رێبوار سیوەیلی

ئەوكاتەی بزووتنەوەی گۆڕان دەبێتە حیزب، زۆرێك لەدۆستەكانی لەدەست دەدات و دەبێتە خاوەنی بەشێك لەو مێژووە میراتیەی پێكهاتەی حیزبایەتی لەئاستی ئایدیۆلۆجی و سیاسی و مێژوویدا، لەخۆرهەڵاتی ناوەڕاست و لەئەزموونی حیزبە كوردیەكانەوە بۆی دەمێنێتەوە، كە هیچیان باش نین. ئەو میراتە گۆڕان دەوڵەمەند دەكات، بەڵام خۆشەویستی ناكات. ئەگەر بهاتبا و گۆڕان هەر لەسەرەتاوە وەك حیزبێك لەدایك ببوایە، بۆ ئێستای زۆر باشتر بوو، وەك لەوەی لەئێستادا ببێتە شتێك، كە خاڵی لێكچوونی لەگەڵ حیزبەكانی تردا زیاتر دەكات. بەڵام ئەم خاڵی لێكچوونە لەگەڵ حیزبەكانی تردا زۆرێك لەخەڵكان لەگۆڕان دەتەكێنێتەوە، بەتایبەتی نەوەی نوێ و گەنجان و هەندەرانیەكان و ڕۆشنبیران. چونكە هەر خودی بیرۆكەی بوونە حیزب، بیرۆكە و خەونی ئەو بەشەیە، لەكەسانی ناو بزووتنەوەی گۆڕان، كە پێشتر لەحیزبی دایك و حیزبەكانی تردا بۆیان نەهاتەدی. ئەم بیرۆكەیەش ئەو كەسانە تووڕە دەكات، كە شوناسی گۆڕانیان وەك شوناسێكی حیزبی نەچۆتە زەینەوە و بەئاسانیش ناتوانن بەسەر ئەو وێنا فاشیلەی حیزبدا، كە لە مێشكیاندا جێگیر بووە، زاڵ ببن و گۆڕان وەك نموونەی حیزبێك، كە لەو هەژدە ساڵەی دواییدا هۆكاری تووندوتیژی كۆمەڵگا و نالێبووردەیی و مەینەتیی ژیانیان بووە و دوو حكومەتی و دوو ئیدارەیی و شەڕی ناوخۆیی خستۆتە بیرەوەرییانەوە، قەبووڵ بكەن. هەروەها خەڵك لەئێستادا هیچ بەڵگەیەكی قەناعەتپێكەری ئەقڵانیشی بەدەستەوە نییە، سەبارەت بەوەی گۆڕان لەپەیكەری حیزبدا جیاواز دەبێت، لەپەیكەری حیزبی خۆرهەڵاتیانە و حیزبی سەركردە و هەرەمیەت و حیزبی سازش. هەر لەئێستادا گۆڕان لەگەڵ كۆمەڵی ئیسلامی و یەكگرتوو و چەند لایەنێكی تر لەسازشێكی بەردەوامدایە و خەریكیشە لەگەڵ پارتی دیموكراتی كوردستان دەچێتە نێو پرۆسەیەكی هاوسەرگیرییەوە. ئەمە جگە لەوەی لەو ماوەیەدا كە بزووتنەوەی گۆڕان سەریهەڵداوە، هیچ تیۆری و خوێندنەوەیەكی نەوعی و جیاوازی بۆ كۆمەڵگای كوردی نەكردووە و بەرهەم نەهێناوە، زیاتر وەك كەناڵێكی ڕاگەیاندنی گەورەتر لەهەندێك لەڕۆژنامە ئەهلییەكان لەسەر كۆمەڵگای كوردی و دەسەڵاتی حیزبەكان ئیشی كردووە، تا كاری تیۆریزەكردن و گرنگیدان بەپرۆسەی دروستكردنی كۆمەڵگا و دیموكراتیزەكردن. ئەمە وێڕای ئەوەی بەرجەستەبوونی بزووتنەوەی گۆڕان لەهەیكەلی حیزبدا هیچ ناگەیەنێ، جگە لەزاڵبوونی هەیمەنەی ئەو سەركردە خاوەن ئەزموونانەی بزووتنەوەكە و لاوازیی داخرانیان بەرامبەر بەنەوەی نوێ، وەك بكەرێكی سەرەكی لەگەمەی سیاسەتدا. چونكە ئەم نەوە نوێیە كە لەدەوری بزووتنەوەی گۆڕان كۆبوونەتەوە، بەهەندێك لەئەندامانی چالاكیشیانەوە لەپەرلەماندا، هیچیان لەپێشینەی ڕۆشنبیریی خۆیاندا بڕوایان بەڕەهەندیی حیزبیانەی سیاسەت نەبووە. لەگەڵ هەموو ئەم سەرنجانەشدا من ڕێزی زۆرم بۆ بڕیاری بزووتنەوەی گۆڕان لەبەحیزبیكردنی خۆیدا هەیە، بەڵام ئەم بڕیارە بەبڕیارێكی ڕاست نازانم و ڕەنگیشە دەلاقەیەك و درزێك لەبزووتنەوەكە بخات و ململانێی نەوەكان لەسەر بەهاكانی بزووتنەوەكە و لەسەر دەسەڵات و پێگەی بزووتنەوەكە، لەكایەی ناوبراودا بەرجەستە بكات. من لەگەڵ بڕیارەكەیاندا نیم، چونكە لەڕوانگەی سۆسیۆلۆجیای سیاسییەوە، هێشتا بزووتنەوەی گۆڕان خاوەنی ئەو سەرمایە ڕەمزییە پێویستە نییە، كە ڕێگەی پێبدات وەك كایەی باڵادەستی دەسەڵات دەربكەوێت. ئەمە جگە لەوەی هێشتا تەمەنی بزووتنەوەكە ئەوەندە نییە كە ڕێگەی دابێت، كۆی ئەو گوتار و دەرهاویشتە تیۆری و پراكتیكیانەی پێویستە لەسەر پەیوەندیی و تایبەتمەندیی ئۆپۆزیسیۆن و دەسەڵات، لەكۆمەڵگای ئێمەدا بەرجەستە و پووختە ببن، خۆیان بەیان بكەن. ئێمە تازە بەتازە خەریكین لەسایەی بزووتنەوەی گۆڕاندا قسە لەسەر كایەیەكی نوێ بۆ سیاسەتكردن دەكەین، كەچی ئەوان بێ ئەوەی كۆی توانایی هێزەكی ئۆپۆزیسیۆن بەگەڕ بخەن و بیكەنە كردەكی و ڕۆحی ئۆپۆزیسیۆن بەكۆمەڵگای ئێمە بناسێنن، لەپەلەكردندا دێن و خۆیان دەكەنە حیزب و بەو جۆرەش دێنەوە ناو دەسەڵات و مەلۆتكەی ئۆپۆزیسیۆن لەسەر بێشكە دەخنكێنن. بەبڕوای من كە لە ڕوانگەی فەلسەفەی سیاسییەوە، گرنگیی تەواو بەهەبوونی ئۆپۆزیسیۆن چ لەدەرەوەی هەردوو حیزبە دەسەڵاتدارەكە و چ گرنگیی بەتوانای ئۆپۆزیسیۆنی متبووی ناو هەردوو حیزبی پارتی و یەكێتی دەدەم، ئەم كارەی گۆڕان دەیكات بەزیانی خۆی و كۆمەڵگا و هەردوو حیزبی حاكم و كایەی سیاسیی كوردی دەزانم. لەوەزارەتی ناوخۆ داواكارم دڵیان نەرم نەبێ بۆ گۆڕان و مۆڵەتی بوون بەحیزبیان نەداتێ و لەخوای گەورەش دەپاڕێمەوە، فریشتەی نەجات بنێرێ بۆ گردەكە، تا نەهێڵێ ئەو كوڕگەلە بەدەست خۆیان فوو بەشەمعەكەدا بكەن و بەعدەن بێژن وەزارەت عەلەتریكی حكومەت هەرێم خەراوە و كارەوایان لەسەر بڕیووین. خۆ هەموو شتێكیان لێئەوەشێتۆ..