوا نەیتوانیوە لەوە بگات، كە یەكێك لە هۆكارەكانی توندڕەوی ئیسلامی، ترسی پیاوانیانە لە ئازادی سێكسیی ئافرەتان.
"روشدی" بۆ گۆڤاری "شتیران"ی ئەڵمانی باسی لەوە كردوە، كە دواین رۆمانەكەی بە ناوی "شالیماری پاڵەوان" باس لەو ترسە دەكات، كە زۆر لە پیاوانی موسوڵمان بەرامبەر بە ئازادی سێكسیی ئافرەتان و لەدەستدانی ئابڕوویان هەیانە.
عەدنان ئەبو زێد- ئیلاف