رێبوار سیوەیلی

بە بڕوای من، حیزبی شیوعی نامۆكراوە بەو چینەی كە دەبوو متمانەی خۆیان بەم حیزبە ببەخشن و ئەویش چینی زۆرلێكراوان و ستەمدیدە و كرێكارانن، كە دەبوو ڕۆژگارێك لە هەموو جیهاندا یەكبگرن. بەڵام لە جیهانێكدا كە پڕ بووە لە حیزب و لە كۆمەڵگایەكدا كە چەوساندنەوە و ناعەدالەتی لەو پەڕیدایە و لە وڵاتێكدا كە پێوەری نزیكبوونەوەی خەڵك بەهیچ شێوەیەك ئایدیۆلۆژیا و بەرنامە نیە و بڕی پارەیە، بێگومان دەبێت حیزبی شیوعی پاشەكشە بكات. بەڵام ئەم پاشەكشەیە لەوێوە نەهاتووە كە لەم كۆمەڵگا و نیشتیمان و جیهانەدا مرۆڤی چەوساوە نەماوە، كرێكاران بە گشت مافەكانی خۆیان گەیشتوون و كۆی ئەو توێژینەوە و فەلسەفانەی بناخەی حیزبی شیوعییان لەسەرەوە دامەزراوە، پووچەڵ بوونەتەوە. پاشەكشەی حیزبی شیوعیی لە هیچكامێ لەمانەدا نیە و لە دڕندەیی سیستەمێكی سەرمایەداری بازاڕ و بێدیسپلین و بەربەرەڵادایە، كە لەلایەن كۆمەڵێ جاهیلی تازەپیاكەوتووەوە ڕێبەرایەتی دەكرێت، كە هەم پارە و هەم پێگە و هەم میدیاكانیان لە ژێر كۆنتڕۆڵی كۆمەڵگا دەرهێناوە و بە ئارەزووی خۆیان ئاراستەیان دەكەن و ئەم ئاراستەكردنەش بەناوی كۆمەڵێ ئایدیۆلۆجیای ڕووكەشی بێبناخەوە ئەنجامدەدەرێ، كە جگە لە درۆكردن لەگەڵ مرۆڤ و كەرامەت و گەورەییەكەی هیچ مەبەستێكی دیكەیان لە پشتەوە نیە. ئەوەی پاشەكشەی بە حیزبی شیوعیی لە كۆمەڵگایەكدا كە پێویستی بەو جۆرە حیزبانە هەیە، كردووە، زیرەكی حیزبەكانیتر و پڕۆژە و ئایدیۆلۆجیا ڕووكەشەكەیان نیە، هەروەكچۆن ناكرێت چاویش لە كەمتەرخەمی و نازیرەكی شیوعییەكانیش بپۆشین لە جێخۆشكردنی خۆیان لە كۆمەڵگای كوردستاندا و چۆڵكردنی ئەو سەنگەرانەی دەبوو ئەوانی تێدا بن، نەك كەسانیتر، بەڵكو ئەوەی پاشەكشەی بەو حیزبە كردووە ئەو گوتارە سیاسیە ڕواڵەتگەرا و میدیاییەی حیزبەكانیترە، كە لە پێستی ڕێویدا، خۆیان وەك شێر پیشاندەدەن و لەبەرامبەر نەیارەكانی كوردستانیشدا شەرمن و دۆشداما و ڕۆژێ دەستەودامانی ئەنقەرە دەبن و ڕۆژێ لە تاران لە خزمەتی ئیمامدان. ئەم بازرگانانەی سیاسەتن كە بە زەبری پارە ڕۆحی ڕەخنە و فیكر و مرۆڤایەتیان لەم وڵاتەدا كڕیوە و بە مژدەی ناڕاست و پووچكردنەوەی هەر شتێ كە بۆنی بەهای مرۆیی لێدێت، گوتارێكی سیاسیی ترسناكیان بەرجەستە كردووە، كە نەك هەر تەنیا مانەوەی حیزبی شیوعی دەخاتە مەترسییەوە، بەڵكو مانەوەی زانست و فیكر و ڕەخنەش لە ژێر هەڕەشەی جیدیدایە. لەبەر ئەوە، من پاشەكشەی حیزبی شیوعیی لە پووچەڵبوونەوەی ئەو تێز و سەرچاوانەدا نابینم كە بەم یان بەو شێوەیە بوونەتە بنەمای دامەزراندنی حیزبێكی ڕەسەن، كە لە خەباتكردنیدا لەپێناوی مرۆڤایەتی و بەهاكانی وەك عەدالەت و یەكسانی و ڕۆشنبیریی و كەلتووریدا، بە هەزاران شەقاو لە پێش ئەو حیزبانەوەیە كە ڕۆژانە كەژاوەی خەباتیان بۆ خەڵك لێدەدەنەوە. بەڵێ ڕاستە حیزبی شیوعی لەساڵانی ڕابردوودا ڕووبەڕووی هێرشی ئیسفەنجیی حیزبەكانیتر بۆتەوە و بە لێشاو ئەندامەكانیان هەڵمژتوون، ڕاستە حیزبی شیوعی لە ئاستی سەركردایەتیدا دووچاری دۆگما و دابڕان و پێگە و هەرەمییەت بووە، ئەوەش ڕاستە كە میدیای ئەم حیزبە لاواز و دۆستە كۆنەكانی دوورەپەرێزیی لێدەكەن و كەسایەتیە دیارەكانی وەك پێویست داكۆكیی لە خەباتی دێرینەی حیزبەكەیان ناكەن و بوون بە داوی نەسریە و پاراستنی پەیوەندییەكانیان، بەڵام ئەم پاشەكشەیە بەمانای ئەوە نیە، كۆمەڵگای ئێمە دەتوانێ چاو لە مانەوەی ئەم جۆرە حیزبە بپۆشێ و زەمینەی كۆمەڵایەتی خۆی لەدەستداوە. ئەگەر واش بێت و ئیتر شایەتی حیزبێكی ئەوتۆ لە واقیعی خۆماندا نەبین، ئەوە بە مانای ئەوەیە ئەو حیزبە لە ماوەی زیاتر لە پەنجا ساڵە خۆراكبەخشی كۆی حیزبەكانیترە و بە جۆرێ لە هەموویاندا تواوەتەوە. بۆیە ئیتر وەكخۆی نامێنێ و لە هەموواندا ئامادەیی هەیە، چاو خشانەوەیەكیش بە بەرنامەی حیزبەكانیتردا ئەو ڕاستیەمان بۆ دەسەلمێنێ.