ئاسۆ حەسەن

سەد مخابن ڕفاندن و پاشان شەهیدكردنی قوتابی زانكۆ و رۆژنامەڤانی گەنج سەردەشت عوسمان كارەساتێكی دڵتەزێن و جەرگبڕبوو، نەك هەر بۆ بنەماڵە و خێزانەكەی، بەڵكو تەواوی قوتابیان و رۆژنامەنووس و نووسەر و خەڵكی هەولێر و كوردستان.
سەردەشتی جوانەمەرگ، گەنجێكی تازەهەڵچووی زمانزان و چالاك و دەروون پڕ لەهیوا، دەبوو وەك هەر مرۆڤێك بژیا بووایە و شایستەی ئەم مەرگە تراژیدیایە نەبوو، راستە ئەم رووداوە دڵتەزێنە هەموو كوردستانی تاساند، بەڵام بۆ خەڵكی هەولێر پتر دڵتەزێن بوو، ئەو كارەساتە زۆر لەدۆست و هاوڕێیانی گریاند، زۆرتریش لەقوتابی و رۆژنامەنووس و گەنج و پیری هاندا بەشێوازەكانی خۆپیشاندان و ڕێپێوان ناڕەزایی دەرببڕن و داوا لەدەزگاكانی پۆلیس بكەن بكەوێتە خۆ و بەزووترین كات، بكوژانی جوانەرمەگ بدۆزرێنەوە و بدرێنە دادگا.
دیارە خەڵكی هەولێر وەك كلتورێكی رەسەنی كوردەواری بەخۆراگر و ئارام و بیركردنەوە و سەنگینی ناسراون و دوورن لەهەڵچوون و كاری هەرزە و نابەجێ، لەبەرامبەر ئەو تاوانەش بێدەنگ نابن و هەموو رێگەیەكی یاسایی و جەماوەری و فشاریش دەگرنەبەر، هەرچی زووە لێكۆڵینەوەكان بگەنە ئەنجام و هەوڵیش بدرێ جارێكی دی كردەوەی وا روونەداتەوە، لەهەمانكاتدا دڵنیاین بنەماڵەی جوانەمەرگ و تەواوی خەڵكی ئەم شارەش رێز و پێزانینیان بۆ هەموو ئەوانە هەیە لەم كارەساتەدا رۆڵی خێر و دڵنەواییان بینیووە، بەشێوەیەكی هێمنانەش رێپێوانیان كردووە و فشاریان خستۆتە سەر دەزگاكانی پۆلیس و ئاسایش بە پەلە لیژنەی لێكۆڵینەوە پێكبهێنێ لەبەدواداچوون بەردەوام بێت تا تیرۆریستان ئاشكرا دەكرێن.
بەڵام ئەمجارەش دەڵێین سەدمخابن لەو چالاكی خۆپێشاندان و رێپێوان و هەڵمەتە رۆژنامەوانییەی هەندێ رۆژنامە و گۆڤاری بەناو ئۆپۆزسیۆنی دەسەڵات گرتوویانەتە بەر، فشاری نابەجێ و تاوانباركردنی بێ بنەما و هەواڵی بێ بەڵگەی تێدا بەرجەستەدەبێت كە بەڕوون و ئاشكرا دیارە دەستە و گروپ و لایەنی سیاسییان لەپشتە و ئەم كارەساتە جەرگبڕەی گەنجێك، قوتابیەكی زانكۆ، رۆژنامەنووس، لەكۆتاییشدا مرۆڤ، بۆ مەبەستی سیاسی دژ بەلایەنێكی دەسەڵات و دەزگا ئەمنییەكانی هەولێری پایتەخت قۆزرانەوە كە لەهەندێ رۆژنامە و گۆڤار هەموو سنورێكی رەوشت و كلتووری بەزاندووە و رۆژنامەنووسی واش هاتوونەتە ناو هەڵمەتەكە رق و قینی ناوچەگەرێتی و چاوهەڵنەهاتن بەو هەموو پەرەپێدان و پێشكەوتنەی شاری هەولێر بخەنە نێو بابەتەكانیان. ئەوەی لای ئێمە مەبەستە ئەوەیە ئەگەر بەخێرای چاوێك بە هەندێ لەو رۆژنامە و گۆڤارانەدا بخشێنین، دیارە سەر بەئاراستەیەكی سیاسین دەیانەوێ ناوبانگی هەولێر و هەولێرییەكان بزڕێنن، بۆ نموونە نووسراوە (هەولێر پایتەختی ترس و تۆقاندن)، هەولێر پایتەختی گەندەڵی و تیرۆر، هەولێر بۆتە پایتەختی ئەشكەنجە و رفاندن و تیرۆركردنی رۆژنامەنووسان، دەبێت چاوەڕێی بەردەوامبوونی تیرۆر لەهەولێر بكەین، بەدبەختیەكی تری سەردەشت ئەوەیە هەولێرییە و لەهەولێر دەژی، باری ئەمنی بەغدای پایتەخت(؟) لەباری ئەمنی هەولێری پایتەختی هەرێم باشترە، پایتەختی ترس و تۆقاندن.. ئەم چەند پەیڤ و دەستەواژەیە، چەند نموونەیەكن لەو تەشهیرانەی بەشاری هەولێر دەكرێن، كە جگە لەمەبەستە سیاسیەكە مەبەستی دیكەی ئابووریشی لەپشتە و خەڵكانێك هەن دەیانەوێ باری ئاسایش وانیشانی جیهانی دەرەوە و كۆمپانیا و سەرمایەداران نیشان بدەن، ئەو شارە هی ئەوە نییە بێن و سەرمایەی تێدا وەبەربێنن و ژیانی خەڵكەكەی خۆشتربێت و پتر گەشە بكات و هەردەم ململانێی سیاسی لەكوردستاندا هەبووە و چەندین جاریش گەیشتۆتە دوائاستی توندوتیژی كە شەڕی براكوژی بووە، ئێستاش هەموومان بەتایبەتی ئۆپۆزیسیۆن رەخنەی ئەوە دەگرێ كە حزبە بەشەڕهاتووەكان بۆ شكستی بەرامبەریان پەنایان بردۆتە بەر دەوڵەتانی بیانی و دەوروبەر، بەڵام ئایا ئەم ناوزڕاندنەی هەولێر كە پایتەختی كوردستانە ناچێتە هەمان خانەی تەشهیر و پەنابردنە بەر خەڵكی بیانی بۆ ئەوەی بڕوایان بەسەركردایەتی كوردستان و دەسەڵاتیان بەسەر باری ئەمنیدا نەبێت، هەروەها لەجیهانی دەرەوە بگەیەنن كە دیموكراسی لەكوردستاندا بوونی نییە، ئەو بەو بیر تەسكییە بیربكاتەوە و هەتا ئێستاش بەگیانی ناوچەگەرێتی سەیری ئەم شار و ئەو دەڤەر بكات و هەر رووداو و كارەسات و هەڵەیەك لەم شارە بكرێت تەڕ و وشك پێكەوە دەسوتێنێ، بیرۆكەیەكی مەترسیدارە بۆسەر یەكهەڵوێستی رێزی نووسەر و روناكبیر و یەكپارچەیی كۆمەڵگەی كوردستان و پرۆسەی قوڵكردنەوەی دیموكراسی. كە هەر ئەو برا بەرێزانە خۆیان بانگەشەی بۆ دەكەن. دیارتر بەڵگەمان بۆ ئەم قسەیە ئەمەیە ئەم هەفتەیەی بۆ بێ دەنگ نەبوون كە لەسلێمانی لەلایەن ژمارەیەك لەستافی گۆڤار و رۆژنامە و سەنتەر و رێكخراوە دامەزراوە، تاقە دەستە و گروپێكی هەولێری لەگەڵ دانیە ئەمە نەك لەبەرئەوەی دەسەڵات رێگە نادات، لەبەرئەوەی هەولێرییەكان لەمجۆرە راگەیاندن و بانگەشە و هەڵچوون و قۆستنەوەی خوێنی شەهید سەردەشت بێزارن و دەزانن (گریانەكە بۆ هەریسەیە نەك حسێن).
ئێمە لەهەولێرێ پێمانوایە ئێستا هەولێر هەر هی هەولێرییەكان نیە، مادام هەولێر پایتەختی كوردستانە بۆتە شاری هەموو كوردستانیەك، ئەمەش بەم راستیە قایل نەبێت هەرگیز بیر و هۆشی نەتەوەیی و نیشتیمانی و دامەزراوەیی و پێشكەوتنی پێ قبوڵ ناكرێ و هەردەبێت بگەڕێتەوە سەر بیری تەسكی حیزبایەتی و ناوچەیی.