بێستوون نوری

یەكێك لەو لێدوانانەی نێچیرڤان بارزانی كە یەكێتی پێی پەستبوو، ئەو لێدوانە بوو، كە لەبارەی "نانبڕاوان" دای. هەڵبەت دەمێكە پرسی نانبڕاوان وەك كاردانەوەی یەكێتی بۆ ئەو شكستانەی لە هەڵبژاردنەكانی تەمموز و ئازار دووچاری بوو، باس دەكرێ. لەراستیدا من گومانم هەبوو، كە لەو سەردەمەدا دەسەڵاتی كوردی پەنا بۆ رێگایەكی وەها ببات، كە بەو شێوەیە تۆڵە لەخەڵك بكاتەوە، هەڵبەت پێشموابوو یەكێتی وەك حیزب مافی تەواوی خۆیەتی كە ئیجرائاتی بەرامبەر ئەو كەسانە هەبێت، كە لەنێو ریزەكانیدا بن و مووچەی حیزبی لێوەربگرن، كەچی بۆ كیانی دیكە كار بكەن و ئەو كیانەش بەپلە یەك دژی یەكێتی بێت، ئەمە لەهیچ شوێنێكی دنیادا نییە، بەڵام كاتێك ئەو ئیجرائاتە دەپەڕێتەوە سلكی رەسمی و فەرمانبەری رەسمی، ئەمە دەچێتە خانەی پێشێلكردنی مافی مرۆڤ و دژ بەپرەنسیپەكانی دیموكراتی و ئازادی تاكەكەسییە. چونكە مرۆڤ ئازادە لەوەی قەناعەتی خۆی دەگۆڕێ و دەنگ بەلیستی (ا) نادات و لیستی (ب) هەڵدەبژێرێ، رەنگە لەهەڵبژاردنێكی دیكەدا رایەكەی پێچەوانە بێتەوە، لەوانەشە دەنگ بەهیچ یەكێك لە (ا) و (ب) نەدات و لیستێكی دیكە هەڵبژێرێ، ئەمە مافێكی سەرەتایی خۆیەتی، كەس ناتوانێ رێی لێبگرێ. تا ئەو هەفتەیە ئەم پرسە لای زۆر كەس جێگای گومان بوو، هەرچەندە سەرۆكایەتی هەرێمی كوردستان لیژنەی لێكۆڵینەوەی بۆ پێكهێناوە، بەڵام تائێستا ئەو لیژنەیە ئەنجامی لێكۆڵینەوەكانی ئاشكرا نەكردووە، یەكێتیش بەردەوام ئەوەی رەت دەكردەوە، كە نانی فەرمانبەرێكی حكومی بڕیبێت، بەڵام هەفتەی رابردوو دكتۆر بەرهەم ساڵح سەرۆكی حكومەتی هەرێمی كوردستان و جێگری سكرتێری گشتیی یەكێتیی نیشتیمانیی كوردستان بەئاشكرا دانی بەوەدا نا، كە دوای هەڵبژاردنی بیست و پێنجی حەوت سزای سیاسی لەهەرێمی كوردستان هەبووە و بە ستەمیشی ناوبرد و وەك لەسایتی (سبەی)ـی كۆمپانیای وشەدا بڵاوكرایەوە، كە د.بەرهەم تەئكیدی كردەوە "نابێت سزای‌ سیاسی‌ لە هه‌رێمی‌ كوردستاندا بمێنێت، ئه‌و سزایه‌شی‌ دژی‌ لایه‌نگرانی‌ بزووتنه‌وه‌ی‌ گۆڕان به‌كار هاتووه،‌ رێگه‌نادرێت جارێكی‌ تر دووباره‌ بێته‌وه‌، دوپاتیشی كرده‌وه‌: له ئاینده‌یه‌كی‌ نزیكدا كێشه‌ی‌ ئه‌و كه‌سانه‌ چاره‌سه‌ر ده‌كرێت، كه‌ سزای‌ سیاسی‌ دراون و ئه‌و سته‌مه‌ له‌سه‌ر ئه‌و خه‌ڵكه‌ هه‌ڵده‌گیرێت".
ئەم دانپێدانانە هیچ گومانێكی نەهێشتەوە، هاوكات پرسیاری خستە سەر كۆی هەموو ئەو دروشمانەی یەكێتی لەماوەی تەمەنی خۆیدا هەڵیگرتووە، هەندێ جار دەگەمە ئەو راستییەی كە ئەوەی زۆر باسی شتێك دەكا، ئەوا ئەو شتە لەتەكوینی خۆیدا بوونی نییە، ئاخر نانبڕین لەسەر هەڵوێستی سیاسی، كوا لەگەڵ سۆسیال دیموكرات و مافی مرۆڤ و ئازادی رادەربڕین و ئازادی كاری سیاسی دەگونجێ، كە یەكێتی خۆی پێدەناسێنێ.
ئەم كارە چەندە بۆ ئەوانەی نانیان بڕاوە قورسە، بۆ هەموو ئەوانەش خەون بەسەقامگیری و چەسپاندنی دیموكراسی و ئازادی زیاتر دەبینن، ئاسان نییە، نابێت رێگا بدرێت ئەمە ببێتە نەریتێكی سیاسی و هەر حیزبێك توشی كێشەیەكی وەها بێت، حكومەت بۆ ئەم مەسەلەیە ئیسغلال بكات.
ئەم دانپێدانانەی بەرهەم ساڵح هەرچەندە درەنگوەختە و لەژێر فشاری رووداوەكان و گەورەبوونی مەسەلەكەیە، بەڵام هەر باشترە، هەم بۆ ئەوەی حكومەت وەزیفەی خۆی بە تەواوی جێبەجێ بكات، كە خزمەتكردنی هەموو خەڵكە بە بێ جیاوازی، هەمیشە بۆئەوەی یەكێتی بەخۆیدا بچێتەوە و لەوە تێبگا، كە ئیتر سەردەمی سندوقی دەنگدانە و چیتر هەڕەشە و خۆگیفكردنەوە دادی نادات و ئەگەر نەگۆڕێی، ئەوا دەگۆڕدرێی.