سڤیل: مقداد شاسواری

رووداوێك چوار كەسی لێكدی جیاوازی لەشوێنێكدا كۆكردەوە. هەمان رووداو منیشی پەلكێشی هەمان شوێن كردو بووینە پێنج كەس. ئێوە كارتان بە رووداوەكە نەبێ. منیش تەمای باسكردنیم نیە. خۆتان نیگەران مەكەن. هەر تەنها سووكە رووداوێك بوو. نە زیانی ماددی هەبوو، شوكور نە زیانی گیانیشی هەبوو. كاتێ گەیشتمە لایان باس و خواسیان خەریك بوو گەرم دەبوو. ئاخر گوتم ئەوان لێكدیجیاواز بوون. هەم لەڕواڵەت و هەمیش لەناواخن.
یەكێكیان، ئەفەندی ئاسایەكی گەنج بوو، دەیگوت "وەڵلا ئەو مەلایە ناوی لەخۆیەتی. یەعنی ناوەكەی پڕ بەپێستێتی" یەكێكیان بە ئەسپایی چرپاندیە ناو گوێم "مەبەستی مەلا كرێكارە"! گەنجەكە دەیگوت "كرێكار بەو كەسە دەڵێن بە كرێ بۆ كەسێك یان شوێنێك كار دەكات. ئەم كابرایەش بێ هیچ گومانێك بە كرێ بۆ كەسێك یان شوێنێك كار دەكات. ئیدی ئەو كەسە یان ئەو شوێنە كێیە من ناتوانم گوللە بەتاریكییەوە بنێم! ئەگینا ئەقڵ دەیگرێ تۆ لەم وڵاتەیا كەست پێ پیاو باش نەبێ و بە یەك ریتم و بە یەك ئاواز پەلاماری هەر هەمووی بدەی. بۆخۆی لەو نەرویجە خۆشە دانیشتووە و لەهەموو جوانیی و خۆشی و ئازادیی و خۆشگوزەرانی ئەوێ بەهرەمەندەو ئەو مەلا ئەوروپا نشینە باس لەوە دەكات وەڵلا كورد دەبێ فەوجێك لەگەنجانی خۆكوژ دروست بكات و بچن لەو وڵاتانە خۆیان بە دوژمندا بتەقێننەوە. ئێمە لێرە خەریكی ئاوەدانكردنەوە و ئاشتەوایی و بنیاتنانی دیموكراسییەتین و ئەو باسی چیمان بۆ دەكات. هەر بۆ ئەوەیش هەتیو نەمێنێتەوە بە حسێبان پشتگیری لە "گۆڕان" دەكات و ئەوان بەسوارچاك دەزانێ. گۆڕانیش وەك لێیان خۆش هاتبێ خۆیان لێ كردووە بە كەڕەی شەربەت، نە دەڵێن ئا نە دەڵێن نا...
دووهەمیان، كە سووكە ریشێكی ئیخوانیانەی رێتۆشكاریی و قەڵەمكاریی كردبوو، گوتی "وەڵلا بابە وایە. ئەو كابرایە سەری زمانی و بنی زمانی پەلاماری رەوتە ئیسلامییەكەی كوردستان دەدات و ئەمیان سەر بەو وڵات و ئەویان سەر بە شوێنێكی دیكە لەقەڵەم دەدات. ئەوجا دەڵێ ئەوانە پرۆژەیان نیە. ئێ باشە ئەی ئەوە نییە رێكخراوێكی سەر بە لایەنێكی ئیسلامی پرۆژەی "دۆستانی محەمەد "د.خ"ی هەیە. قیڕوسیا لەبڕێك پارە بكەو ناوت دەچێتە ناو لیستی دۆستانی محەمەدو لەڕۆژی حەشردا لەگەڵ بیلالی حەبەشی و سەلمانی فارسی و گابانی كوردی حەشر دەكرێیت! پرۆژە لەمە باشتر چیت دەوێ؟ یان حیزبە ئیسلامییەكەی دیكە، ئەوە نیە لەزمانی كەسە یەكەمەكەی دەڵێ "ئێمە خاوەنی پرۆژەی ژیانەوەی مرۆڤ و كۆمەڵگەو نیشتیمان و دەرمانی دەردەكانی ئەمڕۆ و هیوای ئایندەین". پرۆژە لەمە كامڵتر چیت دەوێ؟ دەرمانی هەموو دەردەكانی ئەمڕۆی گەلەكەمان ئەوەتا لەناو ئەو پرۆژەیە دایە، ئیدی بۆ پرۆژەیان نیە كاكە"؟
سێهەمیان، كراس و شەرواڵێكی لەبەربوو لەسەرما هەڵدەلەرزی و خوا خوای بوو زووتر پەرتەی لێ بكەن و هەركەس بچێتەوە ماڵی خۆی و دیاربوو هیچ لەباس و خواسە گەرمەكە نەدەگەیشت و تۆسقاڵێك پێی گەرم نەدەبۆوە.
چوارەمەكەیان، دەستێكی لەهەوادا راوەشاند و گوتی "كورە دەسا سوێند بەو شەش پاكێجە پیرۆزەی ئۆپۆزسیۆن ئەو مەلا كرێكارە بگەڕێتەوە كوردستان ئەحەدێك ناكەوێتە دوایەوە. زەمان زەمانی پاكێج و خۆپیشاندان و ئۆپۆزسیۆنە، كێ دەچێ بە قسەی مەلا كرێكارێك هەڵكێشێتە شمشێر یان بچێ خۆی بتەقێنێتەوە. ئاخر كورد و ئەم بەزمەیان گوتووە؟".
منیش، هەروەك بە ئەسپایی تێكەڵیان ببووم بە ئەسپاییش خۆم كێشایەوەو بەدەم لەرز و سەرماوە خۆم كوتایە ژوورێكی گەرم و ئاسوودە. عەیبی ئەم كوردە ئەوەیە هەر كەسە و بەئاوازی خۆی دەژەنێ. هەموویشی بۆتە شیكار و شرۆڤەكاری سیاسی. دەی. ئازادی رادەربڕینەو هەر كەس مافی خۆیەتی قسەی خۆی بكات.